Bolar bítar vel frá sér

Bolvíkingar hafa algjöra yfirburði á Íslandsmóti skákfélaga.  Undirritaður minnist þess ekki að hafa séð aðra eins yfirburði, um langt árabil.  Bolvíkingar komu með fjóra sterka stórmeistara.  Forystan er 8½ vinningur og aðeins formsatriði fyrir Bolvíkinga að vinna titilinn fjórða árið í röð.  Hitt sem stendur upp úr helginni er að Stefán Kristjánsson er búinn að tryggja sér 2500 skákstig og stórmeistaratitil.  Verður væntanlega útnefndur stórmeistari í byrjun næsta árs.  

Þrátt fyrir að TR notaði fjóra erlenda meistara var lið þeirra veikara en flestir áttu von og ekki alveg í samræmi við trumbusláttinn þegar koma 12 erlenda meistara í TR var tilkynnt með viðhöfn fyrir í haust.  Fyrir utan Papin á fyrsta borði voru hinir erlendu gestirnir með minna en 2500 skákstig.  Ef til vill koma stóru nöfnin í síðari hlutann.

TR-ingurinn Anatoly Karpov setti skemmtilegan svip á setninguna. Hann afhendi rauðhærðu Akureyringum Mikael Jóhanni og Jóni Kristni verðlaunagripina fyrir Landsmótið í skák og lék svo fyrsta leikinn í fjórum skákum, þ.e. fyrsta leikinn á öllum viðureignum á 1. borði í 1. deild.   Svo skemmtilega vildi til að enginn lék sama leiknum heldur léku menn ýmist e4, d4, c4 eða b3.  Karpov þurfti svo að fara af landi brott fyrr en stefnt var að Pútin ætlar að heiðra hann.   Skemmtilegt viðtal við svo við Karpov í Kastljósinu í kvöld sem og í Sunnudagsmogganum.  Gott framtak hjá TR að fá kappann og átti Björn Jónsson mestan þátt í því.  Frábært framtak sem vekur jákvæða athygli á TR og skákinni almennt. 

TR er í öðru sæti, hafa vinnings forskot á Hellismenn sem eru þriðju.  Í fyrsta skipti í mörg ár sem félagið stillir erlendum meisturum að ráði.  Á fimmta borði var Karl Þorsteins sem gekk í félagið úr Helli fyrir keppnina.  Lið TR var því að langmestu leyti skipað „nýliðum"!

Hellismenn eru þriðju.  Liðið mátti sætta við jafntefli við Máta og b-sveit Bola.  Simon Williams var eini erlendi gesturinn með Helli að þessu sinni.   Hannes Hlífar Stefánsson tefldi á fyrsta borði og lét sér duga að gera 3 stutt jafntefli. 

Eyjamenn eru fjórðu.  Þeir stilltu upp Gurevich á fyrsta borði og eiginkona hans var á því fimmta.  Flestir áttu von á þeim mun sterkari.  En lið með stórmeistarana Helga og Henrik á 2. og 3. borði er sveitin auðvitað þrælöflug.  Eyjamenn hafa góða séns á öðru sæti.   

B-sveit Bolvíkinga eru fimmtu.  Það lið skipa sterkir skákmenn eins og landsliðsmaðurinn Bragi Þorfinnsson og stórmeistarinn Þröstur Þórhallsson.  En að mestu leyti samanstendur sveitin að uppöldum Bolvíkingum/Vestfirðingum.   Einhvern gárunginn um helgina sagði að a-liðið stæði fyrir „aðkeypta" og að b-liðið stæði fyrir „brottflutta"! 

SA er sjötta sætti og eru örugglega býsna ánægðir.  Þeir unnu TR 4½-3½ og það sem meira var, þeir unnu hina brottfluttu Akureyringa, Máta, með sama mun.   Þeir hafa 13½ vinning og eru með 2½ vinning á Máta fyrir fallbaráttuna.  Með þeim tefldu 2 danskir alþjóðlegir meistarar. 

Mátar háðu sínu frumraun í fyrstu deild og ætla sér greinilega að berjast fyrir sínu.  Gawain Jones kom geysisterkur inn og hlaut 3½ vinning. 

Fjölnismenn reka lestina með 7 vinninga og fátt kemur í veg fyrir fall hjá þeim.  Íslandsmeistarinn Héðinn Steingrímsson leiddi sveitina.  Helgi Árnason hefur ákveðið að treysta á heimavarnarliðið og gefa uppöldum skákmönnum sín tækifæri til að tefla í efstu deildum sem er mjög vel til fundið.  Fjölnismenn verða komnir með mjög sterkt uppalið lið innan fárra ára.  

Stefán Kristjánsson var eini skákmaðurinn sem fékk fullt hús í fjórum skákum.  Jones, Kuzubov og Halkias náðu 3½ vinning.  Bolvíkingarnir Jóhann Hjartarson, Jón L. Árnason og Jón Viktor Gunnarsson hlutu 3 vinninga í 3 skákum. 

Þegar spá ritstjóra er skoðuð kemur í ljós að ég var algjörlega út úr korti varðandi efsta sætið.  Ég stóð í þeirri trú að TR-ingar og reyndar Eyjamenn myndu koma mun sterkari til leiks.  Að öðru leyti er staðan í nokkuð góðu samræmi við spánna. 

Spá ritstjóra í sviga.

Rk.	Spá	Team	TB1	TB2
1	2	TB A	27,5	8
2	1	TR A	19	6
3	4	Hellir A	18	4
4	3	TV A	16,5	4
5	5	TB B	15,5	5
6	6	SA A	13,5	4
7	8	Mátar	11	1
8	7	Fjölnir A	7	0

 

2. deild

Eins og vitað var voru Víkingar og Goðinn í sérflokki.  Önnur lið eru í hnapp og aðeins munar 3½ vinningi á liðinu í 3. sæti og því áttunda.  Þarna getur því allt skeð enda sex lið í „fallbaráttu".  Öll liðin sex eiga líka sameiginlegt að hafa mætt öðru toppliðinu og eiga hitt eftir.   Mér finnst reyndar ólíklegt að TR-b og KR falli.  

Mér var bent á það af Skagamanni að ég hefði spáð þeim falli nú fjórða árið í röð.   Ég var vinsamlegast bent á að halda því áfram enda hefur sveitin aldrei fallið öll þessi ár!

Rk.	Spá	Team	TB1	TB2
1	1	Víkingar A	19,5	8
2	2	Goðinn A	18,5	6
3	6	KR A	11,5	5
4	3	TR B	11	3
5	7	SR A	10	3
6	8	TA	9,5	3
7	5	Hellir B	8	2
8	4	Haukar A	8	2

 

3. deild

Nú var teflt annað árið í röð með MP-kerfi í 3. deild.  Ritstjóri spáði aðeins fyrir topp átta og virðist hafa verið býsna sannspár.  Þegar spáin var gerð var b-sveit Víkinga ekki í 2. deild en þeir komust upp vegna forfalla.    B-sveit Hauka virðist líka vera lítill eftirbátur a-sveitarinnar.   Garðbæingar og Eyjamenn eru líklegust upp í 2. deild.  Einkar gaman fannst mér að sjá Hauk Angantýsson aftur að tafli. 

C-sveitir SA og Hellis eru neðstar.  Akureyringar sakna sárlega Sveinbjörns Sigurðssonar sem gaf ekki kost á sér.  Tómlegt að hafa ekki Sveinbjörn á staðnum.  Treysti á að kallinn gefi kost á sér í síðari hlutann enda í góðu skákformi eftir NM öldunga. 

Rk.	Spá	Team	TB1	TB2
1	1	TG A	8	20
2	2	TV B	7	18
3		Haukar B	6	15,5
4		Víkingar B	5	15
5	7	SA B	5	14
6	5	SSON	5	14
7	3	SFÍ A	5	13
8	4	TB C	4	12
9	6	Vinjar A	4	10,5
10	8	KR B	4	9,5
11		TG B	3	9
12		Sauðárkr.	3	8,5
13		TV C	2	11
14		SR B	2	9,5
15		Hellir C	1	8,5
16		SA C	0	4

 

4. deild

21 lið tekur þátt í 4. lið.  Jafnmörg lið og í fyrra.  Semsagt metjöfnun.  B-sveit SFÍ leiðir í keppninni en liðið er að uppistöðu sama og í fyrra, nema að Sigurður Daði hélt í Goðann.  B-sveit Máta er í öðru sæti.  Án efa "frægasta" liðið sveit en þarna mátti t.d. sjá Alþingismennina Halldór Blöndal og Illuga Gunnarsson. 

Ritstjóri er óvenju getspakir varðandi fjórðu deildina.  Ég spáði aðeins fyrir um sjö efstu liðin og eru þau öll meðal átta efstu. 

Spennandi barátta framundan í síðari hlutanum og engan veginn ljóst hvaða 3 lið fara upp.

Búið er að gefa út röðun fyrir fimmtu umferð með fyrirvara.  Endurraðað verður ef forföll verða fyrir síðari hlutann.

Rk.	Spá	Team	TB1	TB2
1	5	SFí B	8	18,5
2	4	Mátar B	7	16
3	7	SSA	6	17,5
4	3	Goðinn B	6	17
5	2	Fjölnir B	6	17
6	6	Bridsfjelagið	6	15
7		UMSB	6	13
8	1	TR C	5	15,5
9		Víkingar-c	4	13
10		Mosfellsbær	4	12
11		Sf. Vinjar B	4	11,5
12		SA D	4	11
13		Kórdrengirnir	4	10,5
14		TR F	4	7,5
15		TR D	3	11,5
16		Fjölnir C	2	11
17		Hellir - Ung	2	8,5
18		SSON B	2	8
19		TR E	2	8
20		Goðinn C	2	8
21		TG C	1	6

Að lokum

Skákstjórar fá sérstakar þakkir fyrir góð vinnubrögð í keppninni.  Félögin flest í fyrstu deild útveguðu skákstjóra og skákstjórn því vel mönnuð í ár.  Myndirnar eru frá Helga Árnasyni, Einari S. Einarssyni og Halldóri Grétari Einarssyni.  Fleiri myndar væntanlega í myndasafnið.  

Skemmtilegum fyrri hluta er lokið.  Síðari hlutinn er svo framundan í mars á Selfossi.  Þar verður mikið húllumhæ en Íslandsmótið í Fischer-random á Selfossi verður í framhaldi af Íslandsmótinu.  Og svo verður Reykjavíkurskákmótið þann 6.-13. mars.  

Vér hlökkum til!

Allar upplýsingar um mótið má finna á heimasíðu mótsins.

Gunnar Björnsson

Höfundur er ritstjóri Skák.is og tefldi með b-sveit Hellis um helgina.

Íslandsmót skákfélaga - TR spáð sigri á 111 afmæli

Það er órjúfanlegur hluti í aðdraganda  hvers Íslandsmóts skákfélaga að ritstjóri gefi út sína hefðbundnu spá.  Hvet menn til að taka spánni með hæfilegum fyrirvara, enda ekki byggð á geimvísindum og fyrst og fremst sett fram til gamans.  

Þegar spáð í spilin fyrir Íslandsmót skákfélaga veltir maður fyrir sér um hvaða kreppu er verið að tala um á Íslandi.  Keppnin verður sífellt sterkari á hverju og nú stefnir jafnvel í sterkasta Íslandsmót skákfélaga frá upphafi.

TR-ingar virðast ætla að koma sterkir inn.  Í félagið gengu 12 erlendir skákmenn í aðdraganda keppninnar og það engin smá nöfn.  Það er staðfest að Karpov verður á landinu 6.-10. október en hverjir aðrir koma er ekki ljóst.  Önnur félög halda einnig fast að sér að spilunum og það hreinlega er ekki ljóst hverjir munu mæta.  Ritstjóri hefur aldrei verið í jafnmiklu myrkri fyrir spá keppninnar og nú.  En þetta er einmitt það sem gerir Íslandsmót skákfélaga jafn skemmtilegt og raun ber.  Mér sjálfum finnst alltaf jafngaman að setjast niður og tefla og hafa ekki hugmynd um hverjum ég mæti fyrr en umferðin hefst!

