Gríðarleg spenna á Íslandsmóti skákfélaga - fjögur lið berjast um titilinn

Það er óhætt að segja að spennan á Íslandsmóti skákfélaga sé gríðarleg.  Fjögur lið berjast um Íslandsmeistaratitilinn.  Bolvíkingar, Víkingar, TR-ingar og Eyjamenn.   Öll fjögur liðin eiga áþekka andstæðinga eftir.  Staða Bolvíkinga er að mati ritstjóra sterkust en ekki má vanmeta möguleika Víkingaklúbbsins og TR-inga.  Líkur Eyjamanna eru minnstar og þeirra einu möguleikar felast í því að ná afar hagstæðum úrslitum í síðari hlutanum.  Það var gaman að sjá sterka skákmenn eins og Margeir Pétursson og Friðrik Ólafsson tefla á Íslandsmóti skákfélaga og mótið virðist sífellt verða sterkara og skemmtilegra ár frá ári.

Það er alltaf ákveðin þjóðhátíðarstemning þegar Íslandsmót skákfélaga fer fram.  Mótið er eins konar ættarmót skákmanna.  Þarna koma allir saman.  Erlendir ofurstórmeistarar, sterkustu íslensku skákmennirnir, gamlar skákkempur, skákkonur, ung skákefni og síðast en ekki síst þeir skákmenn sem eingöngu tefla á  Íslandsmóti skákfélaga.  Stemningin í kringum mótið hefur aukist ár frá ári og þess vegna hafa menn e.t.v. verið dálítið skeptískir á viðamiklar breytingar á keppninni.   Mótsstaðurinn er fínn og aðstoðin sem SÍ fær frá Rimskælingum við uppsetningu og niðursetningu á salnum auðveldar allt mótshaldið.

Það breytir ekki þeirri skoðun minni að nýta beri hina erlendu gesti betur en nú er og auðveldasta leiðin til þess sé að fjölga í 10 lið í efstu deild og gera hana að áfangamóti.  Sú breyting hefur ekki áhrif á neðri deildir og breytir því litlu fyrir hinn almenna skákmann.   Aukaumferðirnar færu fram hvorn fimmtudaginn.  Þau lið sem eru í fyrstu deild ættu ekki að eiga í neinum vandræðum með að manna þessir tvær auka umferðir enda öll með mikinn mannskap.   Kostnaðurinn við þessa breytingu er miklu minni en að fjölga í þrjár helgar sem og að halda sér alþjóðlegt mót í kringum Íslandsmótið .

Samkvæmt lauslegri rannsókn minni tefldu 18 erlendir titilhafar í keppninni núna.  Þeir tefldu 19 skákir innbyrðis en 36 skákir við innlenda skákmenn. Ef við gefum okkur að hver erlendur titilhafi kosti að meðaltali 200.000 kr. fyrir fyrri hlutann þýðir það að hver skák íslensks skákmanns við erlendan titilhafa á Íslandsmóti skákfélaga kostaði nú að meðaltali um 100.000 kr. Tvær viðbótarumferðir lækka meðalkostnaðinn umtalsvert auk þess sem íslenskir titilveiðarar fá gott tækifæri á að krækja sér í áfanga.

Mikil leyndarhyggja var í kringum mótið og gekk meira að segja svo langt að það voru gefnar út rangar upplýsingar.  Sum liðin reyndu að halda þétt að sér hverjir skipuðu liðin þótt reyndar hefði það allt lekið út á síðustu metrunum.  Í síðari hlutanum verður þó leyndarhyggjan ekki í boði því félögin þurfa að gefa upp hvaða erlendu skákmenn tefla jafnframt í Reykjavíkurskákmótinu sem sannarlega nýtur góðs af þessari miklu samkeppni ofurklúbbanna .

En snúum okkur að sjálfu mótinu.  

Staðan (spá í sviga):

• 1 (1) TB 22½ v.
• 2 (2) Víkingaklúbburinn 22 v.
• 3 (4) TR 21½ v.
• 4 (3) TV 20½ v.
• 5 (5) GM 17 v.
• 6 (6) Hellir 13 v.
• 7 (7) SA 7 v.
• 8 (8) TB-b 4½ v.

Sem sagt algjörlega í samræmi við spá ritstjóra að TR og TV undanskyldu. 

Ritstjóri spáði Bolvíkingum sigri fyrir mótið og hefur á engan hátt skipt um skoðun.  Fyrir mót nefndi ég tortryggni margra gagnvart b-sveitum en Bolar gerðu sitt besta til að útrýma þeirri tortryggni.  Þeir töpuðu nú „aðeins"  ½-7½ fyrir a-sveitinni þar sem formaðurinn Guðmundur Daðason fór fyrir sínum mönnum og gerði jafntefli við Jón Viktor.  Og til að leggja áherslu á að þetta tap væri ekki tilviljun töpuðu b-sveitarmenn, þá orðnir meira að segja betur skipaðir, fyrir Hellismönnum með sama mun í 2. umferð! 

Bolvíkingar hafa 22½ vinning, hafa ½ vinnings forskot á Víkinga.  Þeir eiga eftir að mæta TR, GM og Helli í lokaumferðunum þremur.  Bragi Þorfinnsson var bestur Bola með 3½ vinning.  Virðist vera í miklu formi þessa dagana, hækkar jafnt og þétt á stigum og lagði m.a.  að velli Björn bróður sinn og nálgast 2500 skákstigin sem óð fluga.  Jóhann Hjartarson hlaut 2½ vinning í 3 skákum.

Víkingaklúbburinn hefur 22 vinninga. Þeir töpuðu fyrir TR og gerðu jafntefli við Bola.  Þeir eiga eftir að mæta TV, GM og SA í lokaumferðunum.  Það er líklegt að Víkingar munu ekki vinna keppnina á jöfnu heldur verða þeir líklega að vera fyrir ofan aðrar sveitir á vinningum.  

Það var sérstakt að horfa á Víkinga tefla við Bola.  Þar tefldu fjórir útlendingar á fjórum efstu borðunum fyrir bæði lið.  Á fimmta borði tefldu svo þeir skákmenn sem oftast hafa leitt íslenska ólympíuliðið ásamt Friðriki Ólafssyni, þeir Jóhann Hjartarson og Hannes Hlífar.  Í liði Víkinga voru þrír Pólverjar og í liði Bola voru þrír Úkraínumenn.  Því miður bauð borðaröðin ekki á upp „landskeppni" á milli Úkraínu og Pólverja.  Pavel Eljanov, fyrsta borðs maður Víkinga tefldi við tvo landa sína í keppninni en TR-ingar voru þriðja liðið sem stillti upp Úkraínumanni á fyrsta borði.  Það voru sem sagt fleiri Úkraínumenn á fyrsta borði en Íslendingar en Hellir var eina taflfélagið sem stillti upp Íslendingi sem fremsta manni. Stefán Kristjánsson hlaut fullt hús á sjötta borði, lagði m.a. þá Jón L. Árnason og Karl Þorsteins að velli.  Stefán hefur náð ótrúlegum árangri á Íslandsmóti skákfélaga, hefur aðeins tapað niður 1½ vinningi síðustu fjögur ár.  Í þokkabót vinna nánast undantekningalaust þau lið sem Stefán er í Íslandsmót skákfélaga. Þannig að sú tölfræði er með Víkingum!

TR-ingar eru í þriðja sæti með 21½ vinning. TR hafði langeftirtektarverðasta liðið.  Þeir stilltu upp fjórum erlendum meisturum og svo fjórum sterkum innlendum meisturum sem hafa ekki verið þekktir fyrir þátttöku á kappskákmóum síðustu ár nema þá helst Friðrik Ólafsson sem er að halda í skákvíking á næstu mánuðum.  Það var einkar gaman að sjá Friðrik og Margeir Pétursson.  Sá síðarnefndi hefur ekki teflt á kappskákmóti síðan 2004 en hefur teflt svolítið í Lliv í Úkraínu þar sem hann er búsettur.  Friðrik vann mjög góðan sigur á Magnúsi Erni Úlfarssyni í fyrsta umferð.  Margeir varð fyrir barðinu á Vodafone-gambítinum í 4. umferð gegn Magnúsi Teitssyni þegar sími hans hringdi þegar skákin var tiltölulega nýlega komin í gang. 

Erlendu keppendurnir hjá TR  stóðu sig afar vel en Karl Þorsteins stóð sig best íslensku fulltrúanna í TR en hann fékk 3 vinninga í 4 skákum. TR-ingar eiga eftir að tefla við Bola a- og b og Hellismenn í lokaumferðunum og eiga því að mörgu leyti eftir léttasta prógrammið.  Spurning hvort að æfingaleysi íslensku skákmannanna geti þó háð þeim í lokaátökunum en sigurmöguleikar verða þó að teljast allgóðir og hefðu ekki komið fyrir slysatöp hefði staða þeirra getað verið jafnvel enn betri.

Eyjamenn eru í 4. sæti með 20½ vinning og eru í lökustu stöðu toppliðanna.  Rétt eins og hin toppliðin stilltu þeir upp fjórum erlendum skákmeisturum.  Töp gegn Bolum og TR þýða það að þeir verða ávallt að verða einir efstir að vinningum til að eiga sigurmöguleika.  Þeir eiga eftir að mæta Víkingum, GM og b-sveit Bola í lokaátökum.  Möguleiki þeirra byggist á að slátra slakari sveitunum og ná svo mjög góðum úrslitum gegn Víkingum.  Henrik Danielsen stóð sig best Eyjapeyja en hann hlaut 3½ vinning í 4 skákum.

Goðar-Mátar sigla lygnan sjó um miðja deild með 17 vinninga.  Hafa hvorki möguleika á verðlaunasæti né að falla.  Þeir voru aðeins með einn erlendan skákmann, Gawain Jones.   Í lið þeirra vantaði Helga Áss Grétarsson, sem hafði ætlað sér að tefla, en forfallaðist.  Þröstur Þórhallsson var seigur, hlaut 3 vinninga í 4 skákum á öðru borði, skilar yfirleitt sínu.  GM-ar stóðu sig reyndar næstverst allra sveita miðað við skákstig en þeir töpuðu samtals 23 skákstigum. 

Hellismenn eru í sjötta sæti með 13 vinninga og fóru langleiðina með að bjarga sér frá falli. Ræður þar mestu sigurinn gegn b-sveit Bola.  Enginn Hellismaður hlaut meira en 2 vinninga en það breytir því ekki  að Hellir er sú sveit sem stóð sig næstbest miðað við skákstig en sveitarmeðlimir hækka samtals um 18 skákstig.  Lenka Ptácníková hlaut 2 vinninga í 3 skákum og Hjörvar Steinn fékk 2 af 4 á fyrsta borði.

Akureyringar eru í sjöunda sæti  með 7 vinninga og eru langleiðina komnir niður í 2. deild.  Eina von þeirra um að halda sér uppi felst í því að ná góðum úrslitum gegn Hellismönnum í síðari hlutanum og slátra svo b-Bolum.  Halldór Brynjar Halldórsson stóð sig best Akureyringa en hann hlaut 50% vinninga á 4. borði, vann Arnar E. Gunnarsson og gerði jafntefli við Stelios Halkias.  Þrátt fyrir fáa vinninga voru það Akureyringar sem stóðu sig best allra miðað við skákstig en stig þeirra hækka um samtals 20 stig.  Reyndar renna 19 af þeim í vasann á Halldóri Brynjari!

B-sveit Bolvíkinga er neðst með 4 vinninga og aðeins kraftaverk getur bjargað þeim frá falli.  Guðmundur Daðason var þeirra bestur en hann hlaut 1½ vinning í 3 skákum og það gegn verulega sterkum skákmönnum, þ.e. vann Björn Þorfinnsson og gerði jafntefli við Jón Viktor Gunnarsson.  B-Bolar náðu sér ekki á strik og töpuðu samtals 32 stigum í fyrri hlutanum.

Ég tel enga ástæðu til að breyta spánni minni.  Ég tel Bolvíkinga sem fyrr líklegasta til sigurs.  En keppnin getur orðið hrikalega spennandi í byrjun mars í Hörpu.

2. deild

Önnur deildin er mjög spennandi rétt eins og sú fyrsta.  B-sveit GM leiðir með 16 vinninga, b-sveit TR er í 2. sæti með 15½ vinning og Fjölnismenn og b-sveit Eyjamanna eru jafnir í 3.-4. sæti með 13 vinninga.  Margt bendir til fjölgun b-sveita í fyrstu deild að ári um eina.  B-sveit Hellis, TG og Reyknesingar virðast vera í mestri fallhættu en þessar sveitir eiga allar eftir að keppa innbyrðis og því gætu aðrar sveitir eins og Haukar og jafnvel Fjölnir blandast í þá baráttu en þær báðar eiga eftir töluvert erfiðari dagskrá.

Staðan (spá í sviga)

• 1. (1) GM-b 16 v.
• 2. (3) TR-b 15½ v.
• 3.-4. (5)Fjölnir 13 v.
• 3.-4. (2) TV-b 13 v.
• 5. (7) Haukar 11½ v.
• 6. (6) Hellir-b 9½ v.
• 7. (4) TG 9 v.
• 8. (8) SR 8½ v.

