Þriggja turna tal - Huginn í forystu

Fyrri hluti Íslandsmóts skákfélaga fór fram um helgina í Rimaskóla. Fyrir helgina spáði ritstjóri að tveir turnar (Huginn og TR) myndu berjast um dolluna. Niðurstaðan er hins vegar að þeir séu þrír - þ.e. Taflfélag Vestmannaeyja er aðeins einum vinningi á eftir Hugin sem er efst. B-, C- og D-sveitir TR eru í forystu í 2.-4. deild.

Fyrsta deild

Staða Hugins er óneitanlega best í 1, deildinni því sveitin er í forystu og á auk þess eftir heldur slakari andstæðinga en keppninautarnir.  Það er athyglisvert að öll félögin unnu hvort annað í kross. Liðin hafa því öll jafn mörg stig en innbyrðisúrslit gætu ráðið úrslitum ef aðeins tvö lið verða efst og jöfn.

Staðan:

Rk.	Spá	Team	TB1	TB2
1	1-2	Skákfélagð Huginn a-sveit	28,5	8
2	1-2	Taflfélag Reykjavíkur	28	8
3	3	Taflfélag Vestmannaeyja	27,5	8
4	6	Skákdeild Fjölnis	23	6
5	4	Taflfélag Bolungarvíkur	21,5	6
6	8	Skákfélagið Huginn b-sveit	18	5
7	7	Skákfélag Akureyrar	18	4
8	5	Víkingaklúbburinn	12,5	2
9	9	Skákfélag Reykjanesbæjar	12	1
10	10	Skákfélag Íslands	11	2

Ritstjóri taldi að TR myndi verða í forystu  eftir fyrri hlutann í ljósi þess að félagið fengi heldur lakari andstæðinga. Ritstjóri  hélt reyndar að TR yrði stigahærri en Huginn, sem reyndist ekki rétt. Ég stóð ég í þeirri trú að þeir myndu tefla fram öðrum sterkum úkraínskum stórmeistara ásamt Oleksienko í stað Danans Jakob Vang Glud sem náði sér ekki á strik.

Fjölnismenn áttu gott mót sem og Akureyringar. Titilvörn Víkingaklúbbsins byrjaði ekki vel en þeir fá léttara prógramm í síðari hlutanum og ættu því að geta fjarlægst fallbaráttuna.  

Akureyringar stóðu sig best stigalega séð í fyrri hlutanum og hækka samtals um 65 skákstig.  Jón Kristinn fór þar langfremstur í flokki með 68 stig og hækkar mest allra einstaklinga í efstu deild.

Huginn-b kemur næstur með 32 skákstig í plús og Eyjamenn þriðju með 28 stig. Önnur lið sem hækka samtals á stigum eru Huginn-a (14) og SR (4).  Liðin sem lækka eru:  TR(-3), Fjölnir (-5), TB (-13), Víkingaklúbburinn (-36) og SFÍ (-53).

Henrik Danielsen og Sigurbjörn Björnsson (TV), Jón Viktor Gunnarsson (TR) og Dagur Ragnarsson (Fjölnir) fengu 4½ vinning af 5 mögulegum.

Ivan Cheparinov (Huginn) stóð sig best stigalega með árangur upp á 2741 skákstig. Næstir voru Henrik , Jóhann Hjartarson (TB), Nils Grandelius (TV) og Hannes Hlífar Stefánsson (TR). Sjá nánar á Chess-Results.

Fyrirkomulagið

Umræður um fyrirkomulag hefur farið hátt á Facebook-hópi íslenskra skákmanna  sem tekið hefur við hlutverki Skákhornsins.

Bent hefur verið á mikill munur hafi verið á b-sveit Hugins á milli umferða. Sérstaklega í fyrstu umferð þar sem bæði a- og b-sveitir Hugins voru mun lakari en í hinum umferðunum fjórum.  Mikill styrkleikamunur á milli umferða á Íslandsmóti skákfélaga er ekki einskorðaður við Huginssveitirnar. Til dæmis var mikill munur á styrkeika Bolvíkinga á milli umferða.

Lenka kom með góða lausn á þessu en hún er sú að a- og b-lið mætist í annarri umferð á föstudagskvöldinu en ekki á fimmtudagskvöldinu þegar engar aðrar deildir eru í gangi.