Menn virðast almennt spá að fjögur lið verði í toppbaráttunni nú.  Það eru Íslandsmeistarar, Bolvíkinga, sem náðu frábærum árangri á EM taflfélaga, Eyjamenn, sem vilja sjálfsagt fjölga tegundum góðmálma í sínu verðlaunasafni, TR-ingar og Hellismenn.  Mín tilfinning er sú að þrjú fyrstnefndu félögin munu öll stilla upp fjórum erlendum meisturum.  Að þeim hafa TR-ingar óneitanlega sterkustu einstaklingana en á félagaskrá þeirra eru meistarar eins og Judit Polgar, Kamsky, Gashimov, Sutovsky ásamt Karpov. Ekkert félag hefur auk þessi fleiri innlenda stórmeistara í sínum röðum en TR, þrátt fyrir að þeir séu ekki þeir virkustu.  Í ljósu ofangreindu tel ég Taflfélag Reykjavíkur líklegasta til sigurs í ár.

Eyjamenn fá sterkustu dagskránna í fyrri hlutanum og mæta öllum toppliðunum.  Engar aðrar toppviðureignir fara fram.  Líklegt er því að Eyjamenn verði ekki ofar en í 3. eða 4. sæti eftir fyrri hlutann en gætu spænt inn vinningum í þeim síðari.  Bolvíkingar eru eina félagið sem hafa b-lið í 1. deild.  Áhugamenn um b-sveitir munu án efa fylgjast grannt með því hvort b-sveitin verði jafn sterk í fyrstu umferð þegar hún mætir a-sveitinni og í öðrum umferðum fyrri hlutans.

Ef við berum saman Bolvíkinga og Eyjamenn og gefum okkur að erlendu fulltrúarnir verði áþekkir að styrkleika er ljóst að Bolvíkingar eru sennilega heldur sterkari á neðri borðunum.  Eyjamenn hafa þó óneitanlega styrkt sig með því að fá Henrik í sínar raðir.  Þessi sveitir geta líka báðar unnið titilinn og sagan er óneitanlega með Vestfirðingum í því sambandi.  Ég spái Bolvíkingum öðru sæti og Eyjamönnum því þriðja.

Hellismönnum, sem munu ekki stilla upp fjórum erlendum meisturum spái ég fjórða sæti.  B-sveit Bolungarvíkur er einnig afar öflug og með henni mun tefla sennilega rúmur helmingur EM-sveitar félagsins, sem náði 14. sæti á EM taflfélaga.  B-sveitin verður aldrei í botnbaráttu og spái ég þeim fimmta sæti.

Ég spái að botnbaráttan verði á milli þriggja liða.  Akureyringa, Fjölnismanna og Máta.  Ég veit ekki hversu sterkar þessar sveitir en mér segir svo hugur að erlendir skákmenn muni koma við sögu í öllum þessum sveitum einnig.  Satt best að segja sýnist mér að erlendir skákmenn verði í öllum sveitum nema sennilega b-sveit Bolvíkinga.  Ég ætla að spá að Akureyringar haldi sér áfram í deild þeirra bestu en Fjölnismenn og Mátar falli.

Rétt er að ítreka að ég set alla fyrirvara um þessa spá enda hef ég hef afar takmarkaðar upplýsingar um styrkleika sveitanna.

Spá ritstjóra:

• 1.      TR
• 2.      TB
• 3.      TV
• 4.      Hellir
• 5.      TB-b
• 6.      SA
• 7.      Fjölnir
• 8.      Mátar

2. deild

Það er létt að spá í spilin varðandi efstu sætin í 2. deild.  Þau verða væntanlega Víkingaklúbbins-Þróttar og Goðans. 

Í ljósi styrkingar á a-sveit TR er ljóst að b-sveitin hefur styrkst verulega.  Mér finnst líklegast að hún taki bronsið.  Þarna gæti b-sveit Hellis einnig komið sterk inn sem og Haukar og KR-ingar sem féllu úr fyrstu deild.  Önnur deildin virðist vera óhemjusterk í ár.  

Vandi er um fallbaráttuna að spá og er allt eins hægt að spá fyrir um útgjöld Ríkissjóðs vegna SpKef.  Ég reyni samt og spái Akurnesingum og Reyknesingum falli.  Rifja upp enn og aftur, að gefnu tilefni, að hér er ekki um að ræða geimvísindarannsókn!

Spá ritstjóra

• 1.      Víkingaklúbburinn-Þróttur
• 2.      Goðinn
• 3.      TR-b
• 4.      Haukar
• 5.      Hellir-b
• 6.      KR
• 7.      SR
• 8.      TA

3. deild

16 lið taka þátt í 3. deild.  Eins og venjulega er erfitt að spá í spilin og ætlar ritstjóri að láta duga að spá fyrir um áttu efstu sætin.  Í fljótu bragði telur maður TG, TV-b og SFÍ líklegasta til sigurs.  Selfyssingar geta einnig verið öflugir sem og c-sveit Bolvíkinga og hinir brosmildu Vinverjar. 

Spá ritstjóra um efstu sætin

• 1.      TG
• 2.      TV-b
• 3.      SFÍ
• 4.      TB-c
• 5.      Selfoss
• 6.      Vin
• 7.      SA-b
• 8.      KR-b

4. deild

Þegar þetta er ritað eru 24 sveitir skráðar til leiks í fjórðu deild sem er svipað og síðustu ár.  Tvö félög taka þátt í fyrsta skipti, Taflfélag Mosfellsbæjar og Bridsfjelagið. 

Þarna gætu Bridsfjelagið, Austfirðingar b-sveitir Fjölnis, Máta, Goðans og SFÍ blandað sér í toppbaráttuna.  Ég tel samt sem áður c-sveit TR-inga líklegast til sigurs, sem féllu óvænt úr 3. deild í fyrra.

Spá ritstjóra

• 1.      TR-c
• 2.      Fjölnir-b
• 3.      Goðinn-b
• 4.      Mátar-b
• 5.      SFÍ-b
• 6.      Bridfjelagið
• 7.      SSA

Að lokum

Að sjálfsögðu vil ég setja við þetta hefðbundin fyrirvara.  Og ítreka enn að þessi spá er fyrst og fremst sett fra, til gamans og enginn á að taka hana of alvarlega né að fara í fýlu út af henni!

Gleðilega hátíð!

Gunnar Björnsson

Undirritaður mun tefla með b-sveit Hellis um helgina.

 

Spá ritstjóra mun birtast kl. 17:30

Sýnið þolinmæði.

Skákhátíð að hefjast!

Síðari hluti Íslandsmóts skákfélaga fer fram um helgina.  Eyjamenn leiða fyrir síðari hlutann en Bolvíkingar eru engu að síður sigurstranglegastir.   Íslandsmót skákfélaga markar upphafið af mikilli skákhátíð í Reykjavík sem nær hámarki með MP Reykjavíkurskákmótinu sem fram fer 9.-16. mars í Ráðhúsi Reykjavíkur. 

1. deild

Staðan (spá fyrir fyrri hlutann í sviga):

• 1. (1) TV 25 v.
• 2. (2) TB 23½ v.
• 3. (3) Hellir 22 v.
• 4. (4) TR  17½ v.
• 5. (5)Fjölnir 14½ v.
• 6. (7) SA 12 v.
• 7. (8) Haukar 8 v.
• 8. (6) KR 5½ v.

Eyjamenn hafa 1,5 vinnings forskot á Bolvíkinga en engu að síður er það mat ritstjóra að staða Bolvíkinga sé best.  Þeir eiga auðveldara prógramm eftir en Eyjamenn og eru með sterkasta liðið með sex stórmeistara innanborðs sem hefur sennilega ekki gerst síðan Hrókurinn var og hét.   Hellismenn eru þriðju og eina von þeirra felst í því að ná góðum úrslitum gegn Eyjamönnum í 5. umferð og hreinsa í 6. og 7. umferð.  Í lokaumferðinni mætast Eyjamenn og Bolvíkingar og þá gætu úrslitin ráðist.  Og vonandi fáum við dramatík!

Eyjamenn eiga því eftir erfiðustu dagskrána en fyrir utan hið toppliðin tvö eiga þeir eftir Hauka.  Bolvíkingar eiga einnig eftir að mæta Haukum en auk þess eiga þeir eftir að tefla við TR-inga sem eru sýnd veiði en ekki gefin eins og þeir sýndu með frábærum endaspretti í fyrra.   Hellismenn eiga eftir að mæta KR og SA auk Eyjamanna.

Ofangreind félög eru langsterkust og munu hirða verðlaunasætin þrjú.   TR, Fjölnir sigla um miðja deild og sennilega Akureyringar einnig. 

Ritstjóri telur að Haukar og KR falli.  

Spá ritstjóra:

• 1. TB
• 2. TV
• 3. Hellir
• 4. TR
• 5. Fjölnir
• 6. SA
• 7. KR
• 8. Haukar

2. deild

Staðan:

• 1. (2) Mátar 20 v.
• 2. (1) TB-b 18½ v.
• 3. (4) TR-b 15 v.
• 4. (3) Hellir-b 14 v.
• 5. (5) SR 12 v.
• 6. (6) TA 8½ v.
• 7. (8) SSON 5 v.
• 8. (7) Haukar-b 3 v.

Styrkleiki Bolvíkinga í 1. deild veldur því að b-sveit þeirra í 2. deild er sennilega sterkari en flestar sveitir í 1. deild enda með titilhafa á nánast öllum borðum og þar með talinn einn stórmeistara.  Mátar fylgja þeim svo væntanlega upp í fyrstu deild.   Gangi þetta eftir verða Bolvíkingar eina félagið með 2 sveitir í fyrstu deild að ári.  

B-sveitir Hellis og TR, sigla væntanlega um lygnan sjó ásamt Reyknesingum en Skagamenn, Selfyssingar og b-sveit Hauka berjast um síðasta sætið í deild þeirra næstbestu.  Ég spái að Skagamenn skori mörkin og haldi sér uppi þótt alls ekki megi vanmeta Magga Matt og þá Flóamenn sem reyndust býsna drjúgir á endasprettinum í fyrra og gætu verið til alls vísir einnig nú.

Spá ritstjóra:

• 1. TB
• 2. Mátar
• 3. Hellir-b
• 4. TR-b
• 5. SR
• 6. TA
• 7. SSON
• 8. Haukar-b

3. deild

Staðan:

Röð	Spá	Lið	Stig	V.
1	1	Vikingaklubb. A	7	17,5
2	3	TG A	7	15
3	7	TV B	6	15,5
4	4	SA B	6	15,5
5	2	Godinn A	6	15
6		TR C	4	13,5
7	6	Hellir C	4	12
8	5	TB C	4	12
9	8	KR B	4	11,5
10		TG B	3	13
11		SA C	3	11
12		Hellir D	3	10,5
13		TV C	3	8,5
14		Sf. Vinjar A	2	9,5
15		SR B	2	8
16		Haukar C	0	4

Það er erfitt að spá í 3. deildina og enn erfiðara eftir að það voru tekin upp stig (match point) Víkingar (þessir hafa ekki rekið þjálfarann) ættu vinna sig upp og ætla ég að spá að Goðinn fylgi þeim með upp.  Garðbæingar, Eyjamenn og Akureyringar eru svo til alls líklegir og geta  blandað sér í þá baráttu. 