3. deild

B-sveit Víkingaklúbbsins leiðir í 3. deild með 7 stig en í 3. og 4. deild gildir stigakerfi (Match-Point).   Þeir verðast að teljast langsigurstranglegastir.  Vinverjar, Akurnesingar, b-sveit Akureyringa og SFÍ hafa svo 6 stig.  Hvaða sveit fylgir þeim upp er ómögulegt að spá fyrir um.  Það er athyglisvert að sex efstu liðin eru nákvæmlega þau sömu og ritstjóri spáði sex efstu sætunum, reyndar ekki í sömu röð.

Staðan í 3. deild (spá ritstjóra í sviga - aðeins spáð fyrir topp 8)

• 1. (1) Víkingaklúbburinn-b 7 stig
• 2. (4) Vin 6 stig (17 v.)
• 3. (6)TA 6 stig (14½ v.)
• 4. (5)SA-b 6 stig (14 v.)
• 5. (3) SFÍ 6 stig 6 stig (13 v.)
• 6. (2) KR 5 stig
• 7. Hellir-c 4 stig
• 8. SSON 4 stig
• 9. SAUST 4 stig
• 10. TR-c 4 stig
• 11. KR-b 4 stig
• 12. (7) GM-c 2 stig
• 13. Sauðárkrókur 2 stig
• 14. (8) TV-c 2 stig
• 15. TG-b 2 stig
• 16. GM-d 0 stig

4. deild

Það var vitað fyrirfram að Briddsarar væru líklegastir til sigurs og hafa þegar tekið forystu.  Fimm lið hafa svo sex stig og erfitt að spá hvaða lið fylgja þeim upp.  Spá ritstjóra er algjörlega út í Tóta munk. 

Staðan í 4. deild (spá ritstjóra í sviga - aðeins spáð fyrir topp 5)

• 1. (1) Briddsfjelagið 7 stig
• 2. SA-c 6 stig (16½ v.)
• 3. Hellir-d 6 stig (15½ v.)
• 4. UMSB 6 stig (15½ v.)
• 5. (2) Víkingaklúbburinn-c 6 stig (14½ v.)
• 6. SR 6 stig (14 v.)
• 7. TV-d 5 stig
• 8. (4) SSON-b 4 stig
• 9. TR-d 4 stig
• 10. TR ung-a 4 stig
• 11. Siglugjörður 4 stig
• 12. (5) Fjölnir-b 4 stig
• 13. Haukar ung 3 stig
• 14. Hellir ung 2 stig
• 15. (3) Vin-b 2 stig
• 16. TR ung-b 2 stig
• 17. TG-c 1 stig
• 18. Fjölnir c 0 stig

Að lokum

Rétt er að þakka öllum þeim sem unnu við mótið.  Að öðrum ólöstuðum á Ásdís Bragadóttir mestar þakkar skyldar en hún hefur haldið utan um mótið af miklum myndarbrag.   Skákstjórar og félög sem lögðu fram skákstjóra eiga einnig þakkir skyldir.  Hrafnhildur (Habba) sló svo inn úrslit af miklum móð og það er ánægjulegt þróun fyrir skákmenn að geta séð öll einstaklingsúrslit fljótt og vel.  Rimskælingar undir forystu Helga skólastjóra og Skarphéðins húsvörðs fá sem og miklar þakkir fyrir alla þeira aðstoð.

Afar skemmtilegum og líflegum fyrri hluta Íslandsmóts skákfélaga er lokið.  Og ekki stefnir í minna spennandi síðari hluta.  Þá verður mikil hátíð í febrúar - mars sem hefst með NM í skólaskák í febrúar og líkur svo með Íslandsmótinu.  Í millitíðinni verður landskeppni við Kína og Reykjavíkurskákmót.

Gunnar Björnsson

Sterkasta Íslandsmót skákfélaga sögunnar hefst um helgina

Um 30 stórmeistarar taka þátt í Íslandsmóti skákfélaga en fyrri hlutinn fer fram um helgina í Rimaskóla.  Undirrituðum sýnist að hér sé um að ræða metfjölda stórmeistara á móti innanlands en samkvæmt lauslegri rannsókn hafa þeir flestir verið á Reykjavíkurskákmótinu 2006 eða 28 talsins.  Og samkvæmt heimildum mínum tefla allir íslensku stórmeistararnir um helgina nema Guðmundur Sigurjónsson og Héðinn Steingrímsson.  Þetta verður því í fyrsta sinn um langt árabil að „fjórmenningarnir" svokölluðu; Jóhann, Helgi, Margeir og Jón L. tefla á sama kappskákmóti. 

Þrjú lið berjast væntanlega um titilinn; Taflfélag Bolungarvíkur, Víkingaklúbburinn og Taflfélag Vestmannaeyja.  Öll þessi lið stilla upp fjórum erlendum skákmönnum samkvæmt mínum heimildum og það gerir reyndar Taflfélag Reykjavíkur væntanlega einnig sé litið til síðustu ára. Goðinn/Mátar og SA hafa 1-2 erlenda keppendur og Hellir einn.

Ég spái því að Íslandsmeistarar síðustu fjögurra ára, Taflfélag Bolungarvíkur, vinni titilinn í fimmta sinn í röð.  Víkingaklúbburinn og Eyjamenn eru hins vegar til alls líklegir og satt best að segja met ég líkurnar ca. svona:  TB (40%), Víkingar (30%), TV (20%) og aðrir (10%).  Ég spái Bolvíkingum einfaldlega sigri vegna þess að þeir hafa söguna og hefðina með sér og hafa sennilega bestu íslensku skákmennina innan borðs, þó í sjálfu sér muni þar ekki svo miklu á milli þeirra og Víkinga og Eyjamanna.

GoðMátar og TR-ingar hafa einnig einhverja vinningsmöguleika.  GoðMátar standa vel að því að þeir fá veikar sveitir í fyrri hlutanum og gætu því verið í góðri stöðu eftir fyrri hlutann og mætt mun sterkari til leiks í síðari hlutann.  Árangur TR veltur að miklu leyti á því hversu margar skákir hinir sterku íslensku skákmenn þeirra tefla.

Fallbaráttan er á milli þriggja liða.  B-sveit Bolungarvíkur, Skákfélags Akureyrar og Taflfélagsins Hellis.  Bolvíkingar hafa misst nokkra menn sem þýðir að b-sveitin verður veikari en oft áður.  Hellismenn hafa misst marga góða menn og hafa tekið þá ákvörðun að styrkja ekki liðið með erlendum meisturum heldur byggja á eigin innlendum mannskap og nýta frekar fjármuni félagsins í grunnstarfsemi félagsins.  SA hefur lengi farið langt áfram á liðsheildinni og liðsmenn þess náð töluvert betri árangri en stig gera ráð fyrir. Mér sýnist á öllu að þessar 3 sveitir séu svipaðar að styrkleika og fallbaráttan geti verið hörð.

Bolvíkingar eru eina sveitin sem hefur b-sveit í fyrstu deild í ár.  B-sveitir fara fyrir brjóstið á mörgum og það er mín skoðun að þær eigi ekki að geta teflt í 1. deild, sérstaklega ef selja á heitið á Íslandsmóti skákfélaga til styrktaraðila.  B-sveitir getað kallað fram tortryggni eins og gerðist í fyrra þegar b-sveit Bolvíkinga var einmitt veikust í fyrstu umferð þegar hún mætti eigin a-sveit og tapaði svo 0-8.   

En nóg um útúrdúra.  Hér kemur spáin fyrir fyrstu deild:

1. TB-a
2. Víkingaklúbburinn
3. TV
4. TR
5. Goðinn-Mátar
6. Hellir
7. SA
8. TB-b

2. deild

Eins og venjulega er erfitt að spá í 2. deildina.  Þar geri ég ráð fyrir sterkum b-sveitum Máta og Eyja og satt best að segja finnst mér þær tvær sveitir líklegastar til sigurs í deildinni.  Það er því margt sem bendir til þess að b-sveitum fjölgi í 1. deild að ári í tvær eða jafnvel þrjár ef Bolvíkingar halda sér uppi.  Önnur deildin er ekki jafn sterk og í fyrra þegar Víkingar og Goðamenn fóru mikinn.  Nýju sveitirnar í deildinni eru ekki jafn sterkar. 

Erfitt er að átta sig á fallbaráttunni.  Mér sýnist satt best að segja að allar hinar sveitirnar geti fallið nema þá helst b-sveit TR sem ég spái 3. sæti.  Eftir margar útstrikanir setti ég fallsætin á Hauka og Reyknesinga en set við það alla hefðbundna og óhefðbundna fyrirvara og bendi á að TG, Fjölnir og Hellir geti allt eins fallið.

1. Goðinn/Mátar-b
2. TV-b
3. TR-b
4. TG
5. Fjölnir
6. Hellir-b
7. Haukar
8. SR

3. deild

Sextán lið keppa í 3. deild.  Þar tel ég b-sveit Víkinga langlíkasta til sigurs.  Hvaða félag fylgir þeim upp í 2. deild er mun erfiðara um að segja.  Það gætu verið KR-ingar, Akurnesingar, Vinverjar, Selfyssingar ,Skákfélag Íslands eða b-sveit Akureyringa. Ég ætla að spá að KR-ingar með hinn „endurreista" liðsstjóra Einar S. Einarsson fylgi Víkingum upp.

Ég spái aðeins fyrir um átta efstu sætin.

1. Víkingaklúbburinn-b
2. KR-a
3. SFÍ
4. Vin
5. SA-b
6. TA
7. Goðinn/Mátar-c
8. TV-c

4. deild

Hér er sama saga og venjulega.  Mjög erfitt að spá í spilin enda hef ég afskaplega takmarkaðar upplýsingar um liðin.  Ætla að spá Briddsurum sigri og c-lið Víkinga sem og b-lið Vinjar fylgi þeim upp en þetta er byggt á afar takmarkaðri vitneskju um styrkleika liðanna.

Spái aðeins um 5 efstu liðin:

1. Briddsfjelagið
2. Víkingar-c
3. Vin-b
4. SSON-b
5. Fjölnir-b

Að lokum

Ég sannarlega vonast eftir drengilegri og skemmtilegri keppni.

Og ítreka að þessi spá er aðeins til gamans og enginn á að taka henni of alvarlega.  Lífið er of skemmtilegt til að láta eina spá og lítinn pistil fara of mikið í taugarnar á sér.

Góða skemmtun um helgina!

Gunnar Björnsson

Höfundur teflir með b-sveit Hellis um helgina

Skákhátíð að hefjast!

Síðari hluti Íslandsmóts skákfélaga fer fram um helgina.  Eyjamenn leiða fyrir síðari hlutann en Bolvíkingar eru engu að síður sigurstranglegastir.   Íslandsmót skákfélaga markar upphafið af mikilli skákhátíð í Reykjavík sem nær hámarki með MP Reykjavíkurskákmótinu sem fram fer 9.-16. mars í Ráðhúsi Reykjavíkur. 

1. deild

Staðan (spá fyrir fyrri hlutann í sviga):

• 1. (1) TV 25 v.
• 2. (2) TB 23½ v.
• 3. (3) Hellir 22 v.
• 4. (4) TR  17½ v.
• 5. (5)Fjölnir 14½ v.
• 6. (7) SA 12 v.
• 7. (8) Haukar 8 v.
• 8. (6) KR 5½ v.

Eyjamenn hafa 1,5 vinnings forskot á Bolvíkinga en engu að síður er það mat ritstjóra að staða Bolvíkinga sé best.  Þeir eiga auðveldara prógramm eftir en Eyjamenn og eru með sterkasta liðið með sex stórmeistara innanborðs sem hefur sennilega ekki gerst síðan Hrókurinn var og hét.   Hellismenn eru þriðju og eina von þeirra felst í því að ná góðum úrslitum gegn Eyjamönnum í 5. umferð og hreinsa í 6. og 7. umferð.  Í lokaumferðinni mætast Eyjamenn og Bolvíkingar og þá gætu úrslitin ráðist.  Og vonandi fáum við dramatík!

Eyjamenn eiga því eftir erfiðustu dagskrána en fyrir utan hið toppliðin tvö eiga þeir eftir Hauka.  Bolvíkingar eiga einnig eftir að mæta Haukum en auk þess eiga þeir eftir að tefla við TR-inga sem eru sýnd veiði en ekki gefin eins og þeir sýndu með frábærum endaspretti í fyrra.   Hellismenn eiga eftir að mæta KR og SA auk Eyjamanna.

Ofangreind félög eru langsterkust og munu hirða verðlaunasætin þrjú.   TR, Fjölnir sigla um miðja deild og sennilega Akureyringar einnig. 

Ritstjóri telur að Haukar og KR falli.  

Spá ritstjóra:

• 1. TB
• 2. TV
• 3. Hellir
• 4. TR
• 5. Fjölnir
• 6. SA
• 7. KR
• 8. Haukar

2. deild

Staðan:

• 1. (2) Mátar 20 v.
• 2. (1) TB-b 18½ v.
• 3. (4) TR-b 15 v.
• 4. (3) Hellir-b 14 v.
• 5. (5) SR 12 v.
• 6. (6) TA 8½ v.
• 7. (8) SSON 5 v.
• 8. (7) Haukar-b 3 v.

Styrkleiki Bolvíkinga í 1. deild veldur því að b-sveit þeirra í 2. deild er sennilega sterkari en flestar sveitir í 1. deild enda með titilhafa á nánast öllum borðum og þar með talinn einn stórmeistara.  Mátar fylgja þeim svo væntanlega upp í fyrstu deild.   Gangi þetta eftir verða Bolvíkingar eina félagið með 2 sveitir í fyrstu deild að ári.  

