Pistlaskrif um Íslandsmót skákfélaga

Ritstjóri ætlar að halda þeirri venju að spá í spilin fyrir Íslandsmót skákfélaga. Víkingaklúbburinn er óneitanlega langsigurstranglegastur enda safnað að sér miklu liði – bæði erlendum og innlendum skákmönnun. Eina liðið sem virðist vera líklegt til að veita þeim keppni eru Íslandsmeistarar síðustu þriggja ára – Skákfélagið Huginn. 

Spá fyrir 1. deild 

Taflfélag Reykjavíkur kemur veikari til leiks í ár en í fyrra en ættu að vera líklegir til að hreppa bronsið. Þó má ekki vanmeta Fjölnismenn sem gætu veitt þeim keppni. Skákfélag Akureyrar,  b-sveit Hugins og hið "nýja" félag Breiðablik&Bolungarvík verða væntanlega um miðja deild. 

Fallbaráttan var gríðarlega spennandi í fyrra og réðust úrslitin á síðustu mínútunum– og gæti það einnig gerst nú.  Ritstjóri telur líklegast að þar berjist þrjú lið. Að venju spáir ritstjóri KR falli enda hefur það reynst KR-ingum afar vel síðustu ár. Spá ritstjóra virðist gefa þeim mikinn kraft! Þeir björguðu sér frá falli á ævintýralegan hátt í fyrra. Ég spái því að SA-b fylgi þeim niður og Garðbæingar haldi sæti sínu. Tel þó líkur allra þessara liða afar áþekkar á að halda sæti sínu. 

1. Víkingaklúbburinn
2. Huginn-a
3. TR
4. Fjölnir
5. SA
6. Huginn-b
7. Breiðablik&Bolungarvík
8. TG
9. KR
10. SA-b
     

Spá fyrir 2. deild 

Miklu erfiðara er að spá í spilin fyrir aðra deild. Ritstjóri þekkir minna til sveitanna og styrkleiki b- og c-sveita er háður styrkleika a- og b- sveita sömu félaga. Óvissuþættirnir eru því fleiri. 

Reyknesingar teljast þó líklegir til sigurs og að mati ritstjóra er b-sveit TR líklegust til að fylgja Suðurnesjamönnum upp í efstu deild.  Haukar og mögulega Vinaskákfélagið geta blandað sér í baráttuna um sæti í deild þeirra bestu. 

Um fallbaráttuna hef ég litla hugmynd. Selfyssingum spái ég þó falli og að TR-c fylgi þeim niður. Svo þarf þó alls ekki að fara. 

1. SR
2. TR-b
3. Vinaskákfélagið
4. Haukar
5. Huginn-c
6. Hrókar alls fagnaðar
7. TR-c
8. SSON

Spá fyrir þriðju deild 

Enn erfiðara er spá í 3. deildina. Held þó að b-sveit Víkinga hljóti að vera líkleg til árangurs eftir styrkingu a-sveitarinnar og spái þeim sigri. Einnig held ég að b-sveit Fjölnis sé til alls líkleg. Þessum sveitum spái ég tveim efstu sætunum og sæti í annarri deild að ári. Skákgengið og Siglfirðingar, d-sveit Hugins, Breiðablik/Bolungarvík og örugglega fleiri sveitir geta blandað sér í þá baráttu.  

Spá fyrir 7 efstu af 14: 

1. Víkingar-b
2. Fjölnir-b
3. Siglufjörður
4. Skákgengið
5. Huginn-d
6. Breiðablik/Bolungarvík-b
7. Vinaskákfélagið-b
    

Spá fyrir fjórðu deild 

B-sveit KR féll í fyrra mjög óvænt. Sú sveit ætti að endurheimta sæti sitt í 3. deild. Sömu sögu má segja um b-sveit TG sem ég tel mjög líklega til góðs árangurs. Taflfélag Akraness hefur þátttöku eftir langt hlé og hefur á sterku liði að skipa.  Ég spái þessum þremur sveitum þremur efstur sætunum.  B-sveit Hróka alls fagnaðar gæti verið þétt og jafnvel c-sveit Víkinga. 

Yfirleitt yfirsést mér eitthvað í fjórðu deildinni og svo er örugglega einnig nú. 