Umræða hefur einnig verið um fyrirkomulag mótsins. Jóhann Hjartarson og Helgi Ólafsson komu fyrstir fram með hugmynd um að breyta efstu deild í úrvalsdeild þar sem sex lið tefldu tvöfalda umferð  og b-lið fengju þar ekki keppnisrétt. Margir hafa tekið undir hugmyndir okkar sterkstu skákmanna. Þá yrðu tefldar 10 umferðir í stað níu nú. Áfangamöguleikar aukast - bæði vegna fjölda umferða og ekki síst vegna þess að liðin í sex liða deildinni verða sterkari.

Til að koma á móts við b-lið mætti veita Íslandsmeistaratitil b-liða fyrir það b-lið sem stendur sig best.

Kostnaður myndi reyndar aukast vegna þess að væntanlega yrði þá teflt í efstu deild í þremur hlutum. Kostnaður myndi þó ekki aukast verulega því ferðakostnaður er ekki stærsti kostnaðurinn við komu erlendra stórmeistara.

Gera má ráð fyrir að fyrirkomulagið verði rætt í þaula í nefnd um Íslandsmót skákfélaga sem skipuð er níu manns frá jafnmörgum félögum, undir forystu Halldórs Grétars Einarssonar en nefndinni er ætlað að koma fram með tillögu(r) fyrir næsta aðalfund SÍ.

2. deild

Rk.	Spá	Team	TB1	TB2
1	1	Taflfélag Reykjavíkur b-sveit	16,5	7
2	5	Skákdeild KR	16	5
3	4	Taflfélag Garðabæjar	14,5	6
4	6	Skákfélag Akureyrar b-sveit	14,5	6
5	3	Vinaskákfélagið	13,5	4
6	2	Skákdeild Hauka	11,5	3
7	N/A	Skákfélagið Huginn c-sveit	8	1
8	7	Víkingaklúbburinn b-sveit	1,5	0

 

Í 2. deild urðu þær breytingar skömmu fyrir mót að b-sveit Bolvíkinga dró sig úr keppni. Við sæti þeirra tók c-sveit Hugins.  Flest bendir til þess að b-sveit TR fari upp í fyrstu deild en sveitin hefur fengið flestar sterkustu sveitirnar. Hver fylgir þeim upp er hins vegar óljósara en KR-ingar virðast líklegastir.

Ekkert virðist geta komið í veg fyrir að b-sveit Víkingaklúbbsins falli niður og staða c-sveitar Hugins er erfið en þó ekki vonlaus enda er hún búin að tefla við flestar sterkustu sveitirnar.

3. deild

Rk.	Spá	Team	TB1	TB2
1	2	Taflfélag Reykjavíkur c-sveit	8	18,5
2	5	Skákfélag Selfoss og nágrennis	7	14
3		Skákdeild Fjölnis b-sveit	6	16
4		Ungmennasamband Borgarfjarðar	4	14
5		Skákfélag Íslands b-sveit	4	14
6		Skákfélagið Huginn d-sveit	4	13,5
7		Skákfélag Reykjanesbæjar b-sveit	4	13
8		Skákdeild KR b-sveit	4	13
9		Skákfélagið Huginn e-sveit	4	12,5
10		Skákfélag Akureyrar c-sveit	4	11,5
11		Skáksamband Austurlands	3	12
12		Skákfélag Akureyrar d-sveit	2	8
13		Taflfélag Reykjavíkur ung-a	2	6,5
14		Skákfélagið Huginn f-sveit	2	5,5

 

Ritstjóri spáði fyrir mót að Huginn-c yrði í efsta sæti en sveitin fluttist sjálfkrafa upp í 1. deild við forföll. Ritstjóri spáði Briddsfjelaginu og b-sveit Eyjamanna 3. og 4 sæti en báðar sveitirnar drógu sig úr keppni. Briddsfjelagið sameinaðist Vinaskákfélaginu sama dag og Íslandsmótið hófst. Fjölnir-b sem tók sæti í þriðju deild við þessi forföll er í þriðja sæti.

Spennandi barátta framundan en það kæmi ekki ritstjóra óvart ef þessar þrjár sveitir myndu raða sér í efstu sætin að móti loknu. TR-c er líklega á leiðinni upp um deild.