B-sveitir Hellis og TR, sigla væntanlega um lygnan sjó ásamt Reyknesingum en Skagamenn, Selfyssingar og b-sveit Hauka berjast um síðasta sætið í deild þeirra næstbestu.  Ég spái að Skagamenn skori mörkin og haldi sér uppi þótt alls ekki megi vanmeta Magga Matt og þá Flóamenn sem reyndust býsna drjúgir á endasprettinum í fyrra og gætu verið til alls vísir einnig nú.

Spá ritstjóra:

• 1. TB
• 2. Mátar
• 3. Hellir-b
• 4. TR-b
• 5. SR
• 6. TA
• 7. SSON
• 8. Haukar-b

3. deild

Staðan:

Röð	Spá	Lið	Stig	V.
1	1	Vikingaklubb. A	7	17,5
2	3	TG A	7	15
3	7	TV B	6	15,5
4	4	SA B	6	15,5
5	2	Godinn A	6	15
6		TR C	4	13,5
7	6	Hellir C	4	12
8	5	TB C	4	12
9	8	KR B	4	11,5
10		TG B	3	13
11		SA C	3	11
12		Hellir D	3	10,5
13		TV C	3	8,5
14		Sf. Vinjar A	2	9,5
15		SR B	2	8
16		Haukar C	0	4

Það er erfitt að spá í 3. deildina og enn erfiðara eftir að það voru tekin upp stig (match point) Víkingar (þessir hafa ekki rekið þjálfarann) ættu vinna sig upp og ætla ég að spá að Goðinn fylgi þeim með upp.  Garðbæingar, Eyjamenn og Akureyringar eru svo til alls líklegir og geta  blandað sér í þá baráttu. 

Spá ritstjóra:

• 1. Víkingaklúbburinn
• 2. Goðinn
• 3. TV-b
• 4. TG
• 5. SA-b

4. deild

Staðan:

Röð	Spá	Lið	Stig	V.
1		Sf. Sauðarkroks	8	17
2	5	Fjolnir B	8	15,5
3		UMSB	6	18
4	1	SFÍ	6	16,5
5		TR D	6	16
6	4	S.Austurlands	6	14
7	3	Godinn B	4	14,5
8		UMFL	4	14,5
9		SSON B	4	14,5
10		TV D	4	13,5
11	2	Vikingaklubburinn B	4	13
12		Aesir feb	4	13
13		Godinn C	4	12,5
14		Fjolnir C	4	10
15		TG C	4	9,5
16		Kordrengirnir	3	11
17		TR E	3	8,5
18		Sf. Vinjar B	2	10,5
19		Hellir E	2	8
20		SA D	2	7,5
21		Fjolnir D	1	6,5
22		Osk	1	4

Auðveldara er að spá í líklegar endurheimtur á IceSave en í 4. deildina.  Sauðkræklingar komu á óvart (nema kannski sjálfum sér) í fyrri hlutanum.  Skákfélag Íslands er með sterkasta liðið á pappírnum að mati ritstjóra og ég tel að þeir vinni sig upp.  3 lið ávinna sér rétt og líklegt er að það verði 3 af þeim 6 liðum sem hafa 6-8 stig. 

Ég ætla að spá að það verði SFÍ, Sauðkræklingar og hin unga og efnilega b-sveit Fjölnis. 

Spá ritstjóra:

• 1. Skákfélag Íslands
• 2. Sauðárkróku
• 3. Fjölni
• 4. Austurland
• 5. UMSB

Að lokum

Mikill fyrirvari er settur við allar spár og engin geimvísindi liggja á bak við þær.  Þar sem skákmenn þekkt gæðablóð með mikið jafnaðargeð geri ég ekki ráð fyrir miklum eftirköstum þótt ég kunni að hafa býsna oft rangt fyrir mér! 

Ég óska skákmönnum góðar skákhátíðar og hvet menn til að berjast eins og ljón á skákborðinu en vera hinir bestu vinir fyrir utan þess.

Verðlaunaafhending verður í Billiard-barnum, Faxafen 12, og hvet ég skákmenn til að fjölmenna þangað að loknu móti.

Gleðilega hátíð!

Gunnar Björnsson

Höfundur er bankastarfsmaður og félagi í Taflfélaginu Helli.

P.s. Varist eftirlíkingar!

 

Eyjamenn á toppnum

Þrátt fyrir Eyjar séu neðstar á íslenska landakortinu gildir ekki hið sama á Íslandsmóti skákfélaga.  Ýmislegt kom á óvart á óvart í fyrri hluta Íslandsmóti skákfélaga.  Eyjamenn eru jú efstir en fyrirfram áttu flestir von á því að Bolvíkingar yrðu í þeim sporum.   Haukamenn eru í þriðja sæti eftir góða frammistöðu en þar stóð sigur þeirra gegn Bolvíkingum hæst.    Sigur Jorge Fonseca á Jóhanni Hjartarsyni vakti óneitanlega athygli en um er að ræða ein óvæntustu einstöku úrslit sem ég minnist hérlendis   Aðeins munar 1½ vinningi á sveitunum 1.-4. sæti en þar raða sér Eyjamenn, Bolar, Haukar og Hellisbúar.  Sveitirnar eiga allar svipað prógramm og því getur allt gerst.  

Alls konar óvæntir hlutir gerðust í fyrstu deild.  TR-ingar unnu Eyjamenn í fyrstu umferð, Eyjamenn unnu stórsigur á Hellismönnum, 5½-2½, og Haukamenn tók Bolvíkinga í bakaríið í lokaumferðinni og unnu 5½-2½. 

Eyjamenn geta unað glaðir við sitt, eru efstir og náðu fram hefndum fyrir beiskan ósigur fyrir Helli fyrir þremur árum síðan.  Sveitin byrjaði ekki vel og náði slökum úrslitum gegn TR í fyrstu umferð og þótti sumum það tap fá full mikla athygli í fjölmiðlum.  Eyjamenn munu án efa styrkja sig fyrir átökin í vor og yrði ég hissa ef þeir kæmu ekki með fjóra erlenda stórmeistara þá.     

Bolvíkingar ollu töluverðum vonbrigðum.   Fyrirfram var félagið talið langlíkast til sigurs og sá sem þetta ritar átti von á því að úrslitin gætu verið ráðin eftir fyrri hluta.  Svo er alls ekki.  Ef til vill háði það Bolvíkingum að margir þeirra hafi teflt mikið undanfarið.   Sama á reyndar við Hellismenn sem sumir tefldu undir getu.  Þegar Bolvíkingar fengu við sig alþjóðlegu meistarana í fyrra var það yfirlýst markmið að ná fram öflugu og öguðu liði sem myndi ávallt setja skákina í fyrsta sæti.    Óvænt forföll í fjórðu umferð gætu reynst félaginu dýrkeypt í síðari hlutanum.

Þess fyrir utan tel ég Bolvíkinga hafa gert ein stór mistök.  Þeir fluttu hingað til landsins Mikhail Ivanov sem var ætlað að tefla með þeim í keppninni.   Í ljós kom svo að Ivanov var á félagaskrá TR og þá eftirlétu Bolvíkingar hann til TR.  Það tel ég hafa verið mistök.   Þú styrkir ekki „andstæðinginn" að gamni þínu. Frekar en að leyfa Ivanov að tefla með TR hefðu Bolvíkingar átt að láta hann horfa á eða í jafnvel tefla allar viðureignir nema gegn sjálfum sér en til að gera málið enn grátlegra fyrir Bolanna sem þegar höfðu lagt út fyrir dýru flugi fyrir Rússann gerði hann sér lítið fyrir og vann Bolvíkinginn Miezis á fyrsta borði í viðureign félaganna! Bolvíkingar borguðu semsagt undir mann til landsins sem tók svo af þeim punkt!

Haukamenn eru í þriðja sæti og geta unað mjög glaðir við sitt.  Haukamenn fá nú færifæri sem þeir lengi langað til að vera í.  Félagið hefur sigurmöguleika og munu væntanlega koma dýrvitlausir til leiks í síðari hlutanum með styrkt lið og gætu verið til alls líklegir en félagið hefur mætt öllum hinum liðunum í toppbaráttunni.  

Hellismenn eru í fjórða sæti og ekki geta ekki vel við unað.  Eftir tapið gegn Eyjamönnum héldu Hellismenn einfaldlega að þeir væru úr leik en sér til mikillar til undrunar þegar þeir rýndu í mótstöfluna er það alls ekki svo!  Hellir er eina liðið af fjórum efstu sem á eftir að mæta b-sveit Hauka sem er áberandi lakasta sveitin og svo eftir að mæta TR og Bolum.    Illa gekk á 2. og 3. borði og styrki félagið sig á efstur borðum getur sveitin vel hampað titlinum.

TR-ingar eru í fimmta sæti og geta mjög vel við unað.  Félagið hafði orðið fyrir miklu áföllum þegar Hannes, Þröstur og Stefán hættu í félaginu.  Aldrei þessu vant voru TR-ingar vel mannaðir nema helst gegn Helli-b en þar töpuðust líka 3 vinningar sem gæti reynst dýrt þegar uppi er staðið.  TR-ingar geta vart gert sér von um Íslandsmeistaratitilinn til þess þarf of mikið að að ganga upp.  Ef mjög vel gengur í síðari hlutanum gæti hugsanlega silfur eða brons komið í hús.  Ein sætasti sigur TR-inga var svo sigur Hrafns Loftssonar á bróður sínum Arnaldi, Helli-b, en öllum að óvörum varð um að ræða mikla tímahraksskák.  

Fjölnismenn eru í sjötta sæti.  Gullið er runnið þeim úr greipum og líkur á silfri og brons gæti náðst en þá þarf mikið að ganga upp.  Ágætlega gekk á efri borðunum en ver á þeim neðri en Fjölnismenn þurfa að stilla upp sterkari sveit á neðri boðrum ætli þeir að blanda sér í baráttu um gullið.  

B-sveitir Hellis og Hauka eru fallnar eins og vitað var fyrirfram. Hellismenn eru reyndar „bara" þremur vinningum á eftir Fjölni en sveitin á eftir að mæta þremur efstu sveitunum. B-sveit Hauka er enn fallnari en getur samt bærilega vel við unað, aldrei verið eggjaðir (fengið 0 vinninga) eins og Hellismenn í fyrstu umferð auk þess sem Jorge Fonseca vann jú Jóhann Hjartarson!

Staðan (spá ritstjora í sviga):

Röð	Lið	Vinn	Stig
1 (2)	TV a	20,5	6
2 (1)	Bolungarvík a	20	6
3 (6)	Haukar a	19,5	5
4 (3)	Hellir a	19	5
5 (5)	TR a	17,5	6
6 (4)	Fjölnir a	14,5	2
7 (7)	Hellir b	11,5	2
8 (8)	Haukar b	5,5	0

Í síðari hlutanum er ljóst að flest liðin komi sterkari til leiks og ljóst að erlendir stórmeistarar verða á hverju strái.   Á þessu augnabliki þykir mér sem fyrr líklegast að Bolvíkingar enda auðveldast fyrir þá að styrkja sig.   Þeir hafa marga sterka erlenda stórmeistara á félagaskrá og eiga því auðvelt með að styrkja liðið og kreppan virðist ekki hafa bitið jafn mikið á TB og mörg önnur félög.  Liðið hefur jafnframt sterkustu Íslendinganna.  Að öðru leyti þykir mér ekki ólíklegt að fyrri spá rætist nema að ég spái því að Haukar og Fjölnir skipti á 4. og 6. sæti.  Um þetta set ég þó alla fyrirvara og ætla ekki að lofa að ég spái eins og í aðdraganda síðari hlutans þegar meiri upplýsingar um mönnum liðanna liggur fyrir.  

Váááááá, hvað þetta getur orðið spennandi í vor!

 

2. deild

 

Skákfélag Akureyrar er að gera góða hluti í 2. deild og fátt bendir til annars en að sveitin tefli aftur í 1. deild að ári.  Gylfi Þórhallsson, sem er sennilega sá skákmaður sem teflt hefur flestar skákir allra í sögu mótsins, og Áskell Örn Kárason upplifðu það í fyrsta skipti að tefla í 2. deild en Skákfélag Akureyrar hefur alla tíð teflt í fyrstu deild þar til nú.  B-sveit TR er önnur og er í harðri baráttu um að fylgja Akureyringum upp í fyrstu deild við KR-inga og jafnvel Reyknesinga.   TR-ingar hafa tveggja vinninga forskot á KR-inga en á móti kemur að KR-ingar eiga eftir að tefla við tvær neðstu sveitirnar.  

Bolvíkingar sem ég spáði sigri eru aðeins í fimmta sæti og ekki líklegir til stóra afreka.  Þó er líklegt ef sveitin styrkir sig í 1. deild að b-sveitin verði miklu mun sterkari en það er ólíklegt að sveitin nái 6½ vinningum á TR-b til að krækja í 1. deildarsæti.  Margt bendir fall Hellis-c en benda má þó á að með henni tefla skákmenn á uppleið sem gætu verið 50-100 stigum sterkari í vor en núna.   Í fallbaráttunni eru einnig Skagamenn og Garðbæingar og aðeins eitt þessara liða mun bjarga sér.  Önnur deildin hefur aldrei verið sterkari en nú.