Spá fyrir 5 efstu sætin 

1. KR-b
2. TG-b
3. TA
4. HAF
5. Víkingar-c 

Að lokum 

Íslandsmót skákfélaga er mikil hátíð. Það er ánægjulegt að sjá fjölgun liða í ár. Spá ritstjóra er bara gerð til gamans og ekki byggð á vísindalegum rannsóknum og ber að taka ekki of alvarlega. 

Gunnar Björnsson

Ritstjóri Skák.is ætlar að ekki að bregða af vananum og vera með hinu hefðbundnu spá ritstjóra þrátt fyrir á köflum nokkuð blendin viðbrögð og jafnvel skammir. Rétt er að árétta nú sem fyrr að á bakvið spánna eru ekki mjög vísindaleg vinnubrögð og hún er  fyrst og fremst til gamans. 

Samkvæmt heimildum ritstjóra verður fremur lítið af erlendum skákmönnum með á Íslandsmóti skákfélaga. Það er eingöngu Víkingaklúbburinn sem fullnýtir kvótann með fjóra erlenda skákmenn. Huginn og KR verða hógværir í þeim efnum en aðrir þar á meðal TR ætli að treysta á innlenda skákmenn. Svo er eitthvað um að íslensk skákfélög flyti inn íslenska stórmeistara sem búsettir eru erlendis en bæði Héðinn Steingrímsson (Fjölnir) og Margeir Pétursson (TR) tefla um helgina.

Víkingaklúbburinn verður án efa með sterkustu fjögur efstu borðin en er ekki jafn sterkir og t.d. Huginn og TR á neðri borðunum. 

Um fallbaráttuna er erfitt að spá eins og svo oft áður. Ég spáði KR-ingum falli í fyrra við misjöfn viðbrögð. Þeir héldu sér svo örugglega uppi. Sennilega væri best í ljósi þess að spá þeim falli aftur! Reyndar tel ég fallið verði hlutskipti Reyknesinga og b-sveitar TR en aðrir geta að sjálfsögðu dregist inn í fallbaráttuna.

Spá ritstjóra: 

1. deild 

1. Huginn
2. TR
3. Víkingar
4. Fjölnir
5. Bolungarvík
6. SA
7. Huginn-b
8. KR
9. TR-b
10. SR 

2. deild 

Það er eiginlega pólitískur ómöguleiki að spá í spilin í 2. deild. Sveitirnar virðast flestar vera ákaflega jafnar að styrkleika eins og svo oft áður og og svo gæti farið að fáum vinningum muni á 2. og 7. sæti. Slíkt hefur gerst áður í 2. deildinni. Ég man t.d. þegar Hellir-c sem var í fallsæti fyrir lokaumferðina en vann þar góðan sigur og lenti í verðlaunasæti.

Ég tel tíma Garðbæinga nú komna og spá þeim sæti í efstu deild. Spái því að Vinaskákfélagið fylgi þeim upp enda með sterkustu einstaklinganna á efstu borðunum. Falli spái ég SFÍ og Fjölni-b en gæti allt eins spáð öðrum sveitum falli. 

1. TG
2. Vinaskákfélagið
3. SA-b
4. TR-c
5. Haukar
6. Huginn-c
7. Fjölnir-b
8. SFÍ                  

3. deild

Hér treysti ég mér aðeins til að spá um efstu sætin og ætla að spá því að liðin sem féllu í fyrra endurheimti sæti sitt. Vert er þó að benda á d-sveit TR sem hafnaði í 3. sæti í fyrra. einnig má benda á Hróka alls fagnaða en ritstjóri er ekki styrkleika þeirra alveg á hreinu. Breiðablik gæti líka komið á óvart enda með unga og mjög efnilega skákmenn.

Spá ritstjóra er: 

1. SSON
2. UMSB
3. TR-d
4. SR-b
5. KR-b
6. Hrókar alls fagnaðar 

4. deild

Sauðkrækingar og Eyjamenn eru líklegir til árangurs og spái þeim sæti í efstu deild. Um önnur sæti er erfitt að spá en ég spái því að b-sveit Víkinganna endurheimti sæti sitt.