Spá ritstjóra:

• 1. Víkingaklúbburinn
• 2. Goðinn
• 3. TV-b
• 4. TG
• 5. SA-b

4. deild

Staðan:

Röð	Spá	Lið	Stig	V.
1		Sf. Sauðarkroks	8	17
2	5	Fjolnir B	8	15,5
3		UMSB	6	18
4	1	SFÍ	6	16,5
5		TR D	6	16
6	4	S.Austurlands	6	14
7	3	Godinn B	4	14,5
8		UMFL	4	14,5
9		SSON B	4	14,5
10		TV D	4	13,5
11	2	Vikingaklubburinn B	4	13
12		Aesir feb	4	13
13		Godinn C	4	12,5
14		Fjolnir C	4	10
15		TG C	4	9,5
16		Kordrengirnir	3	11
17		TR E	3	8,5
18		Sf. Vinjar B	2	10,5
19		Hellir E	2	8
20		SA D	2	7,5
21		Fjolnir D	1	6,5
22		Osk	1	4

Auðveldara er að spá í líklegar endurheimtur á IceSave en í 4. deildina.  Sauðkræklingar komu á óvart (nema kannski sjálfum sér) í fyrri hlutanum.  Skákfélag Íslands er með sterkasta liðið á pappírnum að mati ritstjóra og ég tel að þeir vinni sig upp.  3 lið ávinna sér rétt og líklegt er að það verði 3 af þeim 6 liðum sem hafa 6-8 stig. 

Ég ætla að spá að það verði SFÍ, Sauðkræklingar og hin unga og efnilega b-sveit Fjölnis. 

Spá ritstjóra:

• 1. Skákfélag Íslands
• 2. Sauðárkróku
• 3. Fjölni
• 4. Austurland
• 5. UMSB

Að lokum

Mikill fyrirvari er settur við allar spár og engin geimvísindi liggja á bak við þær.  Þar sem skákmenn þekkt gæðablóð með mikið jafnaðargeð geri ég ekki ráð fyrir miklum eftirköstum þótt ég kunni að hafa býsna oft rangt fyrir mér! 

Ég óska skákmönnum góðar skákhátíðar og hvet menn til að berjast eins og ljón á skákborðinu en vera hinir bestu vinir fyrir utan þess.

Verðlaunaafhending verður í Billiard-barnum, Faxafen 12, og hvet ég skákmenn til að fjölmenna þangað að loknu móti.

Gleðilega hátíð!

Gunnar Björnsson

Höfundur er bankastarfsmaður og félagi í Taflfélaginu Helli.

P.s. Varist eftirlíkingar!

 

Déjà vu? - Eyjamenn efstir eftir fyrri hlutann

 

Eyjamenn eru í kunnuglegri stöðu, efstir, eftir fyrri hluta Íslandsmóts skákfélaga.  Þeir voru það einnig í fyrra en máttu þá lúta í gras fyrir Bolvíkingum sem eru í öðru sæti rétt eins og þá.  Hellismenn eru í þriðja sæti.  Staðan er áhugaverð og getur boðið upp á marga möguleika.  Flest stefnir í að Mátar og b-sveit Bolvíkinga vinni sig upp í 1. deild.  Baráttan er hörð í 3. og 4. deild.  Annars virðist ritstjóri vera óvenju getspakur að þessu sinni nema í fjórðu deild.

Byrjum á fyrstu deildinni.  Fyrirfram áttu flestir von á baráttu strandbæjanna Vestmannaeyja og Bolungarvíkur.  Hellismenn ákváðu að þessu sinni að taka slaginn, nýjar áherslur með nýjum formanni auk þess sem klúbburinn á 20 ára afmæli á næsta ári, og kölluðu til þrjá erlenda stórmeistara og voru án efa með sterkustu efri borðin.  Á fyrsta borði fyrir Helli, tefldi Tékkinn David Navara, sem hefur 2722 skákstig og er einn allra stigahæsti skákmaður sem hér hefur tefld hérlendis.

Eyjamenn hafa 1½ vinnings forskot á Bolvíkinga Það er hins vegar ekki svo að sveitin standi best að vígi því Eyjamenn eiga bæði eftir að mæta Bolvíkingum og Hellismönnum.  Eyjamenn stilltu upp fjórum erlendum stórmeisturum auk Helga Ólafssonar. 

Bolvíkingar máttu teljast heppnir að tapa aðeins með 1 vinningi gegn Helli og lukkudísirnar voru einnig með þeim þegar Stefán Kristjánsson vann Gylfa Þórhallsson þegar sá síðarnefndi lék af sér manni í steindauðri jafnteflisstöðu.  Bolvíkingar stilltu upp tveimur erlendum úkraínskum stórmeisturum.  Bolvíkingar búa svo vel að þeir geta stillt upp stórmeistara (Þröstur Þórhallsson) á áttunda borði eitthvað sem ekkert annað taflfélag getur gert og geta kallað til tvo erlenda stórmeistara í síðari hlutanum og þá munu þeir hafa á að skipa langsterkustu sveitinni, a.m.k. á pappírnum. 

Hellismenn eru í þriðja sæti 1½ vinningi á eftir Bolvíkingum og þurfa að meta stöðu sína.  Eiga þeir að taka slaginn í seinni hlutanum?  Líkurnar á sigri eru ekki nema 15-20% þótt þeir kalli til 3-4 erlenda stórmeistara, sérstaklega ef Bolvíkingar koma með ofursveit. Erlendu skákmennirnir stóðu fyrir sínu (fengu allir 3½ vinning) en eins og ég sagði pistli fyrir mót var ljóst að skammur tími á milli Ól og ÍS myndi lenda á félaginu og því gekk mun verr að manna sína sveit en oft áður vegna þessa.  Hannes Hlífar náði sér ekki strik en Hjörvar fór mikinn og vann allar fjórar skákir sínar, sá eini í fyrstu deild sem fékk fullt hús í fjórum skákum.   

Hellismenn þurfa að meta stöðu sína.  Er það réttlætanlegt fyrir klúbbinn að leggja í þann kostnað upp á von og óvon.  Og hvað gerist ef Hellismenn taka ekki slaginn?  Þá er leiðin greiðari fyrir Eyjamenn þar sem þeir eiga eftir að tefla við Hellismenn en ekki Bolvíkingar.   Staðan í þessari skák er flókin og mjög óljós!

Taflfélag Reykajvíkur er í fjórða sæti.  Vert er þar að nefna frammistöðu Daða Ómarssonar sem hefur fullt hús, reyndar í þremur skákum og árangur hans í Haustmóti TR virðist ekki vera tilviljun.  Í 2. umferð tapaði sveit Taflfélags Reykjavíkur á öðru borði í ótefldri skák gegn Haukum.  Eitthvað sem mér finnst að ekki eigi að sjást í Íslandsmóti skákfélaga og allra síst á toppborðunum í efstu deild. 

Fjölnismenn eru í fimmta sæti en hafa mætt þremur efstu liðunum og geta vel náð ofar.  Akureyringar eru í sjötta sæti, Haukar í því sjöunda og KR-ingar reka lestina.  Mér sýnist flest benda til þess að Haukar og KR falli en hugsanlega geta þessi félög bjargað sér á kostnað Akureyringa.  

Staðan (spá ritstjóra í sviga):

• 1. (1) TV 25 v.
• 2. (2) TB 23½ v.
• 3. (3) Hellir 22 v.
• 4. (4) TR  17½ v.
• 5. (5)Fjölnir 14½ v.
• 6. (7) SA 12 v.
• 7. (8) Haukar 8 v.
• 8. (6) KR 5½ v.

2. deild

Mátar eru efstir eftir fyrri hlutann í 2. deild.   Mátar eiga reyndar eftir að mæta liðunum í 2.-4. sæti og eru því ekki öryggir um fyrstu deildar sæti.  Bolvíkingar eru í öðru sæti en ég tel þá sigurstranglegasta sérstaklega ef þeir styrkja a-liðið fyrir síðari hlutann en þá gætu Jón Viktor, Þröstur, Guðmundur og Dagur teflt með b-sveitinni.   B-sveitir TR og Hellis fylgja þarna á eftir og halda í veika von.  Sem fyrr er spá ritstjórans býsna nálægt stöðunni eftir fyrri hlutann.   Selfyssingar og Haukar eru í fallsætunum en eiga báðar eftir að tefla við Skagamenn svo þarna gæti ýmislegt gerst. 

• 1. (2) Mátar 20 v.
• 2. (1) TB-b 18½ v.
• 3. (4) TR-b 15 v.
• 4. (3) Hellir-b 14 v.
• 5. (5) SR 12 v.
• 6. (6) TA 8½ v.
• 7. (8) SSON 5 v.
• 8. (7) Haukar-b 3 v.

3. deild

Töluverðar breytingar urðu í 3. deild.  Liðunum var fjölgað í 16 úr 8 og teflt eftir svissneska kerfinu.  Auk þess er stuðst við stig (match point) í 3. og 4. deild í stað vinninga sem mun bara auka spennuna.    Sem fyrr er ritstjórinn býsna getspár en hann spáði aðeins fyrir átta efstu liðin og eru þau öll meðal níu efstu liða.   Þarna getur allt gerst en ég tel að Víkingaklúbburinn muni fara upp en mun óljósara hvaða lið fylgir þeim upp.  

 

Röð	Spá	Lið	Stig	V.
1	1	Vikingaklubburinn A	7	17,5
2	3	TG A	7	15
3	7	TV B	6	15,5
4	4	SA B	6	15,5
5	2	Godinn A	6	15
6		TR C	4	13,5
7	6	Hellir C	4	12
8	5	TB C	4	12
9	8	KR B	4	11,5
10		TG B	3	13
11		SA C	3	11
12		Hellir D	3	10,5
13		TV C	3	8,5
14		Sf. Vinjar A	2	9,5
15		SR B	2	8
16		Haukar C	0	4

 

4. deild

22 lið taka þátt í fjórðu deild sem er töluverð fækkun sem skýrist að öllu leyti með fjölgun liða í 3. deild.   Tvö lið hafa fullt hús stiga, Skagfirðingar og b-sveit Fjölnis.   Skagfirðingar hafa svo fleiri vinninga.   Borgnesingar koma í þriðja sæti en fyrir þeim fyrir ólympíufarinn Tinna Kristín Finnbogadóttir.

Ný skemmtileg félög setja svip sinn á mótið.  Kórdrengirnir mættu til leiks en þar eru ferðinni drengir sem tefldu áður fyrr en hafa lítið sést síðustu ár við skákborðið.   Skákfélagið Æsir tekur þátt en þar eru á ferðinni eldri borgarar.  Svo verður að nefna Ósk, en þá sveit skipa eingöngu stelpur og þótt mér vænt um að sjá gamlan skáknemenda minn tefla með þeim!

Ritstjórinn er alveg út úr korti varðandi spá í fjórðu deildinni.   Þrjú efstu liðin vinna sér rétt til að tefla í 3. deild að ári og þarna munu úrslitin ekki ráðast fyrr en á lokametrunum.

Röð	Spá	Lið	Stig	V.
1		Sf. Sauðarkroks	8	17
2	5	Fjolnir B	8	15,5
3		UMSB	6	18
4	1	SFÍ	6	16,5
5		TR D	6	16
6	4	S.Austurlands	6	14
7	3	Godinn B	4	14,5
8		UMFL	4	14,5
9		SSON B	4	14,5
10		TV D	4	13,5
11	2	Vikingaklubburinn B	4	13
12		Aesir feb	4	13
13		Godinn C	4	12,5
14		Fjolnir C	4	10
15		TG C	4	9,5
16		Kordrengirnir	3	11
17		TR E	3	8,5
18		Sf. Vinjar B	2	10,5
19		Hellir E	2	8
20		SA D	2	7,5
21		Fjolnir D	1	6,5
22		Osk	1	4

Ólafur S. Ásgrímsson og Bragi Kristjánsson fá sérstakar þakkir fyrir skákstjórn.  Helgi Árnason og Einar S. Einarsson eiga langflestar myndirnar í myndaalbúmi mótsins og eiga þakkir skyldar.  

Ég vil einnig benda á að Halldór Grétar Einarsson hefur tekið saman skákstigabreytingar eftir fyrri hlutann og fyrri mót á skákstigaútreikningstímabilinu.  Þar kemur t.d. í ljós að Jóhann Hjartarson hefur endurheimt stöðu sína sem stigahæsti skákmaður landsins.  Rétt er að sérstaklega að benda á miklar stigahækkanir Hjörvars og Lenku sem rjúka upp stigalistann.     