Staðan:

Röð	Lið	Vinn	Stig
1 (2)	SA a	18,5	6
2 (3)	TR b	16,5	7
3 (4)	KR a	14,5	7
4 (5)	SR a	13,0	4
5 (1)	Bolungarvík b	10,0	2
6 (7)	TA	8,5	3
7 (6)	TG a	8,5	2
8 (8)	Hellir c	6,5	1

 

Spá ritstjóra virðist vera nokkuð góð að stöðu Bolvíkinga undanskyldri sem ég hef gjörsamlega ofmetið.

3. deild

 

Taflfélagið Mátar, sem hefur aðsetur í Garðabæ, en er félag brottfluttra Akureyringa er efst og eru á leiðinni upp. Enginn vafi á því enda sveit yfirmáta sterk í samanburði við aðrar í deildinni.    C-sveit TR og b-sveit SA berjast um hitt sætið í 2. deild að ári.  TR-ingar hafa þar 2½ vinnings forskot en eiga eftir að mæta öllum sterkustu sveitunum.   Hér er því allt galopið  

C-sveit Hauka og d-sveit Hellis eru í fallsætunum en stutt er í b-sveit Garðbæinga.  Þessi þrjú leið berjast um að halda sér uppi og sú fallbarátta gæti orðið hörð en liðin í botnbaráttunni eiga mikið eftir að mætast.  Selfyssingar gætu jafnval dregist niður í fallbaráttuna en þeir eiga eftir að mæta sterkum sveitum í síðari hluanum

Staðan:

 

Röð	Lið	Vinn	Stig
1 (2)	Mátar	19,0	8
2 (5)	TR c	16,5	7
3 (3)	SA b	14,0	6
4 (4)	Selfoss a	11,5	4
5 (1)	Bolungarvík c	10,5	3
6 (6)	TG b	9,0	2
7 (8)	Hellir d	8,5	1
8 (7)	Haukar c	7,0	1

Spáin er nokkuð nærri lagi nema að því undanskyldu að ég spái Bolvíkingum allt og góðu gengi.  Hér gildir það sama og í 2. deild.  Bolvíkingar gætu orðið mun sterkari í síðari hlutanum en mér sýnist það sé of seint til að koma sveitinni upp.  

4. deild

Alls konar óvæntir hlutir hafa gerst í fjórðu deild en ég spáði b-sveit Taflfélags Vestmanneyja sigri rétt eins og fyrra.  Í fyrra reyndust þær upplýsingar byggjast á óskhyggjunni einni saman.  Víkingaklúbburinn virðist vera líklegastur til árangur og b-sveit KR-inga er einnig líkleg til árangurs.   B-sveit Eyjamanna er svo sem skammt undan en aðeins munar 1½ vinningi á liðunum í 1. og 7. sæti.  Þarna getur allt gerst!

Staða efstu liða:

Röð	Lið	Vinn	Stig
1 (2)	Víkingakl. a	17,5	6
2 (6)	Goðinn a	17,0	8
3 (3)	KR b	17,0	8
4	Víkingakl. b	17,0	7
5	Austurland	17,0	5
6 (1)	TV b	16,5	6
7	SR b	16,0	6
8	Sf. Vinjar	15,0	5
9	KR c	14,0	6
10	UMSB	14,0	5
11	Siglufjörður	14,0	4
12	KR d	14,0	4

 

Ég virðist hafa ofmetið c-sveit SA og d-sveit Bolvíkinga en að öðru sæti gæti spáin allt eins ræst enda lítilll munur á milli sveita.  B-sveit Víkingana hefur þó allrækilega slegið í gegn og minnstu munaði að hún væri efst eftir seinni hlutann.  Gæti orðið hrikalega spennandi deild.

Skákfélagið Ósk vakti mikla athygli en um er að ræða að ég best fyrstu hreinræktuðu kvennasveitina sem tekur þátt í Íslandsmóti skákfélaga.  Einnig var gaman að sjá Skákfélagið Vin taka þátt.  Frábært starf sem Arnar Valgeirsson hefur þar unnið.  

Að lokum

Skemmtilegum fyrri hluta er lokið og sjaldan hefur spennan verið meiri.  Fjögur lið geta hæglega blandað sér í baráttuna um dolluna.  

Ég vil nota tækifæri á að þakka öllum þeim sem komu að mótshaldinu kærlega fyrir.  Skákstjórunum Ólafi S. Ásgrímsson, Braga Kristjánssyni, Ara Friðfinnssyni, Hermanni Aðalsteinssyni, Haraldi Baldurssyni og Ríkharði Sveinsson þakka ég góð störf, Eyjólfi Ármannssyni fyrir innslátt úrslita, Olgu fyrir innslátt úrslita og Páli Sigurðssyni fyrir að aðstoða hana.   Helgi Árnason fær svo þakkir fyrir góðan aðbúnað í Rimaskóla og Ásdís Bragadóttir framkvæmdastjóri fyrir gott utanumhald. 

Myndavélasmiðirnir, Helgi Árnason, sem tók langflestar myndirnar, Einar S. Einarsson, Hermann Aðalsteinsson og Smári Rafn Teitsson fá einnig þakkir.   

RÚV gerði mótinu ágæt skil á sunnudagskvöldið og höfðu þá viðtal við undirritaðan.  Ég var spurður hvort skákmenn væru nördar og neitaði ég því.  Í dag hef ég tvívegis verið sakaður um að skrökva í sjónvarpið!  Ég fer hins vegar ekki að því að svo er ekki.  Við skákmenn erum ekki nördar! Hafi eitthvað komið illa út í sjónvarpinu vil ég benda á að oft er haft rangt eftir forsetum.   

Gunnar Björnsson

Höfundur er skákmaður, ritstjóri og forseti.  Ekki nörd, alls ekki!

• Heimasíða SÍ
• Chess-Results
• Myndir
• Pistill og spá ritstjóra um úrslit 

You Ain´t seen Nothing Yet!

Íslandsmót skákfélaga fer fram um helgina.  Undirritaður er fullur tilhlökkunar enda hér á ferðinni langskemmtilegasta skákkeppni hvers ár.  Eins og venjulega stefnir í metþátttöku en nú er 32 lið skráð til leiks í fjórðu deild sem er fjölgun um tvö.  Nýtt félag tekur þátt í fyrsta sinn, kvennaklúbburinn ÓSK.   Ritstjórinn er auk þess afar hamingjusamur með það að vera ekki lengur umdeildasti ritstjórinn á landinu.

Í fyrstu deild stefnir allt í góðan sigur Bola Víkara.  Í fyrra sló félagið í gegn þegar það studdi myndarlega við unga og efnilega skákmenn og veitti þeim stuðning til að leggja skákina fyrir sig.   Víkarar stóðu auk þess fyrir vel skipulögðum landsliðsflokki og í vikunni héldu Bolvíkingar alþjóðlegt mót og sem gekk vel þar sem Róbert Lagermann náði sínum lokaáfanga að alþjóðlegum meistaratitli.

Félagið hefur sem fyrr haldið á þeirri braut að styðja unga skákmenn þrátt fyrir einhverja stefnubreytingu þegar félagið fékk til lið við sig „gamlar" kempur eins og Jóhann Hjartarson frá Helli og Þröst Þórhallsson frá TR.   Liðsskipan Víkara meðal íslenskra skákmanna minnir helst á lið TR hér í denn þegar félagið hafði það mikla yfirburði að félagið tefldi fram tveimur sveitum (SA-sveit og NV-sveit) og iðulegu enduðu sveitirnar í  1. og 2. sæti.    Maður bíður eftir því að félagsmönnum verður skipt upp í sveitir eftir því hvar þeir búi í ......................Bolungarvík .  Með Víkurum teflir svo lettneski stórmeistarinn Miezis eins og svo oft áður en Víkarar stilla aðeins upp einum erlendum stórmeistara nú í ár en það ætti að duga til sigurs.  

Ritstjóri spáir Eyjamönnum öðru sæti.    Samkvæmt mínum heimildum tefla með Eyjamönnum frönsku stórmeistararnir Maze og Nataf og þýski stórmeistarinn Hoffman.  Og svo Helgi Ólafsson.  Ekkert lið stillir upp fleiri stórmeisturum en Eyjamenn en liðið er ekki jafnsterkt á neðri borðunum eins og t.d Bolvíkingar og Hellismenn og því tel ég annað sætið þeirra.   Undirritaður brá sér til Eyja síðustu helgi og skemmti sér vel.  Eyjamenn stóðu að miklum myndarskap fyrir NM barnaskólasveita og hafa lagt nýjan staðal hvernig staðið fyrir slíkum mótum.    Annað sætið til Eyja!

Ritstjóri spáir Hellismönnum þriðja sætinu en félagið hefur nær undantekningarlaust lent í 1. eða 2. sæti síðasta áratuginn eða svo.  Hellismenn misstu Jóhann Hjartarson en endurheimtu Hannes Hlífar eftir tveggja ára útlegð í TR.  Allir fjórir meistaratitlar Hellis unnust með Hannes á fyrsta borði sem hefur ætíð reynst liðinu vel og Hellismenn því himinlifandi yfir því að endurheimta þennan sigursæla meistara.    A-sveit Hellis verður reyndar að ég held eina íslenska sveitin í 1. deild sem stillir eingöngu upp íslenskum ríkisborgurum en erlendir ríkisborgarar þótt búsettir eru á Íslandi tefla með b-sveitum Hellis og Hauka.  Lið Hellis samanstendur að Hannesi, Birni Þorfinnssyni og svo FIDE-meisturum.  Róbert Lagerman mun án efa koma sterkur inn eftir frábæra frammistöðu á Víkara-mótinu.   Hellismenn eru veikari á efri borðunum en  margar aðrar sveitir en sterkari á neðri borðum en allar aðrar sveitir að Víkurum undanskyldum og það mun reynast þeim drjúgt.  Þriðja sætið til Hellisbúa!

Erfitt er að spá um liðin í 4.-6. sæti.  Þar berjast væntanlega TR, Haukar og Fjölnismenn.  Um síðastnefnda liðið hefur ritstjórinn nánast ekkert hlerað annað en að Héðinn Steingrímsson teflir með þeim auk þess sem Davíð Kjartansson kemur til landsins frá Sviss til að tefla.     

Ég geri ráð fyrir að Fjölnismenn stilli upp til viðbótar 2-3 erlendum meisturum og ætla að spá þeim fjórða sæti.

Haukamenn munu víst vera veikari en oft áður og töluvert um forföll.   Kveynzis kemur ekki en sjálfsagt stilla þeir upp 2-3 erlendum meisturunum.  Auk þess sem sjálfur Íslandsmeistarinn Henrik Danielsen teflir væntanlega á fyrsta borði.  

TR-ingar fengu óvæntan liðsauka þegar Ivanov gekk til liðs við þá þegar í ljós kom að fyrirætlanir Víkara að nota hann runnu út í sandinn þegar í ljós kom að hann nánast borinn og barnfæddur TR-ingur.  Ivanov teflir því með TR.  Með TR teflir einnig svo alþjóðlegi meistarinn Arnar Gunnarsson, Snorri Bergsson og Sigurðarnir Daði og Páll sem báðir gengu nýlega til liðs við félagið eftir mislanga útlegð í Helli og KR.  Á móti kemur að félagið hefur misst Hannes Hlífar, Þröst og Stefán Kristjánsson.  Það hefur oft verið vandamál hjá TR að fá sína sterkustu menn til að tefla en mér skilst að svo verði ekki núna.

Ég get nánast kastað upp teningi eins og spá í lokastöðu þessara sveita.  Ég ætla þó að láta vaða að Fjölnir taki fjórða, TR það fimmta og Haukar það sjötta. 

Lítið þarf að fjalla um botnbaráttuna.  Það verður hlutverk b-liða Hellis og Hauka sem býður þess að falla.  Hellismenn ættu þó að vera sterkari.

Svo gæti þetta allt farið á hvolf breytist liðsskipan félaganna mikið t.d. í síðari hlutanum!

Spá ritstjóra:

• 1. Bolungarvík
• 2. TV
• 3. Hellir-a
• 4. Fjölnir
• 5. TR
• 6. Haukar-a
• 7. Hellir-b
• 8. Haukar-b

 

2. deild

Önnur deildin er oft sú deild sem erfiðast er að spá um.  Ég spái að B-lið Víkara fari upp en sveitin vann sig upp úr 3. deild í fyrra með fáheyrðum yfirburðum.  Vandi er að segja um hvaða sveit fylgir þeim upp en mér finnst að fallliðin úr 1. deild frá í fyrra muni um það berjast.  Spái Akureyringum annað sæti og TR-b því þriðja.  KR-ingar taki fjórða sæti en ekki má vanmeta þá komi þeir með sterka skákmenn að utan eins og veit að stóð til.  Reyknesingum spái ég fimmta sæti og Garðbæingum því sjötta.  

C-lið Hellis slapp með naumindum á hálfum vinningi við fall í fyrra og bíður erfitt hlutskipi.  Þá sveit munu skipa ungir og efnilegir skákmenn sem eru á mikilli siglingu og sveitin því alls ekki dauðadæmd fyrirfram og gæti komið á óvart.  Ég tel þó líklegast að hún falli og að Skagamenn fylgi henni niður en þeir komu upp úr 3. deild í fyrra.