1. TV
2. Sauðárkrókur
3. Víkingaklúbburinn-b

Heimasíða mótsins

Fyrri hluti Íslandsmóts skákfélaga fór fram um helgina í Rimaskóla. Fyrir helgina spáði ritstjóri að tveir turnar (Huginn og TR) myndu berjast um dolluna. Niðurstaðan er hins vegar að þeir séu þrír - þ.e. Taflfélag Vestmannaeyja er aðeins einum vinningi á eftir Hugin sem er efst. B-, C- og D-sveitir TR eru í forystu í 2.-4. deild.

Fyrsta deild

Staða Hugins er óneitanlega best í 1, deildinni því sveitin er í forystu og á auk þess eftir heldur slakari andstæðinga en keppninautarnir.  Það er athyglisvert að öll félögin unnu hvort annað í kross. Liðin hafa því öll jafn mörg stig en innbyrðisúrslit gætu ráðið úrslitum ef aðeins tvö lið verða efst og jöfn.

Staðan:

Ritstjóri taldi að TR myndi verða í forystu  eftir fyrri hlutann í ljósi þess að félagið fengi heldur lakari andstæðinga. Ritstjóri  hélt reyndar að TR yrði stigahærri en Huginn, sem reyndist ekki rétt. Ég stóð ég í þeirri trú að þeir myndu tefla fram öðrum sterkum úkraínskum stórmeistara ásamt Oleksienko í stað Danans Jakob Vang Glud sem náði sér ekki á strik.

Fjölnismenn áttu gott mót sem og Akureyringar. Titilvörn Víkingaklúbbsins byrjaði ekki vel en þeir fá léttara prógramm í síðari hlutanum og ættu því að geta fjarlægst fallbaráttuna.  

Akureyringar stóðu sig best stigalega séð í fyrri hlutanum og hækka samtals um 65 skákstig.  Jón Kristinn fór þar langfremstur í flokki með 68 stig og hækkar mest allra einstaklinga í efstu deild.

Huginn-b kemur næstur með 32 skákstig í plús og Eyjamenn þriðju með 28 stig. Önnur lið sem hækka samtals á stigum eru Huginn-a (14) og SR (4).  Liðin sem lækka eru:  TR(-3), Fjölnir (-5), TB (-13), Víkingaklúbburinn (-36) og SFÍ (-53).

Henrik Danielsen og Sigurbjörn Björnsson (TV), Jón Viktor Gunnarsson (TR) og Dagur Ragnarsson (Fjölnir) fengu 4½ vinning af 5 mögulegum.

Ivan Cheparinov (Huginn) stóð sig best stigalega með árangur upp á 2741 skákstig. Næstir voru Henrik , Jóhann Hjartarson (TB), Nils Grandelius (TV) og Hannes Hlífar Stefánsson (TR). Sjá nánar á Chess-Results.

Fyrirkomulagið

Umræður um fyrirkomulag hefur farið hátt á Facebook-hópi íslenskra skákmanna  sem tekið hefur við hlutverki Skákhornsins.

Bent hefur verið á mikill munur hafi verið á b-sveit Hugins á milli umferða. Sérstaklega í fyrstu umferð þar sem bæði a- og b-sveitir Hugins voru mun lakari en í hinum umferðunum fjórum.  Mikill styrkleikamunur á milli umferða á Íslandsmóti skákfélaga er ekki einskorðaður við Huginssveitirnar. Til dæmis var mikill munur á styrkeika Bolvíkinga á milli umferða.

Lenka kom með góða lausn á þessu en hún er sú að a- og b-lið mætist í annarri umferð á föstudagskvöldinu en ekki á fimmtudagskvöldinu þegar engar aðrar deildir eru í gangi.

Umræða hefur einnig verið um fyrirkomulag mótsins. Jóhann Hjartarson og Helgi Ólafsson komu fyrstir fram með hugmynd um að breyta efstu deild í úrvalsdeild þar sem sex lið tefldu tvöfalda umferð  og b-lið fengju þar ekki keppnisrétt. Margir hafa tekið undir hugmyndir okkar sterkstu skákmanna. Þá yrðu tefldar 10 umferðir í stað níu nú. Áfangamöguleikar aukast - bæði vegna fjölda umferða og ekki síst vegna þess að liðin í sex liða deildinni verða sterkari.

