Stefnir í spennandi síðari hluta

Fyrri hluti Íslandsmóts skákfélaga fór fram 10.-13. október í Rimaskóla. Teflt var eftir breyttu fyrirkomulagi í ár sem segja má að hafi gengið afar vel. Taflfélag Vestmannaeyja er efst eftir fyrri hlutann en Skákfélagið GM Hellir og Víkingaklúbburinn eru skammt undan. Víkingaklúbburinn stendur líklega best að vígi þrátt fyrir að vera í þriðja sæti. Þessir þrír klúbbar berjast um Íslandsmeistaratitilinn en síðari hlutinn fer fram 27. febrúar - 1. mars 2014.

Kærumál hafa sett svip sinn á keppnina eins og síðustu ár en bæði TR og TG kærðu lið GM Hellis og SFÍ á þeim forsendum að liðsmenn þeirra væru allir ólöglegir í ljósi sameiningar félaganna. Mótstjórn vísaði kærum félaganna frá. Bæði félögin hafa áfrýjað þeirri niðurstöðu til Dómstóls SÍ sem hefur málið nú til umfjöllunar.

Sest var að borðum að þessu sinni á fimmtudagskvöld og þá aðeins í fyrstu deild. Fjölgað hafði verið í 10 lið í fyrstu deild. Hugsunin við þá breytingu var að gera mótið áfangahæft fyrir íslensku titilhafana sem hafa löngum kvartað yfir fáum tækifærum. Hinar deildirnar hófust á hefðbundnum föstudagstíma.

Fyrsta deildin

Eyjamenn hljóta að vera ánægðir með efsta sætið. Þeir eiga hins vegar eftir erfiðustu andstæðingana af toppliðunum, þ.e. bæði GM Helli og TR. Víkingaklúbburinn á hins vegar eftir léttasta prógrammið. Af toppklúbbunum eiga þeir aðeins eftir að mæta Bolvíkingum. Eyjamenn hafa geysi jafnt og þétt lið og stórmeistararnir Helgi og Henrik fengu 4 vinninga í 5 skákum.

Hið nýsameinaða félag, Skákfélagið GM Hellir, er í öðru sæti hálfum vinningi á eftir Eyjapeyjum. Þar var Einar Hjalti Jensson í miklum ham og hlaut 4½ vinning. Traust frammistaða hjá nýja/sameinaða félaginu sem vann allar sínar viðureignir nema gegn Víkingum.

Víkingaklúbburinn er í þriðja sæti. Klúbburinn keyrði aðeins á átta skákmönnum rétt eins og Akureyringar. Stefán Kristjánsson var í miklu stuði í keppninni eins og svo oft áður og hlaut 4½ vinning.

Taflfélag Reykjavíkur er í fjórða sæti. Þar vantaði marga af þeirra sterkustu mönnum eins og stórmeistarana Friðrik og Margeir en alþjóðlegi meistarinn Arnar Gunnarsson mætti í eina umferð.

Bolvíkingar eru í fimmta sæti. Það vakti athygli að þeir mættu án erlendra skákmanna. Fimmta sætið hlýtur að teljast slakt hjá fjórföldum Íslandsmeisturum sem koma án efa mun sterkari til leiks í síðari hlutanum.

Skákfélag Akureyrar og Skákdeild Fjölnis sem eru í 6. og 7. sæti hafa náð eftirtektarverðum árangri og staðið sig best allra liða miðað við skákstig.  Fjölnismenn hafa mjög sterkan kjarna ungra skákmanna sem eru á mikilli uppleið.

B-sveit GM Hellis er í áttunda sæti og gæti mögulega blandað sér í botnbaráttuna.

Vinaskákfélagið er svo í níunda sæti. Þeir unnu merkilegan sigur á b-sveit TR 5-3 en þeir voru þá stigalægri á sjö borðum af átta! Vinaskákfélagið sýndi mikið hugrekki og fórnfýsi þegar þeir tóku sæti í deildinni. Sæti sem ein sjö félög höfðu hafnað og bros þeirra og ánægja við skákborðið smitaði út frá sér.

B-sveit TR rekur lestina. Liðsmenn þar náðu sér engan veginn á strik og hörð fallbarátta blasir við.