Og þá byrjar niðurtalninginn fyrir síðari hlutann sem fram fer 4. og 5. mars nk.............142 dagar.

Gunnar Björnsson

Höfundur er ritstjóri Skák.is og tefldi með b-sveit Hellis um helgina.

Íslandsmót skákfélaga - spáð í spilin fyrir mót

Það er skammt stórra högga á milli í íslensku skáklífi.   Eftir besta árangur Ólympíuliðsins í langt árabil er nú í gangi sterkasta Haustmót TR jafnvel frá upphafi.   Og nú um helgina hefst Íslandsmót skákfélaga.   Félögin halda spilunum þétt upp að sér en nokkuð ljóst mætti þó vera að baráttan verður á milli landsbyggðarfélaganna, Bolvíkinga og Eyjamanna.

Eyjamenn eru ekki í neinum feluleik og á heimasíðu þeirra má finna upplýsingar um hverjir tefla fyrir þeirra hönd í fyrri hlutanum.  Má þar nefna Hammer og Gurevich og sjálfsagt munu Eyjamenn stilla upp fjórum erlendum skákmönnum. 

Bolvíkingar hafa lítið sýnt af sínum spilum en hafa auðvitað óhemjumannskap af íslenskum skákmönnum og því er ólíklegt að þeir kalli til fjóra erlenda skákmenn enda væri þá lítill tilgangur í því að safna flestum sterkustu íslensku skákmönnunum í eitt félag, því vart er tilgangurinn að nota þá í 2. deild.

Miðað við ofangreindur forsendur gef ég mér að Eyjamenn verði sterkari á efri borðunum en Bolvíkingar á þeim neðri.    Félögin mætast í lokaumferðinni og þá gætu úrslitin ráðist.   Ég ætla að titilinn fari að þessu sinni Eyjamanna.   Líkurnar eru samt sem áður aðeins 51-49 að mati undirritaðs sem spáir mjög spennandi keppni í ár.

Ég ætla að spá Hellismönnum bronsinu.   Hellir líður fyrir Ólympíuskákmótið en 7 af 12 fulltrúum þar komu úr félaginu og ljóst að skammur tími á milli þessara móta veldur Helli töluverðum búsifjum.      

TR-ingum spái ég fjórða sæti á afmælisárinu.   TR-ingar mættu vængbrotnir til til leiks í vor en komu samt sem áður skemmtilega á óvart er þeir náðu þriðja sætinu, eitthvað sem fáir áttu von á fyrir seinni hlutann. 

Ég ætla að spá því að Haukar og Akureyringar falli.   Í sætunum þar á milli verði KR og Fjölnir.   Ég hef reyndar takmarkaðar uppstillingar um liðsuppstillingar þessara liða og hversu mörgum útlendingum þau stilla upp en einhverju verður maður að spá.

Spá ritstjóra:

• 1. TV
• 2. TB
• 3. Hellir
• 4. TR
• 5. Fjölnir
• 6. KR
• 7. SA
• 8. Haukar

2. deild

Fjögur b-lið eru í 2. deild.   Styrkleiki þeirra liða fer því að miklu leyti eftir hversu vel þeim gengur að manna a-liðin.  Ég ætla spá því að Bolvíkingar komi hér sterkir inn og Víkarar hafi sigur.   Verra er að giska hverja fylgja þeim upp en ég ætla að giska á Máta en hingað til hef ég reynst býsna sannspár um framgang Mátana og hafa þeir verið ákaflega sáttir við mínar spár hingað til.   B-sveitir Hellis og TR geta einnig verið til alls líklegar en það ræðst að mönnum a-liðanna.   Svo eru Reyknesingar til alls líklegir.   Ég ætla að spá því að b-sveit Hauka falli en félagið hefur orðið fyrir miklum búsifjum og ætla að spá því að dvöl Selfyssinga, sem fóru mjög óvænt upp í fyrra verði stutt í 2. deild.

Spá ritstjóra:

• 1. TB-b
• 2. Mátar
• 3. Hellir-b
• 4. TR-b
• 5. SR
• 6. TA
• 7. Haukar-b
• 8. Selfoss

3. deild

Hér er nánast ómögulegt að spá í spilin.   Deildin hefur breyst og eru nú 16 lið í deildin og tefldar verða 7 umferðir eftir Monrad/svissneska kerfinu.   Auk þess gilda MP-stig framvegis í 3. og 4. deild sem getur breytt ýmsu.

C-sveitir Bolvíkinga og Hellis gætu verið sterkar.   Það er þó háð óvissu um mönnum a- og b-liða.   Akureyringar gætu einnig verið til líklegar en litlu munaði að sveitin færi upp í fyrra.   Víkingarnar sem komu upp eru einnig mjög sterkir, sem og b-sveitir Eyjamanna og KR-inga.  Goðinn er það lið sem styrkt hefur sig mest á milli ára og er orðið lítið sem Þingeyinga í a-liðinu, eitthvað sem könnumst vel við úr öðrum landsbyggðarfélögum sem hafa verið að styrkja sig síðustu ár.   Svo má einnig nefna fyrrum Íslandsmeistara Taflfélags Garðabæjar sem hljóta að stefna að því að koma sér aftur upp í 2.deild.

Ég ætla að spá Víkingum og Goðverjum tveimur efstu sætunum í 3. deild.   Ég ætla mér líka að láta mér duga að spá fyrir efstu sætin í 3. deild þar sem ég hef ekki nægjanlega þekkingu á liðunum í þriðju deild til að spá fyrir með einhverju viti (svo má deila um vitið í spánum í 1. og 2. deild).

Spá ritstjóra um átta efstu sætin:

• 1. Víkingaklúbburinn
• 2. Goðinn
• 3. TG
• 4. SA-b
• 5. TB-c
• 6. Hellir-c
• 7. TV-b
• 8. KR-b

Hellir-d, Haukar-c, SA-c, SR-b gætu verið líklegust til að falla með öllum fyrirvörum.

4. deild

Þrátt fyrir að fjölgað hafi í 3. deild upp í 16 lið eru engu að síður 26 lið skráð til leiks í fjórðu deild en voru 32 í fyrra.   Miðað við þetta er sveitum enn að fjölgað.   Nýjar sveitir eru að taka þátt fyrsta skipti og má þar nefna Æsi (eldri borgarar), Kórdrengina, sem ég kann engin deili á, og Skákfélag Íslands undir forystu Kristjáns Arnar.

Sjálfsagt eiga einhverjar sveitir eftir að detta þarna út en e.t.v. aðrar eftir að koma í staðinn.   B-sveit Goðans gæti verið sterk, sem og Æsir einnig Austfirðingar, b-sveit Fjölnis, b-sveit  Víkinga og svo Skákfélagið hans Kristjáns.

Ég ætla að spá Skákfélagi Íslands sigri en allt annað er í þoku og spáin hér að neðan að mestu leyti til málamynda.

4. deild (spá um efstu sæti):

• 1. SFÍ
• 2. Víkingar-b
• 3. Goðinn-b
• 4. Austurland
• 5. Fjölnir-b

Að lokum

Að sjálfsögðu vil ég setja við þetta hefðbundin fyrirvara.   Þessi spá er aðeins sett inn til gamans og bakvið hana eru engin geimvísindi.   Ég hef lítið verið heima síðustu daga og hef því minni upplýsingar um liðin en oft áður auk þess sem forráðamenn félaganna halda spilunum býsna þétt að sér.

Enn stefnir í metþátttöku svo keppnin blómstrar því sem aldrei fyrr.

Undirritaður er liðsmaður í b-sveit Hellis og ritstjóri Skák.is.

Gunnar Björnsson

Bolvíkingar höfðu sigur á spennandi Íslandsmóti skákfélaga

Taflfélag Bolungarvíkur varði titil sinn á Íslandsmóti skákfélaga í fjörugri og skemmtilegri keppni sem fram fór í Rimaskóla um helgina.   Keppnin nú minnti á gamla daga þar sem margir erlendir meistarar og kærumál settu svip á keppnina.   Taflfélag Reykjavíkur lét fjarveru margra sinna sterkustu manna hafa lítil áhrif á sig og tók bronsið.    Akureyringar sigruðu í 2. deild, Mátar í þeirri þriðju og Víkingaklúbburinn í þeirri fjórðu.  Jæja, þá er komið að enn einni yfirferðinni um Íslandsmót skákfélaga.
  

Það fór ekki framhjá þeim sem eru í framvarðasveit íslensks skáklífs að spennan lá í loftinu í aðdraganda keppninnar og á mótsdegi lá það fyrir að Bolvíkingar myndu ekki láta það ótalið ef Dreev myndi tefla  með Eyjamönnum.  Dreev var ekki skráður í TV í félagaskrá sem lögð var fram í upphafi keppninnar, heldur í Fjölni, en Eyjamenn veifuðu þess í stað pappír þar sem fram kom staðfesting Fjölnis á félagaskiptum Dreev.  Það breytti þó ekki því mati bæði mótsstjórnar og síðar Dómtóls SÍ að þar sem hann væri ekki skráður á félagaskrá TV í upphafi móts þá væri hann ólöglegur. Í skáklögum SÍ segir að segir að aðeins þeir sem séu á félagaskrá við upphaf móts teljist löglegir með viðkomandi félagi í Íslandsmótinu og því var dæmt tap á Eyjamenn í öllum tefldum skákum Dreev.    

Skáksambandið hefur verið gagnrýnt í málinu en því hefur ósjaldan verið haldið fram síðustu mánuði að hjá SÍ skorti fagmennsku!    Stjórn SÍ skipar reyndar mótsstjórn en að öðru leyti átti SÍ engu aðkomu að þessu né öðrum kærumálum.  Aðalfundur SÍ skipar dómstólinn.   Í þessum báðum nefndum eru miklir afbragðsmenn, reyndir lögmenn og skákdómarar og þrautreyndir félagsmálamenn og í báðum tilfellum var niðurstaðan samþykkt samhljóða og mér finnst það til fyrirmyndar bæði hjá mótsstjórn og dómstólnum hversu fljótt úrskurðir féllu enda mikilvægt að niðurstaða lægi fyrir sem fyrst.  

Stjórn SÍ ákvað síðasta haust að hefja vinnu til að búa til félagagagnagrunn þar sem meðlimir í íslenskum taflfélögum verða skráðir í.  Félagagrunnurinn verður væntanlega birtur í sumar og þar geta menn aðeins verið skráðir í eitt félag.  Aðeins þeir sem eru í þeim grunni geta teflt með viðkomandi félagi á Íslandsmóti skákfélaga og er það einlæg von mín að slíkt muni koma í veg fyrir að óljóst sé í hvaða félagi menn eru en slíkur vafi hefur verið allt algengur og t.d. kom fram í frumvinnu að Stuart Conquest væri skráður í fjögur taflfélög.   Einnig eru nöfn á félagaskrám félaganna sem ég dreg í efa að eitthvað sé á bak við og t.d. eru Kasparov og Carlsen á félagaskrá íslensks taflfélags sem og Wang-arnir frá Kína.  

En nóg um kærumálum.   Snúum okkur að sjálfu aðalatriðinu, baráttunni á sjálfu skákborðinu!  

Ritstjóri spáði Bolvíkingum sigri bæði fyrir fyrri og síðari hluta og reyndist þar sannspár.   Bolvíkingar fengu 39½ vinning, þremur meira en Eyjamenn og þótt töp hefðu ekki verið dæmd á Dreev hefðu Bolar engu að síður sigrað, þá reyndar með einum vinningi.   Ótrúleg úrslit gegn Helli 7½-½ reyndust Bolvíkingum drjúg en samtals fengu Bolar 15½ vinning í 16 skákum gegn Hellissveitum.  