Spá ritstjóra:

• 1. Bolvíkingar-b
• 2. SA
• 3. TR-b
• 4. KR
• 5. SR
• 6. TG
• 7. TA
• 8. Hellir-c

3. deild

Það er yfirleitt enn erfiðara að spá í spilin í þriðju deild.  Úr 2. deild í fyrra féllu naumlega b-sveit SA og Selfyssingar og þær sveitir eru báðar líklegar til afreka.  C-sveit TR endaði í 3. sæti í fyrra, tapaði 2. deildarsæti mjög naumlega.  Úr 4. deild komu Mátar og c-sveit Víkara.  Ég tel báðar þeir sveitir einnig líklegar í toppbaráttuna.   Ég spái Víkurum sigri og þar með að sigur hjá þeim vinnist í 1.-3. deild.   Ég spái að baráttan um annað sæti verði á milli b-sveit SA og vinafélagsins í Mátum úr Garðabæ.  Akureyringar hagnast á því að a-sveitin féll (ekki það að það sé jákvætt fyrir félagið) þar sem nú tefla 6 í a-sveitinni í stað 8 áður og þar með styrkist b-sveitin.   Ég ætla að spá Garðbæingum öðru sæti og Akureyringum þeim þriðja en..........set þó við þá meiri fyrirvara en íslenska ríkisstjórnin vildi setja í upphafi við IceSave-samninginn.  

Fallbaráttan gæti staðið á milli Hellis-d, Hauka-d og TG-b.  Spái H-liðunum niður og þar með að sveitir Hellis falli úr öllum deildum.  

Spá ritstjóra:

• 1. Bolungarvík-c
• 2. Mátar
• 3. SA-b
• 4. Selfoss
• 5. TR-c
• 6. TG-b
• 7. Haukar-c
• 8. Hellir-d

 

4. deild

Það eru minni líkur að giska á rétt úrslit í fjórðu deild en að sömu tölurnar komi tvisvar upp í röð í búlgarska lottóinu.   Ég held að b-sveit Eyjamanna hljóti nú að komast upp og ég tel að Víkingaklúbburinn fylgi þeim upp.  Þarna eru þó margar sterkar sveitir eins og SA-c, KR-b, Bolungarvík-d og Goðinn sem hefur styrkt sig mikið frá í fyrra.  

Spá ritstjóra:

• 1. TV-b
• 2. Víkingaklúbburinn
• 3. KR-b
• 4. Bolungarvík-d
• 5. SA-c
• 6. Goðinn

Að lokum

Keppnin nú er sú fyrsta eftir að kreppan skall yfir okkur.  Hún hefur bersýnilega töluverð áhrif enda sýnist mér á öllu að töluvert minna verði nú um erlenda skákmenn en áður.  Á móti kemur að mér sýnist að skákáhugi sé á uppleið.  Á flest mót í haust hefur keppendum fjölgað frá fyrri árum og sem fyrr er metþátttaka á Íslandsmóti skákfélaga.  

Það sem gerir Íslandsmót skákfélaga jafn skemmtilega keppni og raun ber vitni að þarna tefla allir.  Stórmeistarar, börn, gamalmenni, konur og kallar.   Þarna sér maður öll gömlu andlitin sem sum hver maður sér bara tvisvar á ári. 

Gallinn er sá að nánast enginn vill vera skákstjóri.  Skákstjórar eru því eins og svo oft áður í færri  kantinum og bið ég keppendur að sína því skilning þótt ekki séu skákstjórar alltaf til taks þegar í stað. 

Eyjólfur Ármannsson ætlar að slá inn valdar skákir og búið er að ráða manneskju sem ætlar að skrá inn einstaklingsúrslit í öllum deildum sem er vel.   Engin bein útsending verður enda hvort eð er allir á staðnum!

Svo nokkur praktísk atriði.

Teflt er í Rimaskóla.  Tímamörk eru 1½ klst. á alla skákina auk ½ mínútu á hvern leik.  Fyrsta umferð hefst kl. 20 á föstudag, önnur kl. 11 á laugardag, þriðja kl. 17 á laugardag og svo fjórða kl. 11 á sunnudag.

Skákstjórar hafa ákveðið að eftir ½ klukkustund verði dæmt tap séu menn ekki mættir.  

Einnig hefur ákveðið að enginn viðureign megi hefjast fyrr en búið sé að skrá liðin á viðkomandi eyðublað.  Það er gert þar sem oft hefur misbrestur á því að liðin séu skráð.  Dæmi eru einnig um að liðsstjórar hafi tekið með eyðublöðin heim og allt verið í steik á meðan af þeim er leitað!   Einnig eru liðsstjórar hvattir til að skila inn liðsskipan síns liðs til skákstjóra í upphafi móts til að auðvelda innslátt úrslita.  

Spáin nú er til gamans og enginn má taka hana of alvarlega.  Á bak við hana eru engin geimvísandi heldur miklu frekar tilfinning ritstjóra sem býsna oft hefur þó reynst sannspár.  Eins og kollegi minn á Bessastöðum segir þegar eitthvað er hermt eftir honum.  „Ég var misskilinn".  

Gunnar Björnsson

Höfundur er ritstjóri Skák.is, forseti SÍ og teflir með b-sveit Hellis á Íslandsmóti skákfélaga.  

Allt útlit fyrir yfirburði Bolvíkinga

Síðari hluti Íslandsmóts skákfélaga fer fram um helgina á Akureyri.  Þetta er í fyrsta sinn í sögu SÍ að ég held að keppni allra deilda fari fram fyrir utan Reykjavíkursvæðið en það hefur alloft gerst að keppni hluta deildanna fari fram út á landi.  Það virðist eiga vel við að flest bendir til þess að Bolvíkingar vinni öruggan sigur á þessu Íslandsmóti sem yrði fyrsti sigur landsbyggðarfélags, þ.e. ef við skilgreinum Garðabæ sem hluta höfuðborgarsvæðisins!

Annars mun samkvæmt heimildum ritstjóra kreppan hafa töluverð áhrif á uppstillingar flestra liðanna sem munu stilla upp færri erlendum skákmeisturum en endranær.  Það mun þó ekki eiga við Bola og Eyjamenn sem munu frekar gefa í en hitt.

1. deild

Staðan: (spá ritstjóra fyrir fyrri hluta í sviga):

• 1. (1) Taflfélag Bolungarvíkur 24½ v. af 32
• 2.-3. (3) Skákdeild Fjölnis  21½ v. (6 stig)
• 2.-3. (4) Taflfélagið Hellir a-sveit 21½ v. (6 stig)
• 4. (2) Taflfélag Reykjavíkur a-sveit 15½ v.
• 5. (6) Taflfélagið Hellir b-sveit 11½ v. (3 stig)
• 6. (7) Skákfélag Akureyrar 11½ v. (2 stig)
• 7. (5)Skákdeild Hauka 11½ v. (1 stig)
• 8. (8) Taflfélag Reykjavíkur 10½ v.

Ekkert bendir til annars en stórsigurs Bolanna.  Sannast sagna grunar mig að um að verði að ræða svokallað „overkill", ekki ósvipað því sem Hróksmenn áttu til að nota og að keppnin vinnist með fáheyrðum yfirburðum, jafnvel meira en 10 vinningum  Með Bolunum tefla þrír sterkir Úkraínumenn og á efsta borði teflir Alexander Areshchenko (2673).  Þrjú lið berjast svo um silfur og brons.  Það eru Íslandsmeistarar Taflfélags Reykjavíkur, silfurlið Hellis og Fjölnismenn.  Mér skilst að Fjölnir sé með veikari sveit en í fyrri hlutanum og TR-ingar munu vera útlendingalausir.  Hellismenn munu stilla upp alíslensku liði eitt toppliðanna í báðum hlutum og stefna að því að festa félagið í sessi sem sterkasta „íslenska" liðið!

Ómögulegt er að segja hvernig toppslagurinn endar á milli liðanna þriggja.  TR-ingar eru þó fimm vinningum á eftir hinum sveitunum en eiga þess í stað veikra prógramm og það má alls ekki vanmeta möguleika þeirra nái menn góðri liðsheild.  Ég ætla að spá Fjölni öðru sæti, Helli því þriðja og Íslandsmeisturunum því fjórða. 

Mikil spenna er í botnbaráttunni.  Þar hafa Hellir-b, SA og Haukar 11,5 vinning og TR-b 10,5 vinning.  Ég tel að Haukar muni ekki verða í botnbaráttunni.  Þeir hafa mætt öllum toppsveitunum og eiga eftir að mæta botnsveitunum þremur.  Það eru því hinar sveitirnar þrjár sem berjast.  Allar sveitirnar eiga eftir að mæta mjög svipað sterkum andstæðingum.  Ég ætla að spá að heimavöllurinn skili sínu fyrir Akureyringa og þeir haldi sér uppi.  B-liðin falli og e.t.v. mun það gerast í fyrsta skipti í áratugi að ekkert b-lið verði í fyrstu deild að ári.

En ég spái hrikalegri spennandi fallbaráttu þar sem úrslitin munu ekki ráðast fyrr en á lokasekúndunum. 

Uppfærð spá ritstjóra (vorspá í sviga):

• 1. (1) Bolungarvík
• 2. (3) Fjölnir
• 3. (4) Hellir-a
• 4. (2) TR-a
• 5. (5) Haukar
• 6. (7) SA
• 7. (6) Hellir-b
• 8. (8) TR-b

2. deild

Staðan: (spá ritstjóra fyrir fyrri hluta í sviga):

• 1. (1) Taflfélag Vestmannaeyja 19 v.
• 2. (4) Skákdeild Hauka b-sveit 16 v.
• 3. (2) Skákdeild KR 14 v.
• 4. (7) Skákfélag Selfoss 10½ v. (4 stig)
• 5. (3) Taflfélag Garðabæjar 10½ v. (3 stig)
• 6. (5) Skákfélag Reykjanesbæjar 9 v.
• 7.-8. (6)Skákfélag Akureyrar b-sveit 8½ v. (1 stig)
• 7.-8. (8) Taflfélagið Hellir c-sveit 8½ v. (1 stig)

Ég spái TV nokkuð öruggum sigri en mér sýnast ummæli formanns TV á vefsíðu félagsins þar sem hann talar um mikið breytt lið gæti bent til þess að liðið þeirra verði sterkt.  Ég spái því að þeir endurheimti sæti sitt í deild þeirra bestu.  Um hitt sætið berjast b-sveit Hauka og KR-ingar.  Hugsanlega gæti b-sveit Hauka verið eina b-sveitin í fyrstu deild að ári!  Ég ætla hins vegar að spá að KR-ingar taki sætið og að fyrsta deildin verði án b-sveita að ári.

Fallbaráttan er mjög spennandi.  Þar berjast fimm lið og tvö þeirra munu falla.  Þarna er afskaplega erfitt um að spá. Hellir er neðstur en á eftir að tefla við þrjú neðstu liðin og því er möguleiki fyrir sveitina að halda sér.  Selfoss á svo t.d. erfiðasta prógrammið eftir að þessum sveitum og gæti hæglega fallið.  Rétt eins og í fyrstu deild verður það fallabaráttan hér sem verður spennandi en síður toppbaráttan.  Ég spái Helli-c og SR falli.  Heimavöllurinn reynist Akureyringum drjúgur og að sveitin bjargi sér frá falli.

Annars held ég að fallbaráttan hér verði hrikalega spennandi rétt eins og fyrstu deild. 

Uppfærð spá ritstjóra (vorspá í sviga):

• (1) TV
• (2) KR
• (4) Haukar-b
• (3) TG
• (7) Selfoss
• (6) SA-b
• (5) SR-a
• (8) Hellir-c

3. deild

Staðan: (spá ritstjóra fyrir fyrri hluta í sviga):

• 1. (1) Taflfélag Bolungarvíkur 21½ v.
• 2. (3) Taflfélag Reykjavíkur c-sveit 15½ v.
• 3. (2) Taflfélag Akraness 14½ v.
• 4. (6) Taflfélag Reykjavíkur d-sveit 10 v.
• 5. (7) Skákfélag Reykjanesbæjar b-sveit 9½ v.
• 6. (4) Taflfélag Garðabæjar b-sveit 9 v. (4 stig)
• 7. (5) Skákdeild Hauka c-sveit 9 v. (3 stig)
• 8. (8) Taflfélagið Hellir d-sveit 7 v.

Rétt eins og 1. og 2. deild er engin spenna um sjálft toppsætið.  Um það heldur b-sveit Bolanna föstum tökum.  C-sveit TR og Skagamenn berjast svo um hvor sveitin fylgir Bolunum upp.  Ég ætla að spá að Skagamenn fylgi Vestfirðingunum upp.  Fallbaráttan er ekki ósvipuð í 3. deild og í 2. deild nema að staða d-sveitar Hellis er áberandi slökust.  Ég spái því að b-sveit Reyknesinga fylgi þeim niður en rétt eins og 1. og 2. deild bendir flest til þess að fallbaráttan geti verið hrikalega spennandi. 

Uppfærð spá ritstjóra (vorspá í sviga):

• 1 (1) TB-b
• 2 (2) TA
• 3 (3) TR-c
• 4.(4) TG-b
• 5 (5) Haukar-c
• 6 (6) TR-d
• 7 (7) SR-b
• 8 (8) Hellir-d

4. deild:

Staða efstu liða:

•   1 Taflfélagið Mátar 19.5 v.
•   2 Tf. Bolungarvíkur c-sveit  18 v.
•   3 Víkingaklúbburinn a-sveit  17.5 v.
•   4   SA c-sveit  16 v.
•  5-6  KR - b sveit  15.5 v.
•  5-6 Sf. Goðinn a-sveit  15.5 v.
•   7   Skákfélag Vinjar 15 v.
•  8-9 Taflfélag Vestmannaeyja b  14.5 v.
•  8-9 Tf. Bolungarvíkur d-sveit  14.5 v.
• 10-12 KR - c sveit  13.5 v.
• 10-12 Skákfélag Sauðárkróks  13.5 v.
• 10-12 Sf. Siglufjarðar  13.5 v.

