Spennandi og dramatísk keppni í Rimaskóla – Huginsmenn leiða í hálfleik

Fyrri hluti Íslandsmóts skákfélaga reyndist hin besta skemmtun. Mikil spenna á skákborðinu og utan þess og hádramatískar uppákomur. Huginsmenn hafa 2½ vinnings forskot fyrir síðari hlutann og verða að teljast heppnir en útlitið var afar slæmt um tíma í lokaumferðinni gegn Fjölni. TR-ingar geta vel við unað – eru enn með í baráttunni um Íslandsmeistaratitilinn þótt að betri úrslit gegn Reyknesingum í lokaumferðinni hefði gert stöðu þeirra enn betri. 

Fjölnir, Víkingaklúbburinn og Bolungarvík berjast um bronsið og öll hin fimm liðin eru í fallbaráttu. Stefnir í gríðarlegan spennandi síðari hluta í mars.

1. deild 

Staðan (spá ritstjóra fyrir keppni í sviga) 

1. (1) Huginn 30½ v.
2. (2) TR 28 v.
3. (4) Fjölnir 22 v.
4. (3) Víkingaklúbburinn 21 v.
5. (5) TB 19 v.
6. (6) SA 16½ v. (4 stig)
7. (8) KR 16½ v. (2 stig)
8. (10)SR 16 v.
9. (7) Huginn-b 15½ v.
10. (9) TR-b 15 v.

Spá ritstjóra virðist vera nokkuð nærri miðað við stöðuna í hálfleik og frávik mest tvö sæti.

Athyglisvert er að skoða stigabreytingar. Samkvæmt þeim stóð b-sveit TR sig best allra hlutfallslega eða með 42 stig í plús. Þar skiptir langmestu að Vignir Vatnar hækkar mest allra í fyrstu deildinni eða um 56 skákstig. Bolvíkingar hækka um samtals 39 skákstig og a-lið TR um 12 stig. 

B-sveit Hugins stóð sig samkvæmt sömu mælingu verst allra liða hlutfallslega en liðsmenn töpuðu samtals 34 skákstigum í fyrri hlutanum. 

Vert er að benda á frammistöðu nokkurra skákmanna. Bragi Þorfinnsson, sem tefldi á fyrsta borði TR, hlaut 4½ vinning. Það fengu einnig Huginsmennirnir Hjörvar Steinn Grétarsson og Ingvar Þór Jóhannesson en þeir voru neðar í sínum sveitum.

Rétt er einnig að benda á frammistöðu Hrannars Baldurssonar (KR) og Tómasar Björnssonar (Fjölni) en báðir fengu þeir 4 vinninga í 4 skákum. Hrannar tefldi í þremur af fjórum skákum töluvert upp fyrir sig stigalega. 

Baráttan var ekki síður utan borðs og höfðu skákstjórar í ýmsu að snúast. Dæmt var tap á einn skákmann í fjórða deild þar sem honum varð það á að hafa á sér síma og taka hann upp í miðri skák. 

Einn keppandi í fyrstu deild bauð jafntefli á umhugsunartíma andstæðingsins sem er óleyfilegt skv. FIDE-reglum. Andstæðingur hans sýndi hárrétt viðbrögð. Stöðvaði þegar í stað klukkuna og kom kvörtun áleiðis til skákstjóra sem aðvaraði viðkomandi. 

2. deild 

1. (1) TG 14½ v. (6 stig)
2. (3) SA-b 14½ v. (5 stig)
3. (6) Huginn-c 13 v.
4. (8) SFÍ 12 v.
5. (4) TR-c 11½ v.
6. (2) Vinskákfélagið 11 v. (4 stig)
7. (5) Haukar 11 v. (3 stig)
8. (7) Fjölnir-b 8½ v.

Ekki er spáin jafn nákvæm fyrir aðra deild og þá fyrstu enda miklu mun erfiðara að spá í spilin í deild þeirra næstbestu.

Ritstjóri spáði TG góðu gengi og virðist þar hafa haft rétt fyrir sér. Ég átti reyndar von á betra gengi Vinaskákfélagsins en það munar um minna þegar annað borðs manninn vantaði alfarið. 

Ritstjóri spáði Skákfélagi Íslands falli en þeir byrjuðu vel og eru í efri helmingi mótsins. Staða Fjölnis-b er ekki góð og verkefnið að halda sér uppi erfitt. Aðeins munar 2 vinningum á verðlauna- og fallsæti svo í raun og veru getur allt gerst upp í 2. deildinni í síðari hlutanum.