Eyjamenn lentu í öðru sæti.    Sveitin náði nokkrum frábærum úrslitum og má þar nefna sigur gegn Helli og sigur gegn Bolum 4½-3½ sem reyndar var skráð 4-4 eftir kærumál.    Sú viðureign var afar spennandi og það var óvenjulegt að sjá reynda stórmeistara gera þar mikil mistök.  Jóhann Hjartarson lék illa af sér jafntefli í tap gegn Maze og Helgi Ólafsson samdi jafntefli með unna stöðu gegn Miezis.  Miezis benti Helga á það eftir skákina og skömmu síðar mátti sjá Helga mjög einbeittan við laust borð ekki kátan með þá uppgötvun að Lettinn hafi haft rétt fyrir sér.

Einhvern veginn ætlar það að verða lögmál Eyjamanna að lenda í öðru sæti en ef ég þekki þá rétt, hafa þeir ekki sagt sitt síðasta orð.

Taflfélag Reykjavíkur var sú sveit sem kom mest á óvart.  Í síðari hlutann vantaði sterka menn eins og Ivanov, Arnar og Sigurð Daða en jálkarnir sem þess í stað voru inná stóðu sig afbragðsvel og þar spilaði inn í góð úrslit gegn Helli 4-4.    Ég sagði fyrir seinni hlutann að TR-ingar gætu náð verðlaunasæti á góðum degi en góðu dagarnir í síðari hlutanum reyndust reyndar tveir!

Sveit Hauka og Hellis komu hnífjafnar í mark í 4.-5. sæti.  Jafnmargir vinningar, jafnmörg stig og jafntefli í innbyrðis viðureign.  Haukar unnu Bolvíkinga 5½-2½ en Hellismenn töpuðu ½-7½.     Báðar sveitirnar misstu lykilmenn sveitanna, Henrik og Hannes, á EM einstaklinga í Króatíu, og Hellismenn aðeins með 2ja daga fyrirvara.  Það breytir þó ekki þó þeirri staðreynd að Hellismenn hefðu átt að gera miklu betur og munu án efa ekki sætta sig við að verða áhorfendur að toppbaráttunni að ári.

Fjölnismenn urðu sjöttu en það var nokkuð fyrirséð fyrir síðari hlutann.   B-sveitir Hellis og Hauka féllu með miklum myndarbragð, þó reyndar hefði munað miklu á þeim innbyrðis.

Skemmtileg barátta í fyrstu deildinni, dramatík, kærur,  læti og snjóboltakast en einhverjir prakkarar grýttu tvívegis inn snjóbolta í skáksalinn.  Í fyrra tilfellinu lenti hann á borði Baklan og Braga Halldórssyni og þeyttust mennirnir út um allt.   Í seinna tilfellinu lenti snjóboltinn víst á Helga Ólafssyni.

Ritstjóri var nokkuð sannspár að því undanskyldu að TR-ingar komu verulega á óvart.   

Lokastaðan:

Nr.	Spá (fh)	Spá (sh)	Lið	Vinn.
1	1	1	Bolungarvík	39½
2	2	2	TV	36½
3	5	5	TR	32½
4-5	6	3	Haukar	31½ (8 stig)
4-5	3	4	Hellir-a	31½ (8 stig)
6	6	6	Fjölnir	27
7	7	7	Hellir-b	19
8	8	8	Haukar-b	6½

 

2. deild

Skákfélag Akureyrar vann mjög öruggan sigur í 2. deild, en sveitin fékk 7½ vinningi meira en næsta sveit, KR-ingar.   Áskell Örn og Gylfi Þórhallsson tefldu nú í fyrsta skipti í 2. deild en það stóð ekki lengi!  KR-ingar hömpuðu öðru sætinu og sveitin teflir því í fyrsta skipti í 1. deild í haust.  Í fyrsta skipti í mjög langan tíma verða átta félög í fyrstu deild að ári og ef einhvern tímann er gott tækifæri til að breyta reglum með b-lið í 1. deild er það núna. 

B-sveit Bolvíkinga gekk illa í fyrri hlutanum og góður endasprettur dugði skammt þótt bronsið næðist.   Ritstjóri hefur heyrt að fyrsta borðs maður, b-sveitar Bolvíkinga, Stefán Kristjánsson, hafi sett sér það markmið að komast í a-liðið á næsta keppnistímabili.    Guðmundur Gíslason lenti í því að vekjaraklukka í GSM-síma hans fór í gang í miðri skák gegn Hallgerði Helgu í c-sveit Hellis og var honum því dæmt tap.

Reyknesingar og b-sveit TR komu í næstu sætum en síðarnefnda sveitin leið fyrir veikingu a-liðsins.    Akurnesingar unnu fallbaráttuna og Taflfélag Garðabæjar og c-sveit Hellis fara niður í 3. deild.   Þetta er væntanlega í fyrsta skipti í sögunni að TG á hvorki  sveit í 1. né 2. deild.  

Það er reyndar merkilegt að í 2. deild verða lið frá átta félögum rétt eins og þeirri efstu. 

Ritstjóri var þokkalega sannspár fyrir síðari hlutann.  Ég reyndar spáði TR-b þriðja sæti og auk þess hélt að TG myndi halda sæti sínu í 2. deild.  

Lokastaðan:

Nr.	Spá (fh)	Spá (sh)	Lið	Vinn.
1	2	1	SA	33
2	4	2	KR	25½
3	1	4	Bolungarvík-b	23½
4	5	5	SR	22½
5	3	3	TR-b	22
6	7	7	TA	15½
7	6	6	TG	13½
8	8	8	Hellir-c	12½

 

3. deild

Brottfluttu Akureyringarnir í Taflfélaginu Mátum unnu öruggan sigur í 3. deild og verður það að teljast gráglettni örlaganna að sveit Máta verði eini fulltrúi Garðabæjar í efstu tveimur deildunum að ári en félagið heldur reglulegar æfingar í bæjarfélaginu. 

Selfyssingar urðu í 2. sæti og kom það öllum á óvart ekki síst þeim sjálfum.   Í síðustu umferð gerðist það að Haukar-c mættu aðeins með 2 skákmenn gegn Selfyssingum en slíkt á auðvitað ekki að gerast nema í undantekningartilfellum að stillt sé upp auðum borðum.   Haukum til afsökunar þá veit ég að þeir gerðu sitt allra besta til að manna sveitir en margir Haukamenn áttu ekki heimangengt í ár.  

Selfyssingar voru aðeins í sjötta sæti fyrir seinni hlutann og Gunnar Finnlaugsson hafði átt það að orði við mig að þeir stefndu að því að bjarga sér frá falli.   En epískur endasprettureins og segir á heimasíðu SSON tryggði þeim sæti í 2. deild eftir aðeins eins árs fjarveru .    Það voru stoltir Selfyssingar stoltur Selfyssingur sem tóku tók við silfrinu í mótslok eins og sjá má í mynd!  B-sveit Akureyringa varð í þriðja sætinu og hreppti bronsið.

D-sveit Hellis sigraði í fallbaráttunni og því verður það hlutskipti b-sveitar TG og c-sveitar Hauka að falla niður í 4. deild.

Það er því fyrst í 3. deild að sama félagið á tvær sveitir en Hellismenn hafa þar bæði c- og d-sveit. 

Ritstjóri var nokkuð sannspár fyrir síðari hlutann um 3. deild ef við undanskiljum Selfyssinga sem eins og áður sagði komu öllum á óvart og sjálfum sér mest.   

Lokastaðan:

Nr.	Spá (fh)	Spá (sh)	Lið	Vinn.
1	2	1	Mátar	31
2	4	5	Selfoss	25
3	3	3	SA-b	24½
4	5	2	TR-c	23
5	1	4	Bolungarvík-c	20
6	8	7	Hellir-d	18½
7	6	6	TG-b	15
8	7	8	Haukar-c	11

 

4. deild

 

Spennan í fjórðu deild var einnig mögnuð.  Þar hafði Víkingaklúbburinn sigur en efstu sveitirnar voru í miklum hnapp.  B-sveit TV varð í öðru sæti og b-sveit KR í því þriðja.  Góð frammistaða c-sveitar TV vekur óneitanlega athygli og undirstrikar hversu gott skákstarf er unnið í Eyjum. 

Ef það verður niðurstaðan að fjölgað verði upp í 16 lið í 3. deild munu auk ofangreindra liða Goðverjar, Vinverjar, b-sveit SR og c-sveit SA fá sæti í fjölmennri 3. deild.  

Mér skilst að nokkuð hafi verið um auð borð í fjórðu deild og gerir Hermann formaður Goðans það að umtalsefni í pistli sínum á heimasíðu Goðans.    Margir liðsstjórar hafa teygt sig langt til að hafa mörg lið og á bakvið það liggur góð hugsun ein, það er að gefa sem flestum tækifæri á að tefla.  E.t.v. gæti það verið skynsamlegra fyrir liðsstjóra að teygja sig minna í þá átt þótt mér þætti það sorglegt ef sveitum fækki.

Ritstjóri var óvenjusannspár fyrir síðari hlutann en iðulega hefur spá ritstjóra verið útí Tóta munk í fjórðu deild.  

Lokastaða efstu sveita:

Nr.	Spá (fh)	Spá (sh)	Lið	Vinn.
1	2	1	Víkingaklúbburinn	29½
2	1	3	TV-b	28½
3	3	2	KR-b	28
4			TV-c	27½
5	6	4	Goðinn	26
6			Vin	25
7			SR-b	24½ (10 st)
8	5		SA-c	24½ (9 st)

 

Að lokum

Skemmtilegt lokahóf var haldið í húsnæði SÍ og Billiardbarnum í Faxafeninu um kvöldið.  Að þessu sinni var engin 2007-stíll á hófinu enda ljóst að SÍ þarf að halda betur um budduna nú en áður.   Og eins og stefnt var að voru öll dýrin í skóginum vinir!

Eitt afar fyndið atvik átti sér stað á barnum.  Sigurður Páll Steindórsson telur sig vera að spjalla við Mikhail Ivanov og spjölluðu þeir lengi saman á ensku.  Siggi Palli spyr um Íslandsmót skákfélaga og verður þar nokkuð undrandi þegar viðmælandi hans segist hafa teflt allar skákirnar en Ivanov tefldi ekkert.   Kemur þar í ljós að „Ivanov" var í þessu tilfelli enginn annar en Guðmundur Halldórsson.  Sjálfsagt hefði verið betra fyrir þá félagana á spjalla saman á íslensku!

Mikilli skáktörn er lokið og það var nokkuð þreyttur forseti  en sæll með dagsverkin sem vaknaði á sunnudeginum og var dreginn í heimilisstörfin enda styttist í fermingu örverpisins.  

Og þá fer maður að spekúlera.  Almennt er ég ekki hrifinn af því að breyta miklu á Íslandsmóti skákfélaga því af hverju á að laga eitthvað sem gengur svona vel en samt er maður uppfullur að hugmyndum hvernig megi gera góða keppni jafnvel enn betri.  

Oft hefur verið í umræðunni að b-sveitir í efstu deild séu hvimleiðar.   Ég sjálfur hef verið frekar andsnúinn því en ef einhvern tímann er rétti tíminn fyrir slíkar breytingar er hann núna því engin b-sveit á lið í efstu deild í haust.   Til að búa til spennumóment fyrir b-liðin mætti e.t.v. búa til „Íslandsmót" b-liða og veita efsta b-liðinu jafnvel bikar.  Í 2. deild verða nú 4 b-lið (Hellir, Haukar, Bolar og TR) og yrði þessi leið að veruleika gæti það gerst að lið í 5. og 6. sæti kæmust í fyrstu deild að ári!

Það hefur verið umræða um að gera þurfi eitthvað varðandi fjórðu deildina.  Hún sé farin að virka sem flöskuháls og þar séu allt af margar sveitir og erfitt sé fyrir sveitir að komast upp.  Til umræðu hefur verið sú hugmynd að fjölga liðum í 16 í 3. deild.  Ég hef líka heyrt efasemdarraddir um það og þau rök að það sé verið án „dángreida" þriðju deildina með því að hafa ekki allir við alla.   Að mínu mati er nauðsynlegt að tillaga komi fram á aðalfundi og málin séu þar rædd, hvort sem að niðurstaðan verði óbreytt ástand, 16 liða 3. deild, fimmta deild eða eitthvað allt annað.  