Í fjórðu deild virðast þrjú lið berjast um sætin tvö í 3. deild að ári.  Ég spái að hinir norðlensku sunnanmenn Mátar hafi sigur.  Líklega fylgir c-sveit Bolanna þeim upp.  Þá má ekki vanmeta Víkingasveitina og reyndar vil ég einnig benda á b-sveit TV sem mig grunar að sé mjög sterk. 

Samkvæmt mínum upplýsingum mæta 24 sveitir af 30 til leiks í fjórðu deild sem er bara býsna gott að mínu mati þar sem engin reynsla er fyrir því að halda fjórðu deildina út á landi og því renndu mörg félögin blint í sjóinn í fyrri hlutanum um heimtur í þeim síðari.

Spá um röð efstu liða:

• 1. Mátar
• 2. TB-c
• 3. Víkingasveitin
• 4. TV-b
• 5. SA-b

Að lokum

Það er útlit fyrir skemmtilega keppni.  Reyndar er toppbaráttan ekki spennandi í neinni deild en spenna um silfur og brons geta verið spennandi.  Fallbaráttan í öllum deildum getur hins vegar orðið hrikalega spennandi. 

Og þetta er söguleg keppni.  Í fyrsta sem  keppni allra deilda fer  fram  utan höfuðborgarsvæðisins!

Og að gefnu tilefni er rétt að taka fram að spáin er bara sett fram til gamans og bak við hana liggja engin geimvísindi!

Gunnar Björnsson

Höfundur er ritstjóri http://www.skak.is/ og formaður Taflfélagsins Hellis

 

Skákárið 2008

Skákárið 2008 var sérstakt skákár.  Taflfélag Reykjavíkur varð Íslandsmeistari eftir spennandi baráttu við Helli.  Fyrri hluti Íslandsmóts skákfélaga 2008-09 fór fram í skugga fjármálakreppu sem segja má að hafi hafist þá helgi með ríkisvæðingu Glitnis.  Dagur Arngrímsson og Björn Þorfinnsson stimpluðu sig inn sem framtíðar landsliðsmenn.  Íslensku stórmeistararnir voru flestir í kreppu.  Ýmist tefldu þeir lítið sem ekkert eða stóðu undir þeim væntingum sem gerðar eru til þeirra.  

Áfangar komu í hús.  Þar stóðu Dagur Arngrímsson, Guðmundur Kjartansson, Guðmundur Gíslason og Björn Þorfinnsson vaktina.  Dagur er orðinn alþjóðlegur meistari og búinn að ná sínum fyrsta stórmeistaraáfanga þótt einhver vafi sé á að hann sé fullgildur.  Björn kláraði alþjóðlega meistarann, reyndar á upphafsdögum ársins 2009, en þessir tveir skákmenn virðast vera ferskastir og eru líklegastir til að velta núverandi landsliðsmönnum úr þeirra sætum ásamt  Jóni Viktori Gunnarssyni sem hefur bætt sig töluvert á árinu og sigraði á alþjóðlegu skákmóti í Belgrad í Serbíu.  Guðmundur Kjartansson tók AM-áfanga í Harkany í Ungverjalandi og Gíslason á EM taflfélaga í Halkidiki í Grikklandi.

Og kannski það gerist á árinu 2009 þar sem landsliðið stóð sig afar illa á ólympíuskákmótinu og margir fara fram á endurnýjun.  Er kominn tími á allsherjar endurnýjun??  Tja, því verður stjórn SÍ að svara en árangur á síðasta ólympíuskákmóti var alls óviðundandi.  Sjálfur er ég hrifnastur af hugmyndinni um einvald sem velji liðið og þurfi þá ekki að horfa á stigin heldur geti valið besta LIÐIÐ.  Mér þykir það t.d. umhugsunarverð hugmynd að taka „áhættu" með liðsvali á EM strax í haust og gefa ungu skákmönnum sénsinn.

Hannes Hlífar varð Íslandsmeistari eins og venjulega og tefldi mun betur en í fyrra.  Hannes átti auk þess gott Reykjavíkurskákmót þar sem hann sigraði ásamt hinum Wang-gefnu Kínverjum.  Að öðru leyti ekki gott skákár hjá Hannesi og spurning hvort hann ætti ekki bara að flytja heim aftur.  Teflir best á Íslandi!  Henrik Danielsen tefldi mikið og á miklar þakkir skyldar fyrir það  Frábært fyrir íslenskan skákheim að fá tækifæri á að tefla við stórmeistara á hefðbundnum innlendum mótum. 

Í skákpólitíkinni gekk ýmislegt á.  Björn Þorfinnsson kosinn forseti SÍ eftir sigur á Pops-stjörnunni Óttari Felix Haukssyni.  Sumir töluðu um átök Hellis og TR en ég held varla og sem fyrr talað um mafíur.  Björn er vinsæll fýr, sem allir kunna vel við, þótt sigurinn hafi verið stærri en flestir áttu von á.

Eins og venjulega hefur ritstjóri valið hina og þessa viðburði ársins.  Sjálfsagt gleymist eitthvað í upptalningunni og biðst ég afsökunar á því!

Óvæntasta frétt ársins

Held að uppgangur Bolanna hafi verið hvað óvæntastur á árinu 2008.  Reyndar var þetta búið að „leka út" lengi en fáir tóku þetta alvarlega.  Sjálfur heyrði ritstjórinn Halldór Grétar Einarsson tala fjálglega um framtíðaráætlanir Bolanna fyrir 2-3 árum en tók tal hans aldrei alvarlega!

Skák ársins 

Ekki spurning.  Eina tapskák Taflfélags Bolungarvíkur á árinu.  Sá sem stjórnaði hvítu mönnunum sannaði að þar er á ferðinni virkilega góður skákmaður.  Sjá nánar:  http://hornid.com/cgi-bin/mwf/topic_show.pl?pid=51640;hl=

Deila ársins

Kosningabaráttan á milli Björns Þorfinnssonar og Óttar Felix Haukssonar hlýtur að teljast deila ársins.  Samt aldrei alvarlega deila enda skyggja deilur um notkun bandstriks frá árinu 2006 og hvort mætti kalla Íslandsmeistara Íslandsmeistara á árinu 2007 gjörsamlega á smá kosningaátök.  Menn hafa svo slíðrað sverðin og fær ritstjóri ekki betur séð en að öll dýrin í skákskóginum séu vinir!

Klúður ársins

TR fyrir að vera ekki tilbúnir með „We Are The Champions" eftir sigur á Íslandsmóti skákfélaga.  Eg meina „Winners takes it all?" Hvað hefði spænska landsliðið á EM með alla Liverpool-leikmennina sagt hefði það lag verið spilað?

Formaður Hellis var reyndar beðinn um að redda diski með Queen-laginu en.................því var hafnað snarlega!

Lið ársins:

TR-ingar stóðu sig vel og náðu að klára Hellismennina en lið ársins hljóta að teljast Bolar sem stálu allri athygli með sitt ofurlið sem þeir mættu með í upphafi kreppunnar og spöruðu víst lítíð.  Kláruðu þeir kannski gjaldeyrisforðann?  Davíð?  Hvað finnst þér um gjaldeyrisbruðl  Bolvíkinga?  Halló, ertu þarna ennþá?  Já, auðvitað, hvernig dettur mér annað í hug! 

Félagaskipti ársins

Margir skákmenn gengu til liðs við Bolvíkinga og má þar nefna félagaskipti Jóns L. Árnasonar og Braga Þorfinnssonar úr Helli og Jóns Viktors Gunnarssonar og Dags Arngrímssonar út Taflfélagi Reykjavíkur.

Efnilegasti skákmaður ársins

Sá skákmaður sem hækkaði mest allra frá áramótunum 2007/08 var Bjarni Jens Kristinsson en hann hækkaði um 137 stig.  Næst á eftir voru Salaskólakrakkarnir Patrekur Maron Magnússon með 117 stig og og Jóhann Björg Jóhannsdóttir með 107 stig.  Aðrir ná ekki 100 stigum en næst þar á eftir eru Daði Ómarsson, Atli Freyr Kristjánsson og Hallgerður Helga Þorsteinsdóttir.  

Hjörvar Steinn Grétarsson. unglingameistari Íslands og einfaldlega okkur besta von eins og er.  Ef til vill tími til að gefa ungum skákmönnum eins og Hjörvari tækifæri á að tefla í landsliði Íslands á árinu 2009?  Spyr sá sem ekki veit  Hjörvar er efnilegasti skákmaður ársins að mati ritstjóra þótt skákárið 2008 hafi ekki verið hans besta. 

 Skákkona ársins

Hallgerður Helga Þorsteinsdóttir Íslandsmeistarinn í skák hlýtur að teljast skákona ársins.  Frábær árangur hjá henni.  

Skákmaður ársins

Óvenju erfið spurning fyrir árið 2008.  Hannes Íslandsmeistari og sigraði á Reykjavíkurskákmótinu en átti að öðru leyti ekki gott ár og lækkar um eitt stig á árinu.

Héðinn, sem var skákmaður ársins 2007 tefldi aðeins á einu kappskákmóti, EM einstaklinga á árinu, fyrir utan liðakeppnir, sem verður að teljast lítið fyrir atvinnumann og lækkar um 7 stig. 

Hinir atvinnumennirnir tefldu lítið nema Henrik sem tefldi mikið en var nokkuð brokkgengur á árinu. 

Það er athyglisvert að af sjö stigahæstu skákmönnum landsins töpuðu sex skákstigum.  Aðeins Jóhann Hjartarson hækkaði á stigum en hann hækkaði um eitt stig!

Jón Viktor átti gott ár og sigraði á móti í Belgrad.  Björn Þorfinnsson átti gott ár, sem og Dagur Arngrímsson og Guðmundur Kjartansson .  Dagur og Gummi voru nokkuð brokkgengir á árinu en luku því með miklum stæl þegar Dagur tók stórmeistaraáfanga í Harkany en Gummi náði AM-áfanga í sama móti. 

Flestir okkar alþjóðlegu meistarar eru virkir og hafa verið að sýna góðan árangur  Frábært að sjá hvað alþjóðlegu meistararnir okkar hafa verið duglegir við fara erlendis til að tefla og blásið á allt krepputal.  Árið 2008 var eiginlega ár alþjóðlegu meistaranna og sterkustu FIDE-meistaranna!

Skákmaður ársins er Jón Viktor Gunnarsson. Sigurinn í Belgrad ræður þar mestu enda ekki á hverjum degi sem íslenskir skákmenn sigra á opnu sterku alþjóðlegu móti!  Að öðru leyti jafn og góður árangur yfir árið sem styrkir stöðu Jóns sem eins besta skákmanns landsins. 

Endurkoma ársins

Það hlýtur að vera Guðmundur Gíslason, sem hefur lítið teflt síðustu ár, en kom mjög sprækur inn á EM taflfélaga þar sem hann náði AM-áfanga.

Viðburður ársins

Skáksamband Íslands hélt Reykjavíkurskákmót í upphafi ársins.  Hellir stóð fyrir tveimur alþjóðlegum mótum, Fiskmarkaðsmótinu og alþjóðlegu unglingamóti.  TR hélt alþjóðlegt Boðsmót félagsins. 

Reykjavíkurskákmótið, sem var óvenju vel heppnað nú, hlýtur að teljast viðburður ársins.  Frábært konsept að mínu mati að velja færri „fræga" skákmenn og bjóða fremur þessum ofurefnum sem settu svo mjög skemmtilegan svip á mótið.

Skemmtilegir viðburðir voru haldnir á árinu út á landi.  Eyjamenn stóðu að miklum myndarskap af Íslandsmóti 15 ára og yngri og náðu metþátttöku en Karl Gauti og félagar hafa unnið þrekvirki í unglingastarfi síðustu misseri.  Bolar héldu flott Íslandsmót í hraðskák í Víkinni og Snæfellingar héldu vel heppnað mót í Ólafsvík.  Flott framtök og vonandi að það verði a.m.k. jafn mörg mót út á landi í ár!

Svo var Skákakademían stofnuð sem hlýtur að vera góður fyrirboði um öflugt skáklíf í borginni. 

Taflfélag ársins

Það hljóta að vera Bolarnir.  Þau tækifæri sem þeir eru að gefa stórmeistaraefnunum eru frábær og virðast strax vera að skila sér. 

Flott innkoma í haust og menn bíða spenntir eftir seinni hlutanum.  Í fyrra var „Winner Takes It All" sem var spilað að loknu móti.  Ætli það verði „We are the Champions" nú eða kannski „Big Spender"!

Félagsmálamaður ársins

Eyjamenn voru sterkir á árinu og Karl Gauti á skilið hól fyrir kröftugt unglingastarf.  Bolvíkingar hljóta hins vegar að eiga þessa nafnbót enda var árið þeirra..  Formaður þeirra Guðmundur Daðaon er félagsmálamaður ársins!

Skáksíða ársisins

Skák.is

Líffæri ársins

Ristillinn.

