Víkingar með örugga forystu

Fyrri hluti Íslandsmóts skákfélaga fór fram um helgina. Mótshaldið fór fram í Rimaskóla og gekk afar vel. Þótt ritstjóri skynji leiða sumra gagnvart Rimaskóla eru aðstæður þar frábærar. Góð lýsing, góð loftræsting og gott pláss bæði í skáksal og utan hans. Fólkið í veitingasölunni stendur sig frábærlega og þjónustan við okkur skákmennina er framúrskarandi góð. Helgi Árnason, formaður Fjölnis og skólastjóri Rimaskóla á skilið mikið hrós. 

Skáksambandið býr svo vel að eiga frábært starfsfólk. Halla stendur sig frábærlega í að koma úrslitum á netið og svei mér ef hún er stundum ekki búin að birta áður en skákunum lýkur. Skákstjóraliðið ekki amalegt. Skákirnar eru ekki í beinni sem bíður upp á meiri afslöppun á skákstað því ef þær væru sýndar beint þyrfti að taka mun harðar á allri símanotkun í Rimaskóla. Hentar reyndar ekki þeim sem eru utan “þjónustusvæðis” – en býr til afslappaðra andrúmsloft á skákstað en ella. Úrvalslið skákstjóra sá um fyrri hlutann undir öryggri stjórn Ingu yfirdómara. 

Sterkir skákmenn settu svip sinn á keppnina og var einkar gaman að sjá “fjórmenningarklíkuna” alla tefla um helgina. Sjaldan hefur keppnin verið sterkari og þess má geta að 18 af 20 stigahæstu skákmönnunum tefldu í fyrri hlutanum. Af þeim sem búa hérlendis tóku 18 af 19 sterkustu skákmönnum landsins þátt!

1. deild

Það var vitað fyrir mót að Víkingaklúbburinn væri langbestur. Frammistaða hans var hins vegar framúrskarandi góð. Að hafa hlotið 37 vinninga í 40 skákum er ótrúleg frammistaða. Engin skák tapaðist, 34 skákir unnust og aðeins 6 fóru jafntefli. Ekkert getur komið í veg fyrir stórsigur Víkinga í mars nk. Eina spurningin er bara – hversu stór verður sigur Víkinganna. Ná þeir að vinna deildina með tveggja stafa tölu?

Huginsmenn eru 6 vinningum á eftir Víkingum. Ég geri ráð fyrir að Huginsmenn hefðu gjarnan viljað vera nær Víkingum fyrir síðari hlutann til að eiga möguleika sem er greinlega runninn þeim úr greipum. Tækifærið er farið.

Fjölnismenn hafa staðið sig vel og eru í góðri stöðu í baráttunni um bronsið fyrir seinni hlutann.

Taflfélag Reykjavíkur og Skákfélag Akureyrar eru í 4.-5. sæti þremur vinningum á eftir Fjölni. Frammistaða TR-inga veldur þeim án efa vonbrigðum. Brekkan í bronsið er brött Akureyringar geta hins vegar borið höfuðið hátt og eru með í baráttunni um bronsið. Þeir eiga eftir veikari sveitir en Fjölnir.

B-sveit Hugins er í sjötta sæti. Góð úrslit gegn KR kom sveitinni úr fallsæti og alla leiðina í það sjötta. Staða Garðbæinga er bara býsna góð því þeir hafa teflt við flestar toppsveitanna.

Þrjú lið standa lakast að vígi. B-sveit Akureyringa, KR-ingar og Breiðablik/Bolungarvík. Afar líklegt er að tvær þessara þriggja sveita falli.

Staðan (spá ritstjóra í sviga)

1. (1) Víkingaklúbburinn 37 v.
   2. (2) Huginn 31 v.
   3. (4) Fjölnir 24 v.
   4. (3) TR 21 v. (6 stig)
   5. (5) SA 21 v. (4 stig)
   6. (6) Huginn-b 16½ v.
   7. (8) TG 16 v.
   8. (10) SA-b 13½ v.
   9. (9) KR 11 v.
   10. (7) Breiðablik&Bolungarvík 9 v.

Spá ritstjóra virðist vera býsna góð – en það skal fúslega viðurkennt að hann átti von á sterkari sveit og betri frammistöðu frá Breiðablik/Bolungarvík. Þeir geta að sjálfsögðu snúið taflinu sér í vil enda eiga þeir eftir veikari sveitir í seinni hlutanum en helstu andstæðingar sínir.

Spá fyrir 2. deild 

Ritstjóri virðist vera býsna sannspár um gang mála í annarri deild. Verði lokastaðan eins og staðan er núna fara sömu lið upp og ritstjóri spáði og sömu lið niður. Aldrei er meira frávik en eitt sæti! Reyndar víxlar ritstjóri ávallt sætum!

Fátt getur komið í veg fyrir að TR-b og SR endurheimti sæti í efstu deild og TR-c er að öllum líkindum á leiðinni niður. Hvaða félag fylgir þeim niður er óljóst en félögin í botnbaráttunni eiga mikið eftir að mætast innbyrðis. Spennandi fallbarátta framundan.

1. (2) TR-b 18½ v.
2. (1) SR 18 v.
3. (4) Haukar 14½ v.
4. (3) Vinaskákfélagið 13½ v.
5. (6) Hrókar alls fagnaðar 10 v.
6. (5) Huginn-c 9 v.
7. (8) SSON 8½ v.
8. (7) TR-c 4 v.

Spá fyrir þriðju deild 

Sem fyrr var ritstjóri nokkuð glöggur að spá í gang mála. Tvær efstu sveitirnar eru þær sömu. Ritstjóri, sem spáði aðeins fyrir 7 efstu sætin, gerði hins vegar ekki ráð fyrir jafn góðu gengi Sauðkrækinga og raun var.

Röð efstu liða:

1. (1) Víkingaklúbburinn-b 8 stig
2. (2) Fjölnir-b 6 stig
3. (4) Skákgengið 5 stig (13½ v.)
4. (-) Sauðárkrókur 5 stig (13½ v.)
5. (3) Siglufjörður 5 stig (13½ v.)
6. (-) SA 4 stig (14½ v.)
7. (6) Breiðablik&Bolungarvík 4 stig (13½ v.)

Spá fyrir fjórðu deild

Ritstjóri var einnig nokkuð glöggur í fjórðu deildinni. Það skal samt tekið fram að ritstjóri hafði ekki áttað sig á hversu sterkir Akurnesingar væru og hélt að KR-b kæmi sterkari til leiks.

Röð efstu liða

1. (3) Akranes 8 stig
   2. (2) TG -b7 stig
   3. (4) Hrókar alls fagnaðar-b 6 stig
   4. (5) Víkingaklúbburinn-c 5 stig (14 v.)
   5. (-) SSON-b 5 stig (14 v.)
   6. (-) TV-b 5 stig (13½ v.)

KR-b sem ritstjóri spáði efsta sætinu er aðeins í áttunda sæti. Þess má líka geta að fjórða deildin er miklu mun sterkari en hún hefur verið síðustu ár.

Að lokum 

Síðari hlutinn fer fram 1.-3. mars 2018. Skömmu síðar hefst svo GAMMA Reykjavíkurskákmótið – minningarmótið um Bobby Fischer.