Hugsanlega gætu verið aðrir möguleikar.   Það gæti verið leið að  fjölga einfaldlega í sveitum í neðri deildum upp í átta.   Það myndi sjálfkrafa þýða færri sveitir þar sem sveitum frá fjölmennari taflfélögum myndu fækka.  Gallinn er bersýnilega sá að þetta myndi mögulega verið erfiðleikum háð fyrir minni félög að stilla upp átta manna sveitum og það má ekki verða niðurstaðan að minni félög hætti að senda sveitir.   Lausnin gæti verið að byrja á því að fjölga upp í átta í 2. deild og sjá hvernig það reynist áður (og ef!) fjölgað verði í sveitum í neðri deildum.  

En þetta eru bara spekúlasjónir.   Kannski er bara best að hafa allt eins og það er núna!  Væ fix itt iff itt eint bróken.  

Skák- og skákáhugamönnum um allt land þakka ég fyrir skemmtilega helgi og er þegar farinn að hlakka til haustsins.

Gunnar Björnsson

Afar spennandi síðari hluti Íslandsmóts skákfélaga

Keppnin nú gæti verið afar spennandi þar sem úrslitin gætu ráðist á síðustu metrunum í Rimaskóla um helgina.   Eyjamenn eru efstir en ritstjóri spáir engu að síður Bolvíkingar muni hafi sigur.  Uppgjör sveitanna fer fram og þá mætast einnig hinir fornu fjendur TR og Hellir.   Óvenjulegt að sú viðureign sé ekki aðaleign dagsins! 

Staðan í fyrstu deild:

• 1.       TV 20,5 v.
• 2.       Bolungarvík 20 v.
• 3.       Haukar-a 19,5 v.
• 4.       Hellir-a 19 v.
• 5.       TR 17,5 v.
• 6.       Fjölnir 14,5 v.
• 7.       Hellir-b  11,5 v.
• 8.       Haukar-b 5,5 v.

Með Bolvíkingum tefla  3 erlendir sterkir meistarar, Baklan, Kuzubov og Miezis.  Auk þeirra eru í liðinu Jóhann og Jón L. og svo böns af sterkum íslenskum alþjóðlegum meisturum.

Með liði Eyjamanna tefla Dreev, Nataf, Maze og Grandelius og svo Helgi Ólafsson.    Munurinn á sveitunum felst fyrst og fremst í neðstu borðunum þar sem Bolvíkingar eru óneitanlega sterkari.

Bolvíkingar og Eyjamenn munu að mati ritstjóra berjast um gullið og sá barátta getur orðið hörð og vonandi mjög spennandi og ræðst vonandi á hvítum og svörtum reitum.   Í kvöld mætast sveitirnar og eftir það gætu línur skýrst.  

Haukar, Hellir og TR berjast að mati ritstjóra um bronsið.   Með Haukum teflir a.m.k Kveynis af erlendum meisturum, Hellismenn stilla upp innlendu stórmeistaralausu liði þar sem lykilmaðurinn sveitarinnar Hannes Hlífar Stefánsson, teflir á EM einstaklinga sem hefst á morgun í Rijeka í Króatíu eftir að MP banki ákvað að styrkja til farinnar eftir frábæra frammistöðu hans á MP Reykjavíkurskákmótinu.   Björn Þorfinnsson mun því fara fyrir sveit Hellis í ár og stefnir víst að því að gera betur en í fyrri hlutanum.  

Af keppendum í TR á Reykjavíkurskákmótinu verður Ivanov á landinu um helgina en TR-sveitin stóð mjög vel í fyrri hlutanum og gæti hæglega náð verðlaunasæti á góðum degi.  

Fjölnismenn sem hafa Héðin Steingrímsson á fyrsta borði sigla lygnan sjó og lenda líkast til í sjötta sæti. 

Það verður hlutskipti b-sveita Hellis og Hauka að falla.  Á því liggur enginn vafi.  

Spá ritstjóra

• 1.       Bolungarvík
• 2.       TV
• 3.       Haukar
• 4.       Hellir-a
• 5.       TR
• 6.       Fjölnir
• 7.       Hellir-b
• 8.       Haukar-b

 

2. deild

Staðan:

• 1.       SA 18,5 v.
• 2.       TR-b 16,5 v.
• 3.       KR 14,5 v.
• 4.       SR 13 v.
• 5.       Bolvíkingar-b 10 v.
• 6.       TA 8,5 v.
• 7.       TG 8,5 v.
• 8.       Hellir-c 6,5 v.

Hér er spennan mikil.  Með Akureyringum tefla Danirnir Bromann og  Carstensen og tel ég þá líklegasta til sigurs.  Ég spái að KR-ingum með Lenderman á fyrsta borði fylgi þeim upp.  TR-c og jafnvel Bolvíkingar gætu blandað sér í toppbaráttuna þar sem b-lið Bolvíkinga verður væntanlega ofursterkt í seinni hlutanum.    

Hellir-c, TG og TA berjast um að halda sér uppi og ætla ég að spá því Garðbæingar haldi velli.

Spá ritstjóra:

• 1.       SA
• 2.       KR
• 3.       TR-b
• 4.       Bolvíkingar
• 5.       SR
• 6.       TG
• 7.       TA
• 8.       Hellir-c

 

3. deild

Staðan:

• 1.       Mátar 19 v.
• 2.       TR-c  16,5 v.
• 3.       SA-b 14 v.
• 4.       Selfoss 11,5 v.
• 5.       Bolungarvík-c 10.5 v.
• 6.       TG-b 9 v.
• 7.       Hellir-d 8,5 v.
• 8.       Haukar-c 7 v.

Hér tel ég að Mátar og TR-c fari upp.  Akureyringar  gætu blandað sér í þá baráttu.   Þrjú lið berjast um fallsætið og þar ætla ég enn á ný að spá að Garðbæingar haldi velli.

Spáin:

• 1.       Mátar
• 2.       TR-c
• 3.       SA-b
• 4.       Bolungarvík-c
• 5.       Selfoss
• 6.       TG-b
• 7.       Hellir-d
• 8.       Haukar-c

4. deild

Staða efstu liða:

• 1.       Víkingar 17½ v.
• 2.       Goðinn 17 v.
• 3.       KR-b 17 v.
• 4.       Víkingar-b 17 v.
• 5.       Austurland 17 v.
• 6.       TV-b 16½ v.
• 7.       SR-b 16 v.
• 8.       Vin 15 v.

Fjórða deildin er hrikalega jöfn og spennandi .  Ég spái Víkingum sigri en hvaða sveit fylgir þeim upp erfitt að spá    Þær koma Goðverjar, KR-ingar og Eyjamenn t.d. til greina.

Einnig eru nokkrar líkur á því að fyrirkomulagi 3. deildar verði breytt á ári og ekki loku fyrir það skotið að sveitum í deildinni verði fjölgað.   Það þýðir mögulega að fleiri sæti en tvö  í 4. deild gefi sæti í 3. deild að ári.  Það ræðst á næsta aðalfundi.

Spá ritstjóra:

• 1.       Víkingar
• 2.       KR-b
• 3.       TV-b
• 4.       Goðinn
• 5.       Austurland

 

Að lokum

Ég biðst afsökunar á hversu seint pistillinn er á ferðinni.    Sem betur fer hefur nóg verið að gera í skákheiminum og því minni tími fyrir pistlaskrif!  Og því miður er stundum vinnan að þvælast fyrir skákinni.

Ég vil sem fyrr ítreka að spáin hefur fyrst og fremst skemmtigildi og ekki liggja á bakvið spána nein geimvísindi!  Bannað er að móðgast!

Eftir vel heppnað MP Reykjavíkurskákmót vonast ritstjóri einnig eftir el heppnuðu Íslandsmóti skákfélaga og á laugardagskvöld verði allir glaðir ( misglaðir eðlilega) og geri sér glaðan dag í saman í lokahófi mótsins sem fram fer í Faxafeninu (SÍ-megin) .   Öll viljum við jú skákinni vel!

Gens Una Sumus!

Gunnar Björnsson

Höfundur er ritstjóri Skák.is, forseti SÍ, liðsstjóri b-sveitar Hellis og bankastarfsmaður. 

 

Eyjamenn á toppnum

Þrátt fyrir Eyjar séu neðstar á íslenska landakortinu gildir ekki hið sama á Íslandsmóti skákfélaga.  Ýmislegt kom á óvart á óvart í fyrri hluta Íslandsmóti skákfélaga.  Eyjamenn eru jú efstir en fyrirfram áttu flestir von á því að Bolvíkingar yrðu í þeim sporum.   Haukamenn eru í þriðja sæti eftir góða frammistöðu en þar stóð sigur þeirra gegn Bolvíkingum hæst.    Sigur Jorge Fonseca á Jóhanni Hjartarsyni vakti óneitanlega athygli en um er að ræða ein óvæntustu einstöku úrslit sem ég minnist hérlendis   Aðeins munar 1½ vinningi á sveitunum 1.-4. sæti en þar raða sér Eyjamenn, Bolar, Haukar og Hellisbúar.  Sveitirnar eiga allar svipað prógramm og því getur allt gerst.  

Alls konar óvæntir hlutir gerðust í fyrstu deild.  TR-ingar unnu Eyjamenn í fyrstu umferð, Eyjamenn unnu stórsigur á Hellismönnum, 5½-2½, og Haukamenn tók Bolvíkinga í bakaríið í lokaumferðinni og unnu 5½-2½. 

Eyjamenn geta unað glaðir við sitt, eru efstir og náðu fram hefndum fyrir beiskan ósigur fyrir Helli fyrir þremur árum síðan.  Sveitin byrjaði ekki vel og náði slökum úrslitum gegn TR í fyrstu umferð og þótti sumum það tap fá full mikla athygli í fjölmiðlum.  Eyjamenn munu án efa styrkja sig fyrir átökin í vor og yrði ég hissa ef þeir kæmu ekki með fjóra erlenda stórmeistara þá.     

Bolvíkingar ollu töluverðum vonbrigðum.   Fyrirfram var félagið talið langlíkast til sigurs og sá sem þetta ritar átti von á því að úrslitin gætu verið ráðin eftir fyrri hluta.  Svo er alls ekki.  Ef til vill háði það Bolvíkingum að margir þeirra hafi teflt mikið undanfarið.   Sama á reyndar við Hellismenn sem sumir tefldu undir getu.  Þegar Bolvíkingar fengu við sig alþjóðlegu meistarana í fyrra var það yfirlýst markmið að ná fram öflugu og öguðu liði sem myndi ávallt setja skákina í fyrsta sæti.    Óvænt forföll í fjórðu umferð gætu reynst félaginu dýrkeypt í síðari hlutanum.

Þess fyrir utan tel ég Bolvíkinga hafa gert ein stór mistök.  Þeir fluttu hingað til landsins Mikhail Ivanov sem var ætlað að tefla með þeim í keppninni.   Í ljós kom svo að Ivanov var á félagaskrá TR og þá eftirlétu Bolvíkingar hann til TR.  Það tel ég hafa verið mistök.   Þú styrkir ekki „andstæðinginn" að gamni þínu. Frekar en að leyfa Ivanov að tefla með TR hefðu Bolvíkingar átt að láta hann horfa á eða í jafnvel tefla allar viðureignir nema gegn sjálfum sér en til að gera málið enn grátlegra fyrir Bolanna sem þegar höfðu lagt út fyrir dýru flugi fyrir Rússann gerði hann sér lítið fyrir og vann Bolvíkinginn Miezis á fyrsta borði í viðureign félaganna! Bolvíkingar borguðu semsagt undir mann til landsins sem tók svo af þeim punkt!