Skákstig

Ritstjóri tók saman tölfræði hvernig liðin stóðu sig í samanburði við eigin skákstig. Það kemur sjálfsagt engum á óvart að þar eru Fjölnismenn efstir með 60 stig. Akureyringar eru einnig með mjög góðan árangur eða 50 stig en þessi tvö lið hafa nánast tryggt veru sína í efstu deild. GM Hellir er í þriðja sæti með 35 stig. TV er svo rétt í plús (+4).

Hin sex liðin tapa stigum. Þar er b-sveit TR í nokkrum sérflokki (-93). B-sveit GM Hellis er næst (-26),  TR-a  þriðju (-21) og Víkingar fjórðu (-17). Bolar og Vinir tapa lítilsháttar af stigum (-6 og -3).

Það er alltaf gaman að skoða hverjir standa sig best. Sex skákmenn hafa 4½ vinning og þar á meðal tveir íslenskir þeir Stefán Kristjánsson og Einar Hjalti Jensson.

Sé stigaárangur skoðaður er Gawain Jones efstur með árangur upp á 2796 skákstig. Nils Grandelius (2728) og Thorbjörn Bromann (2712) eru næstir. Stefán Kristjánsson (2585), Einar Hjalti Jensson (2559) og Helgi Ólafsson (2545) eru efstir Íslendinganna.

Séu stigabreytingar skoðaðar eru Mikael Jóhann Karlsson og Jón Trausti Harðarson (25) efstir. Í næstum sætum eru Dagur Ragnarsson (24), Bromann, Oliver Aron Jóhannesson og Einar Hjalti (20)

Staðan

Rk.	Spáin	Team	TB1	TB2
1	3	Taflfélag Vestmannaeyja a-sveit	28,5	9
2	4	GM Hellir - a-sveit	28	8
3	1	Víkingaklúbburinn a-sveit	27	9
4	5	Taflfélag Reykjavíkur a-sveit	24,5	4
5	2	Taflfélag Bolungarvíkur a-sveit	24	6
6	6	Skákfélag Akureyrar a-sveit	23,5	8
7	9	Skákdeild Fjölnis a-sveit	19,5	4
8	7	GM Hellir - b-sveit	11,5	0
9	10	Vinaskákfélagið	7	2
10	8	Taflfélag Reykjavíkur b-sveit	6,5	0

Það er ljóst að ritstjóri hefur ofmetið Bolvíkinga en hefur reyndar fulla trú á því að þeir komi sterkari inn í síðari hlutanum og taki jafnvel bronsið.

Ritstjóri greinilega vanmat Fjölni - og það ekki í fyrsta skipti. „Ungu ljónin" eru greinilega ekkert á leiðinni aftur í 2. deild. Það er ánægjuefni að „ljónin" hafi fengið tækifæri á að tefla í efstu deild. Tækifæri sem gafst með fjölgun liða.

Það stefnir flest í að b-sveit TR og Vinaskákfélagið falli en mögulega gæti b-sveit GM Hellis tekið þátt í þeirri baráttu.

2. deild

Taflfélag Garðabæjar er í efsta sæti - nokkuð óvænt. Reyndar er margt mjög óvænt í deildinni. Þess má geta að TG lenti í sjöunda sæti í fyrra - sem að öllu forfallalausu hefði þýtt fall - nema vegna fjölgunar sveita í efstu deild hékk TG upp í 2. deild. Nú virðast Garðbæingar á leiðinni í efstu deild! Reyknesingar eru í öðru sæti og b-sveit Víkinganna í þriðja sæti.

B-sveit TV og c-sveit GM Hellis eru í fallsæti. Ritstjóri spáði c-sveit GM Hellis mun betra sæti - reyndar verðlaunasæti - en það virðist vera fjarlægur draumur. Ritstjóri reyndar spáir því að sveitin lyfti sér upp úr fallsæti. Annars getur eiginlega allt gerst í þessari deild. Seinni hlutinn verður án efa mjög spennandi.

Látum Guðmund Daðason, formann TB, eiga lokaorðin um 2. deild (Heimasíða TB).