Ummæli ársins:

Ólafur H. Ólafsson á aðalfundi SÍ þegar hann hafði uppgötvað hverjar væru fulltúrar Skákfélags Selfoss og nágrennnis (Þorfinnur Björnsson og Bragi Þorfinnsson):   „Þeir hafa greinilega staðið sig betur í smöluninni".og Jón L. Árnason eftir einu tapskák Bolanna á Íslandsmóti skákfélaga, við andstæðing sinn, „þú tefldir svo illa að ég fipaðist" og skellihló svo!

Að lokum

Það er óhætt að segja að ritstjóri hefur oft verið bjartsýnni um áramót en nú enda allt í helvítis fokking fokki á landinu!

Nú er þörf á að skákáhugamenn standi saman og ekki síst að bakhjarlar íslenskrar skákhreyfingar standi þétt á bak við íslenska skákmenn og íslenskt skáklíf  Ekki veitir af.

Árið byrjar þó mjög vel með góðri frammistöðu Bjössa, Jóns og Gumma.  Vonandi fyrirboði um skákárið 2009. 

Áfram íslensk skák!  Áfram Ísland!

Gunnar Björnsson 

TR í sterkri stöðu fyrir síðari hlutann

Síðari hluti Íslandsmóts skákfélaga fer fram um helgina á heimavelli Fjölnis í Rimaskóla.  TR er í mjög vænlegri stöðu hefur 3,5 vinnings forskot á Íslandsmeistara Hellis og Hauka sem eru í 2.-3. sæti.  Sveitir  TR og Hellis mætast í lokaumferðinni og það er líklegt að TR verður með forystu fyrir þá umferð. Það eykur svo enn sigurlíkur TR-inga að þeir hafa án efa sterkasta og stigahæsta liðið, með t.d. tvo næsta titilhafa landsins innan sinna raða, og því ólíklegt að liðið liggi fyrir Helli. 

Haukmenn eru jafnir Helli að vinningum en eiga eftir að tefla við bæði TR og Fjölni.  Fjölnir er í fjórða sæti og eiga heldur auðveldari dagskrá en hin toppliðin og gætu því náð þriðja eða jafnvel öðru sæti verði úrslit hagstæð.     

Staðan (í sviga er spáin eins og ritstjóri birti hana sl. haust)

• 1.      (1) TR 25 v.
• 2.      (2) Hellir-a 21½ v. (8 stig)
• 3.      (4) Haukar 21½ v. (6 stig)
• 4.      (3) Fjölnir 20 v.
• 5.      (6) Hellir-b 12½ v.
• 6.      (7) SA-b 11½ v.
• 7.      (5) SA-a 10 v.
• 8.      (8) TV 6 v.

Dagskrá toppliðanna fjögurra:

Umferð	TR	Hellir	Haukar	Fjölnir
5. umferð	Haukar	SA-b	TR	Hellir-b
6. umferð	SA-b	TV	Fjölnir	Haukar
7. umferð	Hellir-a	TR	SA	SA-b

 

Sveitir Hauka og Fjölnis mun væntanlega stilla upp fjórum erlendum skákmönnum en TR og Hellir styðjast sem fyrr við styrkt heimavarnalið.  Með TR tefla Nataf og Galego.  Samkvæmt heimildum ónefnds TR-ings verður Simon Williams, sem lengi hefur staðið til að tefldi með Helli, upptekinn um helgina í brúðkaupi vinar síns.

Ég tel að mestu að fallbaráttan sé ráðin.  SA-b og TV falli.  Fyrrnefnda liðið á eftir að mæta TR, Hellir og Fjölni og mun a-sveit félagsins væntanlega skríða upp fyrir!

SA-a og Hellir-b mun sigla lygnan sjó og enda í 5. og 6. sæti.  

Spáin og hún var birt fyrir fyrri hlutann er því óbreytt.

• 1.      TR
• 2.      Hellir
• 3.      Fjölnir
• 4.      Haukar
• 5.      SA-a
• 6.      Hellir-b
• 7.      SA-b
• 8.      TV

2. deild:

Staðan:

1. (1) Bolungarvík 20 v.
2. (7) Haukar-b 13 v. (4 stig)
3. (4) Reykjanesbær 13 v. (4 stig)
4. (2) TR-b 13 v. (3 stig)
5. (8) Selfoss 12½ v.
6. (3) TG 11 v.
7. (5) Akranes 10½ v.
8. (6) Kátu biskuparnir 3 v.

Eins og svo oft áður er mikil spenna er í 2. deild.  Bolvíkingar eru öryggir um sigur og Kátu biskuparnir öryggir niður.  Annað er algjörlega óráðið og ljóst að sex lið geta fylgt Bolvíkingum upp og sömu lið geta fylgt biskupunum, sem án efa hafa oft verið kátari, niður.   Ég hef trú að það verði TR-ingar sem fylgi Bolvíkingunum upp.  Haukamenn gætu líka verið til alls líklegir og jafnvel Reyknesingar.  Ég spái að Skagamenn eða Selfyssingar fylgi þeim Kátu niður en þar sem yfirmaður minn er lykilmaður í liði Selfyssinga set ég Skagamenn í fallsætið!

Spá ritstjóra:

• 1.      Bolvíkingar
• 2.      TR-b
• 3.      Haukar-b
• 4.      Reykjanesbær
• 5.      TG
• 6.      Selfoss
• 7.      Akranes
• 8.      Kátu biskuparnir

3. deild:

Staðan: 

1. (1) KR 17½ v.
2. (3) Hellir-c 16 v.
3. (2) TR-c 16 v.
4. (5) TG-b 12 v.
5. (4) Dalvík 12 v.
6. (6) TR-d 8 v.
7. (8) TV-b 7 v.
8. (7) Reykjanesbær-b 6½ v.

Í 3. deild berjast þrjú lið um tvö sæti.  KR-ingar og Hellismenn hafa mæst en TR-ingar eiga eftir að tefla við báðar sveitirnar  Líklegt er að TR-ingar mæti hins vegar með töluvert sterkara lið nú en í fyrri hlutanum.  Erfitt er í spilin að spá en ég ætla að giska á óbreytta stöðu á toppnum, þ.e. að KR og Hellir fari upp.  B-liðum Eyjamanna og Reyknesinga spái ég falli.

Spá ritstjóra:

• 1.      KR
• 2.      Hellir-c
• 3.      TR-c
• 4.      TG-b
• 5.      Dalvík
• 6.      TR-d
• 7.      Reykjanesbær
• 8.      TV-b

4. deild

Staða efstu liða:

• 1. (1) Bolungarvík-b 17½ v.
• 2. (2) Fjölnir-b 16½ v.
• 3. (6) Víkingasveitin 16 v.
• 4. SA-c 15½ v.
• 5.-8. Haukar-c, KR-b, Snæfellsbær og Austurland 15 v.

Bolvíkingar fara væntanlega upp og ætla ég að spá að Fjölnir fylgi þeim upp. Víkingarnir vösku, Gunnar Freyr og fleiri gætu þá hæglega sett strik í reikninginn en ég hef minni trú á öðrum liðum.  

Úrslitin í fjórðu deild geta þó verið býsna tilviljunarkennd, t.d. stórsigur í lokaumferðinni gæti tryggt óvænt sæti í 3. deildinni að ári þegar deildin er svo jöfn.  

Að lokum

Rétt er að árétta enn og aftur að þessi spár og pistill er fyrst og fremst settur fram til gamans!  Ekki er pistilinn byggður á ítarlegum geimvísindum!

Rétt er svo að minna á nokkra praktíska hluti. 

• Tímamörkin er 1½ klst. á skákina auk 30 sekúnda á leik. Enginn viðbótartími bætist við eftir fjörtíu leiki.
• Slökkva þarf á GSM-síma. Hringi hann þýðir það umsvifalaust tap.  Stefán Frey vil ég svo sérstaklega minna á að slökkva einnig á vekjaranum í símanum. 
  
• Teflt er í Rimaskóla í Grafarvogi

Síðari hluti Íslandsmóts skákfélaga er einn skemmtilegasti skákviðburður hvers árs. Gera má ráð fyrir spennu í öllum deildum bæði á toppi sem botni og líklegt að úrslit ráðist ekki fyrr en á lokamínútum.  Lokahóf og verðlaunaafhending fer svo fram í Feninu og hefst kl. 22.  

Reynt verður að uppfæra Skák.is eins fljótt og auðið er eftir hverja umferð.  Einnig skilst mér að helsti Chess-Results-sérfræðingur landsins, Páll Sigurðsson, ætli að freista þess að skrá inn úrslitin að einhverju leyti jafnóðum.  Að öðrum kosti mun ég not ég nota mitt hefðbundna trausta excel-skjal!

Spennan er mikil.  Margar spurningar vakna.  Mun ritstjórinn nota orðlagið „Íslandsmeistarar" í sama mæli að keppni lokinni?  Mun Fischer snúa sér við í gröfinni frægu?  Munu óvæntir erlendir skákmenn láta sjá sig í Rimaskóla?  Verður Skákhornið ritskoðað eða óritskoðað, aðfaranótt sunnudagsins?    Hverjir fagna?  Hverjir blóta?   Verður klakkað?

Allt þetta og meira til kemur í ljós um helgina!  Megi besta liðið vinna!

• Heimasíða mótsins
• Chess-Results
• Excel-skjal GB

Gunnar Björnsson

Höfunudur er ritstjóri Skák.is og jafnframt formaður Taflfélagsins Hellis 

TR með forystu eftir fyrri hlutann - fjögur lið eiga möguleika á sigri!

Það fór eins og flestir spáðu að TR myndi hafa forystu eftir fyrri hluta Íslandsmóts skákfélaga.   TR-ingar hafa 3½ vinnings forskot á Íslandsmeistarana í Helli og Haukamenn.  Fjölnismenn koma svo  skammt undan eða 1½ vinningi þar á eftir.  TR á hins vegar erfitt prógramm eftir en þeir eiga bæði eftir Helli, sem þeir mæta í lokaumferðinni, og Hauka.  Það er því allt galopið fyrir lokaátökin sem fram fara 28. febrúar og 1. mars og ljóst að fjögur lið eiga raunhæfa möguleika á sigri þótt staða TR sé auðvitað vænlegust.   Bolvíkingar eru nánast öruggir með sigur í 2. deild en allt er galopið í 3. og 4. deild.

1.  deild

Staðan (spá ritstjóra í sviga)

1. (1) TR 25 v.
2. (2) Hellir-a 21½ v. (8 stig)
3. (4) Haukar 21½ v. (6 stig)
4. (3) Fjölnir 20 v.
5. (6) Hellir-b 12½ v.
6. (7) SA-b 11½ v.
7. (5) SA-a 10 v.
8. (8) TV 6 v
   

Á ýmsu hefur gengið í fyrstu deild.  Til að byrja með var hátt flug á Haukum sem voru í forystu eftir fyrstu tvær umferðirnar en máttu sætta sig við naumt tap fyrir Helli í 3. umferð og þá notuðu TR-ingar tækifærið og náðu fyrsta sæti sem þeir halda enn.

TR-ingar geta ágætlega vel við unað.  Nokkur óstöðugleiki einkenndi þó TR-sveitina, sem þó stillti upp 3-5 stórmeisturum í hverri umferð. Í einni umferðinni var hálft b-liðið farið að tefla með a-liðinu og nánast allt c-liðið úr fyrri umferðum komið í b-liðið.  Það setti skemmtilegan svip á keppnina að Friðrik Ólafsson skildi sjá sér fært að mæta til leiks!  Í fjórðu umferð urðu forföll á síðustu stundu hjá a-liðinu og mátti sá sem þetta ritar taka í hendur á tveimur skákmönnum en sá sem upphaflega átti að tefla við mig færðist við þetta upp um borð og slapp þar með við að lenda í Sláturhúsi GB.  

Íslandsmeistararnir eru í öðru sæti með 21½ vinning.   Fyrsta borðs maður Hellis, Jóhann Hjartarson, forfallaðist með skömmum fyrirvara.  Tékkinn Radek Kalod tók þá vaktina á fyrsta borði en hann var eini stórmeistari Hellis nú.  Karl Þorsteins tefldi með Helli og er það í fyrsta skipti í ein fjögur ár sem hann teflir opinberlega.   Sigurmöguleikar Hellis felast í því að minnka muninn gagnvart TR og ná góðum úrslitum gegn þeim í lokaumferðinni.   Styrkleik Hellis var sem endranær góð liðsheild og hversu menn eru tilbúnir að leggja sig ávallt 100% fram fyrir klúbbinn.  Radek smellpassar svo í hópinn og hvetur menn óspart áfram.

Haukamenn hafa ekki sagt sitt síðasta orð og komi þeir með sterkt lið í seinni hlutanum gætu þeir hæglega hafnað í einum af þremur efstu sætunum.  Mikil og sterk liðsheild einkennir liðið og þar leggja sig allir 100% fram.  Á fyrsti borði teflir Litháinn Kveynis með sitt stóra bros en hann var eini stórmeistari Hauka. 

Fjölnismenn tóku þátt í fyrsta skipti fyrstu deild Íslandsmóts skákfélaga.  Rétt eins og Haukar stilltu þeir upp þremur erlendum leikmönnum í fyrstu umferð en í þeirri annarri var sá fjórði mættur, stórmeistarinn (Likavesky). Ástæðan var sú að hann missti af flugi deginum áður og var því of seinn í fyrstu umferð þegar félagið mætti TR.  Með Fjölni tefldu því 4 stórmeistarar.  Á fyrsta borði tefldi hinn geðþekki Tékki Oral og vann hann m.a. Hannes Hlífar í fyrstu borði en það er fátítt að Hannes tapi skákum í keppninni. Á öðru borði tefldi okkar nýjasti stórmeistari Héðinn Steingrímsson.   Fjölnismenn eru búnir bæði með TR og Helli og geta með góðum úrslitum blandað sér í baráttuna um Íslandsmeistaratitilinn.  