Haukamenn eru í þriðja sæti og geta unað mjög glaðir við sitt.  Haukamenn fá nú færifæri sem þeir lengi langað til að vera í.  Félagið hefur sigurmöguleika og munu væntanlega koma dýrvitlausir til leiks í síðari hlutanum með styrkt lið og gætu verið til alls líklegir en félagið hefur mætt öllum hinum liðunum í toppbaráttunni.  

Hellismenn eru í fjórða sæti og ekki geta ekki vel við unað.  Eftir tapið gegn Eyjamönnum héldu Hellismenn einfaldlega að þeir væru úr leik en sér til mikillar til undrunar þegar þeir rýndu í mótstöfluna er það alls ekki svo!  Hellir er eina liðið af fjórum efstu sem á eftir að mæta b-sveit Hauka sem er áberandi lakasta sveitin og svo eftir að mæta TR og Bolum.    Illa gekk á 2. og 3. borði og styrki félagið sig á efstur borðum getur sveitin vel hampað titlinum.

TR-ingar eru í fimmta sæti og geta mjög vel við unað.  Félagið hafði orðið fyrir miklu áföllum þegar Hannes, Þröstur og Stefán hættu í félaginu.  Aldrei þessu vant voru TR-ingar vel mannaðir nema helst gegn Helli-b en þar töpuðust líka 3 vinningar sem gæti reynst dýrt þegar uppi er staðið.  TR-ingar geta vart gert sér von um Íslandsmeistaratitilinn til þess þarf of mikið að að ganga upp.  Ef mjög vel gengur í síðari hlutanum gæti hugsanlega silfur eða brons komið í hús.  Ein sætasti sigur TR-inga var svo sigur Hrafns Loftssonar á bróður sínum Arnaldi, Helli-b, en öllum að óvörum varð um að ræða mikla tímahraksskák.  

Fjölnismenn eru í sjötta sæti.  Gullið er runnið þeim úr greipum og líkur á silfri og brons gæti náðst en þá þarf mikið að ganga upp.  Ágætlega gekk á efri borðunum en ver á þeim neðri en Fjölnismenn þurfa að stilla upp sterkari sveit á neðri boðrum ætli þeir að blanda sér í baráttu um gullið.  

B-sveitir Hellis og Hauka eru fallnar eins og vitað var fyrirfram. Hellismenn eru reyndar „bara" þremur vinningum á eftir Fjölni en sveitin á eftir að mæta þremur efstu sveitunum. B-sveit Hauka er enn fallnari en getur samt bærilega vel við unað, aldrei verið eggjaðir (fengið 0 vinninga) eins og Hellismenn í fyrstu umferð auk þess sem Jorge Fonseca vann jú Jóhann Hjartarson!

Staðan (spá ritstjora í sviga):

Röð	Lið	Vinn	Stig
1 (2)	TV a	20,5	6
2 (1)	Bolungarvík a	20	6
3 (6)	Haukar a	19,5	5
4 (3)	Hellir a	19	5
5 (5)	TR a	17,5	6
6 (4)	Fjölnir a	14,5	2
7 (7)	Hellir b	11,5	2
8 (8)	Haukar b	5,5	0

Í síðari hlutanum er ljóst að flest liðin komi sterkari til leiks og ljóst að erlendir stórmeistarar verða á hverju strái.   Á þessu augnabliki þykir mér sem fyrr líklegast að Bolvíkingar enda auðveldast fyrir þá að styrkja sig.   Þeir hafa marga sterka erlenda stórmeistara á félagaskrá og eiga því auðvelt með að styrkja liðið og kreppan virðist ekki hafa bitið jafn mikið á TB og mörg önnur félög.  Liðið hefur jafnframt sterkustu Íslendinganna.  Að öðru leyti þykir mér ekki ólíklegt að fyrri spá rætist nema að ég spái því að Haukar og Fjölnir skipti á 4. og 6. sæti.  Um þetta set ég þó alla fyrirvara og ætla ekki að lofa að ég spái eins og í aðdraganda síðari hlutans þegar meiri upplýsingar um mönnum liðanna liggur fyrir.  

Váááááá, hvað þetta getur orðið spennandi í vor!

 

2. deild

 

Skákfélag Akureyrar er að gera góða hluti í 2. deild og fátt bendir til annars en að sveitin tefli aftur í 1. deild að ári.  Gylfi Þórhallsson, sem er sennilega sá skákmaður sem teflt hefur flestar skákir allra í sögu mótsins, og Áskell Örn Kárason upplifðu það í fyrsta skipti að tefla í 2. deild en Skákfélag Akureyrar hefur alla tíð teflt í fyrstu deild þar til nú.  B-sveit TR er önnur og er í harðri baráttu um að fylgja Akureyringum upp í fyrstu deild við KR-inga og jafnvel Reyknesinga.   TR-ingar hafa tveggja vinninga forskot á KR-inga en á móti kemur að KR-ingar eiga eftir að tefla við tvær neðstu sveitirnar.  

Bolvíkingar sem ég spáði sigri eru aðeins í fimmta sæti og ekki líklegir til stóra afreka.  Þó er líklegt ef sveitin styrkir sig í 1. deild að b-sveitin verði miklu mun sterkari en það er ólíklegt að sveitin nái 6½ vinningum á TR-b til að krækja í 1. deildarsæti.  Margt bendir fall Hellis-c en benda má þó á að með henni tefla skákmenn á uppleið sem gætu verið 50-100 stigum sterkari í vor en núna.   Í fallbaráttunni eru einnig Skagamenn og Garðbæingar og aðeins eitt þessara liða mun bjarga sér.  Önnur deildin hefur aldrei verið sterkari en nú.

Staðan:

Röð	Lið	Vinn	Stig
1 (2)	SA a	18,5	6
2 (3)	TR b	16,5	7
3 (4)	KR a	14,5	7
4 (5)	SR a	13,0	4
5 (1)	Bolungarvík b	10,0	2
6 (7)	TA	8,5	3
7 (6)	TG a	8,5	2
8 (8)	Hellir c	6,5	1

 

Spá ritstjóra virðist vera nokkuð góð að stöðu Bolvíkinga undanskyldri sem ég hef gjörsamlega ofmetið.

3. deild

 

Taflfélagið Mátar, sem hefur aðsetur í Garðabæ, en er félag brottfluttra Akureyringa er efst og eru á leiðinni upp. Enginn vafi á því enda sveit yfirmáta sterk í samanburði við aðrar í deildinni.    C-sveit TR og b-sveit SA berjast um hitt sætið í 2. deild að ári.  TR-ingar hafa þar 2½ vinnings forskot en eiga eftir að mæta öllum sterkustu sveitunum.   Hér er því allt galopið  

C-sveit Hauka og d-sveit Hellis eru í fallsætunum en stutt er í b-sveit Garðbæinga.  Þessi þrjú leið berjast um að halda sér uppi og sú fallbarátta gæti orðið hörð en liðin í botnbaráttunni eiga mikið eftir að mætast.  Selfyssingar gætu jafnval dregist niður í fallbaráttuna en þeir eiga eftir að mæta sterkum sveitum í síðari hluanum

Staðan:

 

Röð	Lið	Vinn	Stig
1 (2)	Mátar	19,0	8
2 (5)	TR c	16,5	7
3 (3)	SA b	14,0	6
4 (4)	Selfoss a	11,5	4
5 (1)	Bolungarvík c	10,5	3
6 (6)	TG b	9,0	2
7 (8)	Hellir d	8,5	1
8 (7)	Haukar c	7,0	1

Spáin er nokkuð nærri lagi nema að því undanskyldu að ég spái Bolvíkingum allt og góðu gengi.  Hér gildir það sama og í 2. deild.  Bolvíkingar gætu orðið mun sterkari í síðari hlutanum en mér sýnist það sé of seint til að koma sveitinni upp.  

4. deild

Alls konar óvæntir hlutir hafa gerst í fjórðu deild en ég spáði b-sveit Taflfélags Vestmanneyja sigri rétt eins og fyrra.  Í fyrra reyndust þær upplýsingar byggjast á óskhyggjunni einni saman.  Víkingaklúbburinn virðist vera líklegastur til árangur og b-sveit KR-inga er einnig líkleg til árangurs.   B-sveit Eyjamanna er svo sem skammt undan en aðeins munar 1½ vinningi á liðunum í 1. og 7. sæti.  Þarna getur allt gerst!

Staða efstu liða:

Röð	Lið	Vinn	Stig
1 (2)	Víkingakl. a	17,5	6
2 (6)	Goðinn a	17,0	8
3 (3)	KR b	17,0	8
4	Víkingakl. b	17,0	7
5	Austurland	17,0	5
6 (1)	TV b	16,5	6
7	SR b	16,0	6
8	Sf. Vinjar	15,0	5
9	KR c	14,0	6
10	UMSB	14,0	5
11	Siglufjörður	14,0	4
12	KR d	14,0	4

 

Ég virðist hafa ofmetið c-sveit SA og d-sveit Bolvíkinga en að öðru sæti gæti spáin allt eins ræst enda lítilll munur á milli sveita.  B-sveit Víkingana hefur þó allrækilega slegið í gegn og minnstu munaði að hún væri efst eftir seinni hlutann.  Gæti orðið hrikalega spennandi deild.

Skákfélagið Ósk vakti mikla athygli en um er að ræða að ég best fyrstu hreinræktuðu kvennasveitina sem tekur þátt í Íslandsmóti skákfélaga.  Einnig var gaman að sjá Skákfélagið Vin taka þátt.  Frábært starf sem Arnar Valgeirsson hefur þar unnið.  

Að lokum

Skemmtilegum fyrri hluta er lokið og sjaldan hefur spennan verið meiri.  Fjögur lið geta hæglega blandað sér í baráttuna um dolluna.  

Ég vil nota tækifæri á að þakka öllum þeim sem komu að mótshaldinu kærlega fyrir.  Skákstjórunum Ólafi S. Ásgrímsson, Braga Kristjánssyni, Ara Friðfinnssyni, Hermanni Aðalsteinssyni, Haraldi Baldurssyni og Ríkharði Sveinsson þakka ég góð störf, Eyjólfi Ármannssyni fyrir innslátt úrslita, Olgu fyrir innslátt úrslita og Páli Sigurðssyni fyrir að aðstoða hana.   Helgi Árnason fær svo þakkir fyrir góðan aðbúnað í Rimaskóla og Ásdís Bragadóttir framkvæmdastjóri fyrir gott utanumhald. 

Myndavélasmiðirnir, Helgi Árnason, sem tók langflestar myndirnar, Einar S. Einarsson, Hermann Aðalsteinsson og Smári Rafn Teitsson fá einnig þakkir.   

RÚV gerði mótinu ágæt skil á sunnudagskvöldið og höfðu þá viðtal við undirritaðan.  Ég var spurður hvort skákmenn væru nördar og neitaði ég því.  Í dag hef ég tvívegis verið sakaður um að skrökva í sjónvarpið!  Ég fer hins vegar ekki að því að svo er ekki.  Við skákmenn erum ekki nördar! Hafi eitthvað komið illa út í sjónvarpinu vil ég benda á að oft er haft rangt eftir forsetum.   

Gunnar Björnsson

Höfundur er skákmaður, ritstjóri og forseti.  Ekki nörd, alls ekki!

• Heimasíða SÍ
• Chess-Results
• Myndir
• Pistill og spá ritstjóra um úrslit 

You Ain´t seen Nothing Yet!

Íslandsmót skákfélaga fer fram um helgina.  Undirritaður er fullur tilhlökkunar enda hér á ferðinni langskemmtilegasta skákkeppni hvers ár.  Eins og venjulega stefnir í metþátttöku en nú er 32 lið skráð til leiks í fjórðu deild sem er fjölgun um tvö.  Nýtt félag tekur þátt í fyrsta sinn, kvennaklúbburinn ÓSK.   Ritstjórinn er auk þess afar hamingjusamur með það að vera ekki lengur umdeildasti ritstjórinn á landinu.