Ég fullyrði að 2. deildin er sú lang skemmtilegasta í deildakeppninni. Af 8 liðum falla tvö, tvö fara upp en helmingur er kyrr í deildinni. Liðin eru mjög jöfn og allir geta unnið alla. Og það er þannig að allir vinna alla.

 

Rk.	Spáin	Team	TB1	TB2
1	7	Taflfélag Garðabæjar a-sveit	16	8
2	4	Skákfélag Reykjanesbæjar a-sveit	15,5	6
3	2	Víkingaklúbburinn b-sveit	14	5
4	6	Skákdeild Hauka a-sveit	12,5	4
5	5	Taflfélag Bolungarvíkur b-sveit	12	4
6	3	Skákfélag  Íslands a-sveit	10,5	2
7	8	Taflfélag Vestmannaeyja b-sveit	8,5	2
8	2	GM-Hellir c-sveit	7	1

 

3. deild

KR-ingar eru efstir í þriðju deild og kemur það lítt á óvart enda með dúndursterkt lið. B-sveit Skákfélags Akureyrar er í öðru sæti og ætti það heldur ekki að koma óvart enda með Akureyrarmeistarann, Harald  Haraldsson á efsta borði. Skákfélag Selfoss og nágrennis og b-sveit SFÍ eru skammt undan.

Ritstjóri, sem spáði aðeins fyrir topp sjö, var nokkuð út úr kú með spá sína eins og svo oft áður og hefur t.d. algjörlega yfirsést styrkleiki Akureyringa.

Rk.	Spáin	Team	TB1	TB2
1	3	Skákdeild KR  a-sveit	7	15
2		Skákfélag Akureyrar b-sveit	6	16,5
3	6	Skákfélag Selfoss og nágrennis a-sveit	6	16
4		Skákfélag Íslands b-sveit	6	14,5
5		Ungmennasamband Borgarfjarðar	5	13
6	5	Taflfélag Reykjavíkur c-sveit	5	12,5
7	1	Briddsfjelagið a-sveit	5	11,5
8	4	GM-Hellir d-sveit	4	12
9		GM-Hellir f-sveit	4	12
10	2	Víkingaklúbburinn-c	3	9
11		GM-Hellir e-sveit	2	11,5
12	7	Skáksamband Austurlands	2	10,5
13		Skákfélag Sauðárkróks a-sveit	1	6,5
14		Skákdeild KR b-sveit	0	7,5

4. deild

Sextán lið tóku þátt í fjórðu deild.

B-sveit Reyknesinga leiðir en í næstum sætum eru d- og c-sveitir SA sem og a-unglingasveit TR.

Stefnir í spennandi baráttu í síðari hlutanum.

Að lokum

Breytingar á keppninni nú virðast hafa tekist vonum framar. Fjölgun liða hefur lífgað upp á keppnina og nú er mótið skyndilega orðið áfangahæft. Mér fannst gaman að sjá alla þessa innlendu keppendur í fyrstu deild og spennan er mikil í öllum deildum.

Framkvæmd mótsins var til mikillar fyrirmyndar. Ásdís Bragadóttir, framkvæmdastjóri SÍ, Omar Salama, skákstjóri og Helgi Árnason, skólastjóri, eiga þar stærstan þátt sem og innsláttafólkið Donika Kolica og Steinþór Baldursson sem slógu úrslitin jafnóðum inn í Chess-Results sem féll í afar góðan jarðveg meðal keppenda. Sýndu frábæra snerpu.

Aðstæður í Rimaskóla eru til fyrirmyndar. 

Lokaorðin á Björn Þorfinnsson (Skákhornið)

Það er þekkt vandamál, ekki bara í skákinni heldur allstaðar, að menn eru sparir á hrósið þegar vel er staðið að hlutunum en eru fljótir upp á afturlappirnar þegar eitthvað misferst. Ég er sjálfur ekki saklaus af þessu en núna langar mig til þess að bæta fyrir það.

Ég var í raun bara að átta mig á því núna, rúmum þremur dögum eftir fyrra hluta Íslandsmótsins, að afstaðin keppni er sennilega sú besta sem ég hef tekið þátt í síðan þátttaka mín hófst fyrir rúmum tveimur áratugum (!). 

Gunnar Björnsson,
liðsmaður b- og c-sveita GM Hellis