B-sveit Hellis er í fimmta sæti.  Þar stóð uppúr góð frammistaða Gunnars Björnssonar sem vann allar sínar skákir fjórar að tölu og er samkvæmt lauslegum rannsóknum ritstjóra sá eini í fyrstu deild sem afrekaði það.   Oft hefur verið ýjað að því að b-sveitarmenn beiti sér ekki gegn eigin a-sveit en ljóst er það á ekki við Hellismenn því formaður félagsins, sem tefldi með b-sveitinni, og er einnig liðsstjóri liðsins, vann sína skák!   Hann reyndar bætti það upp með því sigra einnig andstæðinga sína hjá TR og Haukum.

B-sveit SA er í sjötta sæti og er athyglivert að þeir eru fyrir ofan a-sveitina.  Rétt eins og venjulega markaði b-sveitin verulega á a-sveitina en þar urðu úrslitin 5-3 a-sveitinni í vil.   Margt  bendir þó til þess að sveitin falli því andstæðingarnir í seinni hlutanum verða m.a. TR og Hellir a-sveit. 

A-sveit SA er í sjöunda sæti.  Sveitin mun færast ofar enda fékk hún geysierfitt prógramm í fyrri hlutanum.  Mikil forföll voru hjá Akureyringum að þessu sinni.  Ýmist voru menn uppteknir erlendis, innanlands eða vildu jafnvel ekki tefla í mótmælaskyni! 

Eyjamenn eru í áttunda og síðasta sæti.  Lið þeirra var veikt eins og vitað var fyrirfram.  Helgi Ólafsson tefldi þrjár skákir, allar skákirnar nema gegn TR þar sem hann átti að hafa svart gegn Hannesi Hlífari.  Í þeirri viðureign vantaði einnig annað borðs manninn, Pál Agnar.  Stefán Þór Sigurjónsson tefldi þá á fyrsta borði en ég held að ég fari rétt með að hann hafi ekki komist í a-liðið í fyrra.   Það breytti því ekki að Eyjamenn náðum hálfum vinningi á TR en Sigurjón Þorkelsson gerði stutt jafntefli við Galego.   Skyldi þessi hálfi vinningur skipta svo máli í lokin?

Nokkur skemmtileg atvik áttu sér stað eins og venjulega.  Í viðureign SA og Hellis lék norðanmaður  ólöglegum leik.  Hellisbúinn drap kónginn, sem má ekki, og stað þess að kalla á skákstjóra raðaði sá norðlenski upp mönnunum og gaf þar með skákina.  Rétt hefði hins vegar að halda skákinni áfram og láta Hellisbúann fá aukatíma!  Menn gleyma sér stundum í hita leiksins.  

2. deild

Staðan:

1. (1) Bolungarvík 20 v.
2. (7) Haukar-b 13 v. (4 stig)
3. (4) Reykjanesbær 13 v. (4 stig)
4. (2) TR-b 13 v. (3 stig)
5. (8)  Selfoss 12½ v.
6. (3) TG 11 v.
7. (5) Akranes 10½ v.
8. (6) Kátu biskuparnir 3 v.

Það heyrir til undantekninga ef ritstjóri spáir að einhverju viti fyrir 2. deild og margt bendir til að svo sé einnig nú.   Bolvíkingar eru langefstur og Kátu biskuparnir, sem varla eru kátir með stöðuna núna, eru langneðstir.  Öll hin liðin er einum hnapp og aðeins munar 2½ vinning á milli 2. og 7. sæti.  Ég hef reyndar trú á því að TR-ingar fylgi Bolvíkingum upp enda styrkist b-lið þeirra til muna í síðari hlutanum.  

Lið Kátra er einfaldlega ekki nógu sterkt fyrir 2. deild en þeir fengu engan liðsauka nú að utan eins og þeir gerðu í fyrra sem hefði verið lífspursmál fyrir þá hefðu þeir vilja haldi sínu sæti í deild þeirra næstbestu.  Ómögulegt er að segja hverjir munu fylgja þeim niður. 

3. deild.

1. (1) KR 17½ v.
2. (3) Hellir-c 16 v.
3. (2) TR-c 16 v.
4. (5) TG-b 12 v.
5. (4) Dalvík 12 v.
6. (6) TR-d 8 v.
7. (8) TV-b 7 v.
8. (7) Reykjanesbær-b 6½ v.

Ritstjóri virðist hafa verið óvenju glöggur í spánni fyrir þriðju deild.  Þar eru KR-ingar efstir en eru engan vegin öruggir um að vinna sér sæti í 2. deild að ári því líklegt er að bæði sveitir Hellis og TR muni koma sterkari til leiks að ári.  TR-ingar eiga bæði eftir að tefla við KR og Helli og staða Hellis því nokkuð vænleg.   Botnbaráttan er ekki síður spennandi.   Líklegt er að úrslitin ráðist ekki fyrr en á lokasekúndunum.

4. deild

Staðan:

1. (1) Bolungarvík-b 17½ v.
2. (2) Fjölnir-b 16½ v.
3. (6) Víkingasveitin 16 v.
4. SA-c 15½ v.
5.-8. Haukar-c, KR-b, Snæfellsbær og Austurland 15 v.
9. Hellir-f 14½ v.
10. Selfoss-b 14 v.
11.-15. Reykjanesbær-c, Haukar-d, TV-c, UMFL og TG-c 13 v.
16.-17. Sauðárkrókur og Hellir-d 12½ v.
18.-19. Goðinn og Hellir-g 12 v.
20. TR-e 11 v.
21. UMSB 9½ v.
22, SA-d 8½ v.
23.-24. Haukar-e og Hellir-e 7 v.
25.-26. Fjölnir-c og Skákdeild Ballar 6 v.
27. TR-f 5 v.

Í fjórðu deild getur einnig allt gerst.  Líklegast er þó að Bolvíkingar, Fjölnismenn og jafnvel Víkingasveitin berjist um sætin tvö.  Gaman er að sjá klúbba eins og Snæfellinga og Austlendinga blanda sér í baráttuna.  Hrafn Jökulsson tefldi fyrir Snæfellinga og var óvenjulegt að sjá þann mikla skákfrömuð láta sér duga að tefla „bara".    Hann stóð sig víst vel og vann m.a. Erling Þorsteinsson.

Að lokum

Eins og venjulega fór keppnin vel fram.  Aðstæður í Rimaskóla eru til mikillar fyrirmyndar og enn skemmtilegra þegar allir tefla í einum sal.    Haraldur Baldursson var röggsamur yfirdómari sem sá til þess að allt gengi vel fyrir sig.   Eina sem mér finnst vanta er að fá ekki einstaklingsúrslit en við það er erfitt að eiga því allir sem vettlingi geta valdið tefla í keppninni, og þeir sem ekki tefla eru gerðir að skákstjórum! 

Ef til vill ætti SÍ að íhuga að borga fyrir það og fá einhvern utanaðkomandi til að slá þessu jafnóðum inn.  Reyndar mikil vinna fyrir viðkomandi.  Einnig verður SÍ að beita sér fyrir að skákir mótsins verði slegnar inn.

Jæja, þá er skemmtilegum fyrri hluta lokið og ljóst að menn geta farið að hlakka til fyrir þann seinni sem fram fer 28. febrúar og 1. mars og vonandi einnig í Rimaskóla.

Megi besta liðið vinna!

Gunnar Björnsson

Höfundur er ritstjóri Skák.is og formaður Taflfélagsins Hellis

Fyrri hluti Íslandsmóts skákfélaga

Fyrri hluti Íslandsmóts skákfélaga fer fram næstu helgi í Rimaskóla.  Venju samkvæmt ætlar ritstjóri Skák.is að spái í spilin.  Í fyrstu deild virðast TR-ingar hafa sterkasta liðið en þeir fengið til liðs við sig tvo sterka skákmenn úr Taflfélagi Vestmannaeyja þá Nataf og Galego auk þess sem sjálfur Íslandsmeistarinn Hannes Hlífar Stefánsson er genginn til liðs við klúbbinn.  

Aldrei má vanmeta Íslandsmeistarana, fyrirgefið orðalagið sem sýndu það í fyrra að þeir eru sýnd veiði en ekki gefin þegar þú unnu óvæntan sigur á Íslandsmótinu.   Svo gæti þriðja Reykjavíkurliðið, Fjölnismenn einnig blandað sér í baráttuna en þeir mæta væntanlega með fjóra stórmeistara til leiks og þar á meðal með okkar nýjasta stórmeistara Héðinn Steingrímsson væntanlega á fyrsta borði.  

Sagan gæti verið með Helli.  Rétt eins og í fyrra töpuðu þeir örugglega fyrir TR í Hraðskákkeppni taflfélaga og voru langt fyrir neðan sama félag í EM taflfélaga.  En þegar kom að Íslandsmóti skákfélaga sýndu Hellisbúar hver sé pabbinn og unnu góðan sigur.  Mun sagan endurtaka sig?

Stigahæsti skákmaður landsins, Jóhann Hjartarson er genginn til liðs við Íslandsmeistarana og er ætlað að fylla skarð Hannesar.

Önnur félög eru ekki líkleg til að blanda sér í toppbaráttuna.  Haukamenn eru líklegastir til að hreppa fjórða sætið en Akureyringar gætu þó blandað sér í þá baráttu.

Í fallbaráttunni berjast væntanlega b-sveitir Hellis og SA og svo silfurlið Eyjamanna sem hafa misst flesta sína best menn nema þá Helga Ólafsson og Sævar Bjarnason.  

Ég spái TR-ingum öruggum sigri.  Lið þeirra er einfaldlega mun sterkara en önnur lið.  Hellismenn og Fjölnismenn berjast svo væntanlega um annað sætið. 

Spá ritstjóra:

• 1. TR
• 2. Hellir-a
• 3. Fjölnir
• 4. Haukar
• 5. SA
• 6. Hellir-b
• 7. TV
• 8. SA-b

2. deild

Í 2. deild hljóta Bolvíkingar að teljast líklegastir til afreka.  Einnig sýnist mér TR-b ætti að fylgja þeim nokkuð örugglega upp.  Helst gætu Garðbæingar og Reyknesingar blandað sér í þá baráttu.  Erfitt er spá um fallbaráttuna en ég spái Selfyssingum og b-sveit Hauka falli.  Samt ég vil setja mikla fyrirvara við við það enda mjög erfitt ávallt að spá í spilin í 2. deild þar sem liðin þar eru afar jöfn.  

Spá ritstjóra

• 1.       Bolungarvík
• 2.       TR-b
• 3.       TG
• 4.       SR
• 5.       TA
• 6.       Kátu biskuparnir
• 7.       Haukar-b
• 8.       Selfoss

3. deild.

Ég spái því KR-ingar endurheimti sæti sitt í 2. deild.  Þeir hafa styrkt sig og voru í raun og veru með of sterkt lið í fyrra til að falla.  Ómögulegt er að spá hverjir fylgi þeim upp.  Í þá baráttu gætu c-sveitir TR og Hellis blandað sér og jafnvel Dalvíkingar.  Styrkleiki c-sveitanna fer þó mikið eftir því hvernig þeim gengur að manna sveitirnar í 1. og 2. deild.  Ég ætla að spá c-sveit TR öðru sætinu.  Ég spái TV-b og SR-b falli en rétt eins og í 2. deild er erfitt að spá í spilin.  Einnig gætu TG-b og Dalvíkingar blandað sér í fallbaráttuna.     

Spá ritstjóra

• 1.       KR
• 2.       TR-c
• 3.       Hellir-c
• 4.       Dalvík
• 5.       TG-b
• 6.       TR-d
• 7.       SR-b
• 8.       TV-b

4. deild.

Í fjórðu deild er 31 lið skráð til leiks sem er er met.  Við eitt félagið kannast ég ekki, þ.e. Skákdeild Ballar.   Víkingasveitin er annað nýtt  félag en þar eru ferðinni ýmsir sterkir skákmenn og gæti sú sveit blandað sér í toppbaráttuna.

Mér finnst líklegast að B-sveit Bolungarvíkur hafi sigur í deildinni en við styrkingu a-sveitarinnar er ljóst að margir sterkir skákmenn munu tefla með b-sveitinni.   Ég spái að annað sætið falli b-sveit Fjölnis í skaut.  Aðrar sveitir sem kunna að blanda sér í baráttuna gætu verið b-sveit KR, d-sveit Hellis , Austlendingar, Víkingasveitin og örugglega fleiri sveitr.   

Spá ritstjóra:

• 1.       Bolungarvík-b
• 2.       Fjölnir-b
• 3.       KR-b
• 4.       Hellir-d
• 5.       Austurland
• 6.   Víkingasveitin
  

6.

Að lokum

Eins og venjulega vil ég benda mönnum á að taka þessa spá með öllum mögulegum fyrirvörum.  Hún er sett fram til gamans og það má öllum vera ljóst að ritstjórinn veit ekki allt um liðsskipan allra liða!

Ég hlakka til helginnar og óska skákmönnum gleðilegrar hátíðar!

Gunnar Björnsson

Höfundur er Ritstjóri Skák.is og formaður Taflfélagsins Hellis