Í fyrstu deild stefnir allt í góðan sigur Bola Víkara.  Í fyrra sló félagið í gegn þegar það studdi myndarlega við unga og efnilega skákmenn og veitti þeim stuðning til að leggja skákina fyrir sig.   Víkarar stóðu auk þess fyrir vel skipulögðum landsliðsflokki og í vikunni héldu Bolvíkingar alþjóðlegt mót og sem gekk vel þar sem Róbert Lagermann náði sínum lokaáfanga að alþjóðlegum meistaratitli.

Félagið hefur sem fyrr haldið á þeirri braut að styðja unga skákmenn þrátt fyrir einhverja stefnubreytingu þegar félagið fékk til lið við sig „gamlar" kempur eins og Jóhann Hjartarson frá Helli og Þröst Þórhallsson frá TR.   Liðsskipan Víkara meðal íslenskra skákmanna minnir helst á lið TR hér í denn þegar félagið hafði það mikla yfirburði að félagið tefldi fram tveimur sveitum (SA-sveit og NV-sveit) og iðulegu enduðu sveitirnar í  1. og 2. sæti.    Maður bíður eftir því að félagsmönnum verður skipt upp í sveitir eftir því hvar þeir búi í ......................Bolungarvík .  Með Víkurum teflir svo lettneski stórmeistarinn Miezis eins og svo oft áður en Víkarar stilla aðeins upp einum erlendum stórmeistara nú í ár en það ætti að duga til sigurs.  

Ritstjóri spáir Eyjamönnum öðru sæti.    Samkvæmt mínum heimildum tefla með Eyjamönnum frönsku stórmeistararnir Maze og Nataf og þýski stórmeistarinn Hoffman.  Og svo Helgi Ólafsson.  Ekkert lið stillir upp fleiri stórmeisturum en Eyjamenn en liðið er ekki jafnsterkt á neðri borðunum eins og t.d Bolvíkingar og Hellismenn og því tel ég annað sætið þeirra.   Undirritaður brá sér til Eyja síðustu helgi og skemmti sér vel.  Eyjamenn stóðu að miklum myndarskap fyrir NM barnaskólasveita og hafa lagt nýjan staðal hvernig staðið fyrir slíkum mótum.    Annað sætið til Eyja!

Ritstjóri spáir Hellismönnum þriðja sætinu en félagið hefur nær undantekningarlaust lent í 1. eða 2. sæti síðasta áratuginn eða svo.  Hellismenn misstu Jóhann Hjartarson en endurheimtu Hannes Hlífar eftir tveggja ára útlegð í TR.  Allir fjórir meistaratitlar Hellis unnust með Hannes á fyrsta borði sem hefur ætíð reynst liðinu vel og Hellismenn því himinlifandi yfir því að endurheimta þennan sigursæla meistara.    A-sveit Hellis verður reyndar að ég held eina íslenska sveitin í 1. deild sem stillir eingöngu upp íslenskum ríkisborgurum en erlendir ríkisborgarar þótt búsettir eru á Íslandi tefla með b-sveitum Hellis og Hauka.  Lið Hellis samanstendur að Hannesi, Birni Þorfinnssyni og svo FIDE-meisturum.  Róbert Lagerman mun án efa koma sterkur inn eftir frábæra frammistöðu á Víkara-mótinu.   Hellismenn eru veikari á efri borðunum en  margar aðrar sveitir en sterkari á neðri borðum en allar aðrar sveitir að Víkurum undanskyldum og það mun reynast þeim drjúgt.  Þriðja sætið til Hellisbúa!

Erfitt er að spá um liðin í 4.-6. sæti.  Þar berjast væntanlega TR, Haukar og Fjölnismenn.  Um síðastnefnda liðið hefur ritstjórinn nánast ekkert hlerað annað en að Héðinn Steingrímsson teflir með þeim auk þess sem Davíð Kjartansson kemur til landsins frá Sviss til að tefla.     

Ég geri ráð fyrir að Fjölnismenn stilli upp til viðbótar 2-3 erlendum meisturum og ætla að spá þeim fjórða sæti.

Haukamenn munu víst vera veikari en oft áður og töluvert um forföll.   Kveynzis kemur ekki en sjálfsagt stilla þeir upp 2-3 erlendum meisturunum.  Auk þess sem sjálfur Íslandsmeistarinn Henrik Danielsen teflir væntanlega á fyrsta borði.  

TR-ingar fengu óvæntan liðsauka þegar Ivanov gekk til liðs við þá þegar í ljós kom að fyrirætlanir Víkara að nota hann runnu út í sandinn þegar í ljós kom að hann nánast borinn og barnfæddur TR-ingur.  Ivanov teflir því með TR.  Með TR teflir einnig svo alþjóðlegi meistarinn Arnar Gunnarsson, Snorri Bergsson og Sigurðarnir Daði og Páll sem báðir gengu nýlega til liðs við félagið eftir mislanga útlegð í Helli og KR.  Á móti kemur að félagið hefur misst Hannes Hlífar, Þröst og Stefán Kristjánsson.  Það hefur oft verið vandamál hjá TR að fá sína sterkustu menn til að tefla en mér skilst að svo verði ekki núna.

Ég get nánast kastað upp teningi eins og spá í lokastöðu þessara sveita.  Ég ætla þó að láta vaða að Fjölnir taki fjórða, TR það fimmta og Haukar það sjötta. 

Lítið þarf að fjalla um botnbaráttuna.  Það verður hlutverk b-liða Hellis og Hauka sem býður þess að falla.  Hellismenn ættu þó að vera sterkari.

Svo gæti þetta allt farið á hvolf breytist liðsskipan félaganna mikið t.d. í síðari hlutanum!

Spá ritstjóra:

• 1. Bolungarvík
• 2. TV
• 3. Hellir-a
• 4. Fjölnir
• 5. TR
• 6. Haukar-a
• 7. Hellir-b
• 8. Haukar-b

 

2. deild

Önnur deildin er oft sú deild sem erfiðast er að spá um.  Ég spái að B-lið Víkara fari upp en sveitin vann sig upp úr 3. deild í fyrra með fáheyrðum yfirburðum.  Vandi er að segja um hvaða sveit fylgir þeim upp en mér finnst að fallliðin úr 1. deild frá í fyrra muni um það berjast.  Spái Akureyringum annað sæti og TR-b því þriðja.  KR-ingar taki fjórða sæti en ekki má vanmeta þá komi þeir með sterka skákmenn að utan eins og veit að stóð til.  Reyknesingum spái ég fimmta sæti og Garðbæingum því sjötta.  

C-lið Hellis slapp með naumindum á hálfum vinningi við fall í fyrra og bíður erfitt hlutskipi.  Þá sveit munu skipa ungir og efnilegir skákmenn sem eru á mikilli siglingu og sveitin því alls ekki dauðadæmd fyrirfram og gæti komið á óvart.  Ég tel þó líklegast að hún falli og að Skagamenn fylgi henni niður en þeir komu upp úr 3. deild í fyrra.

Spá ritstjóra:

• 1. Bolvíkingar-b
• 2. SA
• 3. TR-b
• 4. KR
• 5. SR
• 6. TG
• 7. TA
• 8. Hellir-c

3. deild

Það er yfirleitt enn erfiðara að spá í spilin í þriðju deild.  Úr 2. deild í fyrra féllu naumlega b-sveit SA og Selfyssingar og þær sveitir eru báðar líklegar til afreka.  C-sveit TR endaði í 3. sæti í fyrra, tapaði 2. deildarsæti mjög naumlega.  Úr 4. deild komu Mátar og c-sveit Víkara.  Ég tel báðar þeir sveitir einnig líklegar í toppbaráttuna.   Ég spái Víkurum sigri og þar með að sigur hjá þeim vinnist í 1.-3. deild.   Ég spái að baráttan um annað sæti verði á milli b-sveit SA og vinafélagsins í Mátum úr Garðabæ.  Akureyringar hagnast á því að a-sveitin féll (ekki það að það sé jákvætt fyrir félagið) þar sem nú tefla 6 í a-sveitinni í stað 8 áður og þar með styrkist b-sveitin.   Ég ætla að spá Garðbæingum öðru sæti og Akureyringum þeim þriðja en..........set þó við þá meiri fyrirvara en íslenska ríkisstjórnin vildi setja í upphafi við IceSave-samninginn.  

Fallbaráttan gæti staðið á milli Hellis-d, Hauka-d og TG-b.  Spái H-liðunum niður og þar með að sveitir Hellis falli úr öllum deildum.  

Spá ritstjóra:

• 1. Bolungarvík-c
• 2. Mátar
• 3. SA-b
• 4. Selfoss
• 5. TR-c
• 6. TG-b
• 7. Haukar-c
• 8. Hellir-d

 

4. deild

Það eru minni líkur að giska á rétt úrslit í fjórðu deild en að sömu tölurnar komi tvisvar upp í röð í búlgarska lottóinu.   Ég held að b-sveit Eyjamanna hljóti nú að komast upp og ég tel að Víkingaklúbburinn fylgi þeim upp.  Þarna eru þó margar sterkar sveitir eins og SA-c, KR-b, Bolungarvík-d og Goðinn sem hefur styrkt sig mikið frá í fyrra.  

Spá ritstjóra:

• 1. TV-b
• 2. Víkingaklúbburinn
• 3. KR-b
• 4. Bolungarvík-d
• 5. SA-c
• 6. Goðinn

Að lokum

Keppnin nú er sú fyrsta eftir að kreppan skall yfir okkur.  Hún hefur bersýnilega töluverð áhrif enda sýnist mér á öllu að töluvert minna verði nú um erlenda skákmenn en áður.  Á móti kemur að mér sýnist að skákáhugi sé á uppleið.  Á flest mót í haust hefur keppendum fjölgað frá fyrri árum og sem fyrr er metþátttaka á Íslandsmóti skákfélaga.  

Það sem gerir Íslandsmót skákfélaga jafn skemmtilega keppni og raun ber vitni að þarna tefla allir.  Stórmeistarar, börn, gamalmenni, konur og kallar.   Þarna sér maður öll gömlu andlitin sem sum hver maður sér bara tvisvar á ári. 

Gallinn er sá að nánast enginn vill vera skákstjóri.  Skákstjórar eru því eins og svo oft áður í færri  kantinum og bið ég keppendur að sína því skilning þótt ekki séu skákstjórar alltaf til taks þegar í stað. 

Eyjólfur Ármannsson ætlar að slá inn valdar skákir og búið er að ráða manneskju sem ætlar að skrá inn einstaklingsúrslit í öllum deildum sem er vel.   Engin bein útsending verður enda hvort eð er allir á staðnum!

Svo nokkur praktísk atriði.

Teflt er í Rimaskóla.  Tímamörk eru 1½ klst. á alla skákina auk ½ mínútu á hvern leik.  Fyrsta umferð hefst kl. 20 á föstudag, önnur kl. 11 á laugardag, þriðja kl. 17 á laugardag og svo fjórða kl. 11 á sunnudag.

Skákstjórar hafa ákveðið að eftir ½ klukkustund verði dæmt tap séu menn ekki mættir.  

Einnig hefur ákveðið að enginn viðureign megi hefjast fyrr en búið sé að skrá liðin á viðkomandi eyðublað.  Það er gert þar sem oft hefur misbrestur á því að liðin séu skráð.  Dæmi eru einnig um að liðsstjórar hafi tekið með eyðublöðin heim og allt verið í steik á meðan af þeim er leitað!   Einnig eru liðsstjórar hvattir til að skila inn liðsskipan síns liðs til skákstjóra í upphafi móts til að auðvelda innslátt úrslita.  

Spáin nú er til gamans og enginn má taka hana of alvarlega.  Á bak við hana eru engin geimvísandi heldur miklu frekar tilfinning ritstjóra sem býsna oft hefur þó reynst sannspár.  Eins og kollegi minn á Bessastöðum segir þegar eitthvað er hermt eftir honum.  „Ég var misskilinn".  

Gunnar Björnsson

Höfundur er ritstjóri Skák.is, forseti SÍ og teflir með b-sveit Hellis á Íslandsmóti skákfélaga.