3. deild

Selfyssingar eru í miklu stuði í 3. deild og hafa unnið allar sínar viðureignir. Svolítið athyglisvert staðreynd í ljósi þess að mér var kunnugt um að þeir hafi lent í mönnunarvandræðum. Hrókar alls fagnaðar og b-sveit Reyknesinga eru í 2. og 3. sæti með 6 stig. 

Í 3. og 4. deild gilda stig, þ.e. veitt eru 2 stig fyrir sigur, 1 fyrir jafntefli. Verði lið jöfn af stigum gilda vinningar. 

Staðan 

1. (1) SSON 8 stig
2. (6) Hrókar alls fagnaðar 6 stig (15½ v.)
3. (4) SR 6 stig (13½ v.)
4. SA-c 5 stig
5. (3) TR-d 5 v.
6. Skákfélag Siglufjarðar 4 stig
7. Vinaskákfélagið-b 4 stig
8. Huginn-d 4 stig
9. SAUST 4 stig
10. TG-b 3 stig
11. (2) UMSB 2 stig
12. (5) KR-b 2 stig
13. Skákgengið 2 stig
14. Breiðablik 1 stig
     

Það er nokkuð ljóst að ritstjóri vanmat Hrókana sem eru líklegir til þess að tryggja sér keppnisrétt í 2. deild að ári. Einnig virðist ég hafa ofmetið UMSB og KR-b sem ég spáði að yrðu frekar í toppbaráttu en botnbaráttu. Ýmislegt getur þó breyst í lokaátökunum. 

4. deild 

Ritstjóri spáði aðeins fyrir um efstu þrjú sætin og virðist hafa lesið toppbaráttuna nokkuð vel. E-sveit TR virðist einnig vera til alls líkleg. 

Staðan 

1. (3) Víkingaklúbburinn-b 8 stig
2. (2) Sauðárkrókur 7 stig
3. TR-e 6 stig
4. (1) TV 5 stig
5. Vinaskákfélagið-c 5 stig
6. Fjölnir-c 5 stig
7. Huginn-e 4 stig
8. Breiðablik-b 4 stig
9. TRung-a 4 stig
10. Víkingaklúbbruinn-c 2 stig
11. Huginn-ung 2 stig
12. Fjölnir-d 2 stig
13. SA-d 2 stig
14. TRung-b 0 stig

 

Íslandsmót skákfélaga er alltaf eitt skemmtilegasta mót hvers árs. Þangað mæta allir skákmenn sem vettlingi geta valdið og gera menn sér jafnvel ferð erlendis frá eins og t.d. Hrannar Baldursson og Sverrir Þorgeirsson til að tefla í keppninni.

Elstu keppendurnir voru 83 ára, þeir Gunnar Gunnarsson og Páll G. Jónsson úr KR. Sá yngsti var Jósef Omarsson, ú Hugin, aðeins 5 ára. Hann vann eina skák um helgina!

Eins og venjulega var það Ásdís Bragadóttir sem undirbjó mótshaldið af sínum alþekkta myndarskap. Undirritaður var skákstjóri, ásamt Hallfríði Sigurðardóttur, Ólafi S. Ásgrímssyni og Ingibjörgu Eddu Birgisdóttur, yfirdómara mótsins. 

Inga er á stuttum tíma orðin einn af okkar öruggustu og bestu dómurum og leysti þau vandamál sem upp komu á sköruglegan hátt. Ólafur er sem fyrr einn okkar allra traustasti skákstjóri. Ekki amalegt að hafa svona góða samstarfsmenn. 

Hallfríður sá um innsláttinn og gerði það svo fljótt að úrslit voru iðulega komin á vefinn aðeins nokkrum mínútum eftir lok skápa. Féll það í afar góðan farveg. 

Heyrði ég sögu af stórmeistara sem var að fylgjast með heiman frá sér að lokinni sinni skák. Þegar hann sá úrslitin í skák Helga Ólafssonar og Robert Ris endurhlóð hann Chess-Results þrisvar sinnum því hann beið eftir að úrslitin yrðu leiðrétt. Að lokum gafst hann upp og hringdi í Helga og fékk þá heyra söguna um hvernig Helgi náði að snúa gjörtapaðri stöðu sér í vil!

Síðari hlutinn verður haldinn 2.-4. mars nk. Sjáumst þá!

Gunnar Björnsson