4. deild

Rk.	Spá	Team	TB1	TB2	TB3
1	1	Taflfélag Reykjavíkur d-sveit	8	20,5	0
2	3	Skákfélag Sauðárkróks	6	17	0
3		Taflfélag Garðabæjar b-sveit	6	15	0
4		Skákfélag Siglufjarðar	6	13,5	0
5		Skákfélagið Huginn ung-a	5	13	0
6		Skákgengið	4	15	0
7		Taflfélag Reykjavíkur e-sveit	4	12	0
8		Skákdeild Fjölnis c-sveit	4	12	0
9		Vinaskákfélagið b-sveit	4	12	0
10		UMSB b-sveit	4	11,5	0
11		Skákdeild Hauka b-sveit	4	11	0
12		Skákfélag Íslands c-sveit	4	10	0
13		Víkingaklúbburinn d-sveit	3	11	0
14		Skákfélagið Huginn ung-b	2	7	0
15		Taflfélag Reykjavíkur ung-b	2	6,5	0
16		Taflfélag Reykjavíkur ung-c	0	6,5	0

 

Það er sama með spá ritstjóra hér og í 3. deild. Þrjú af þeim liðum sem ritstjóri spáði á topp 5 fóru upp í 3. deild við forföll en það voru b-sveitir Fjölnis, KR og Skáksambands Austurlands.

D-sveit TR er áberandi besta sveitin en hvaða sveitir fylgja þeim er óljósara. Liðin í 2.-4. sæti eru öll líkleg og einnig Skákgengið. Skákgengið þarf hins vegar að gerast aðili að SÍ vilji það flytjast upp um deild.

Brottfall

Töluvert brottfall varð á lokametrum mótsins. Það vakti töluverða athygli þegar b-sveitir sterkra sveita eins og TV og TB drógu sig út úr mótinu. Ég sannarlega vona að þessi þróun gangi til baka. Jafnmargar sveitir tóku hins vegar þátt nú og í fyrra.

Fjórmenningarnir

Gamla fjórmenningarklíkan, Jóhann Hjartarson, Helgi Ólafsson, Margeir Pétursson og Jón L. Árnason, sem skipa munu b-sveit Íslands á EM landsliða að ári, stóðu sig vel á mótinu. Fjórmenningarnir fengu 9½ af 12 mögulegum og hækka allir á stigum sem lofar óneitanlega góðu fyrir EM!

Mótshaldið

Mótshaldið tókst afar vel um helgina. Það er ekki síst vegna góðs starfsfólk. Helgi og hans fólk í Rimaskóla hélt óaðfinnanlega utan um allt í húsinu.

Sú breyting að halda 4. deildina í öðru rými gekk einnig vel og skapaði aukið rými.

Omar Salama og Steinþór Baldursson stjórnuðu hlutunum eins og herforingjar í stóra salnum og Ólafur S. Ásgrímsson og Bragi Kristjánsson í þeim minni. Innsláttur úrslita var í höndum Steinþórs og nánast villulaus. Það fer ekki framhjá manni að skákmenn eru afar þakklátir fyrir þessa góðu þjónustu.

Þeim félögum sem lánuðu SÍ töfl og klukkur fá  einnig sérstakar þakkir. Þar er Huginn fremstur í flokki en félagið lánaði t.d. öll settin í 1. deild. 

Höfuðmeiðsl - þó ekki alvarleg

Skákmenn eru mistapsárir eins og gengur. Einn keppandi tók tapi heldur illa og setti skorblaðið saman í vöndul og grýtti honum. Skipti þar engum togum að skorblaðið lenti á hausnum á Vigfúsi Ó. Vigfússyni, varaformanni Hugins, sem slasaðist að sögn kunnugra þó ekki alvarlega.

Skemmtilegt (ættar)mót

Stemningin á Íslandsmóti skákfélaga er einstök. Oft hefur verið talað um keppnina sem ættarmót/árshátíð. Skipta þar úrslitin e.t.v. ekki öllu máli - heldur félagsskapurinn og stemningin!

Seinni hluti Íslandsmóts skákfélaga fer fram 19.-21. mars 2015. Væntanlega einnig í Rimaskóla.

Gens Una Sumus - Við erum öll af sama sauðahúsi.

Gunnar Björnsson,
liðsmaður í b-sveit Hugins