Til að koma á móts við b-lið mætti veita Íslandsmeistaratitil b-liða fyrir það b-lið sem stendur sig best.

Kostnaður myndi reyndar aukast vegna þess að væntanlega yrði þá teflt í efstu deild í þremur hlutum. Kostnaður myndi þó ekki aukast verulega því ferðakostnaður er ekki stærsti kostnaðurinn við komu erlendra stórmeistara.

Gera má ráð fyrir að fyrirkomulagið verði rætt í þaula í nefnd um Íslandsmót skákfélaga sem skipuð er níu manns frá jafnmörgum félögum, undir forystu Halldórs Grétars Einarssonar en nefndinni er ætlað að koma fram með tillögu(r) fyrir næsta aðalfund SÍ.

2. deild

Í 2. deild urðu þær breytingar skömmu fyrir mót að b-sveit Bolvíkinga dró sig úr keppni. Við sæti þeirra tók c-sveit Hugins.  Flest bendir til þess að b-sveit TR fari upp í fyrstu deild en sveitin hefur fengið flestar sterkustu sveitirnar. Hver fylgir þeim upp er hins vegar óljósara en KR-ingar virðast líklegastir.

Ekkert virðist geta komið í veg fyrir að b-sveit Víkingaklúbbsins falli niður og staða c-sveitar Hugins er erfið en þó ekki vonlaus enda er hún búin að tefla við flestar sterkustu sveitirnar.

3. deild

Ritstjóri spáði fyrir mót að Huginn-c yrði í efsta sæti en sveitin fluttist sjálfkrafa upp í 1. deild við forföll. Ritstjóri spáði Briddsfjelaginu og b-sveit Eyjamanna 3. og 4 sæti en báðar sveitirnar drógu sig úr keppni. Briddsfjelagið sameinaðist Vinaskákfélaginu sama dag og Íslandsmótið hófst. Fjölnir-b sem tók sæti í þriðju deild við þessi forföll er í þriðja sæti.

Spennandi barátta framundan en það kæmi ekki ritstjóra óvart ef þessar þrjár sveitir myndu raða sér í efstu sætin að móti loknu. TR-c er líklega á leiðinni upp um deild.

4. deild

Það er sama með spá ritstjóra hér og í 3. deild. Þrjú af þeim liðum sem ritstjóri spáði á topp 5 fóru upp í 3. deild við forföll en það voru b-sveitir Fjölnis, KR og Skáksambands Austurlands.

D-sveit TR er áberandi besta sveitin en hvaða sveitir fylgja þeim er óljósara. Liðin í 2.-4. sæti eru öll líkleg og einnig Skákgengið. Skákgengið þarf hins vegar að gerast aðili að SÍ vilji það flytjast upp um deild.

Brottfall

Töluvert brottfall varð á lokametrum mótsins. Það vakti töluverða athygli þegar b-sveitir sterkra sveita eins og TV og TB drógu sig út úr mótinu. Ég sannarlega vona að þessi þróun gangi til baka. Jafnmargar sveitir tóku hins vegar þátt nú og í fyrra.

Fjórmenningarnir

Gamla fjórmenningarklíkan, Jóhann Hjartarson, Helgi Ólafsson, Margeir Pétursson og Jón L. Árnason, sem skipa munu b-sveit Íslands á EM landsliða að ári, stóðu sig vel á mótinu. Fjórmenningarnir fengu 9½ af 12 mögulegum og hækka allir á stigum sem lofar óneitanlega góðu fyrir EM!

Mótshaldið

Mótshaldið tókst afar vel um helgina. Það er ekki síst vegna góðs starfsfólk. Helgi og hans fólk í Rimaskóla hélt óaðfinnanlega utan um allt í húsinu.

Sú breyting að halda 4. deildina í öðru rými gekk einnig vel og skapaði aukið rými.

Omar Salama og Steinþór Baldursson stjórnuðu hlutunum eins og herforingjar í stóra salnum og Ólafur S. Ásgrímsson og Bragi Kristjánsson í þeim minni. Innsláttur úrslita var í höndum Steinþórs og nánast villulaus. Það fer ekki framhjá manni að skákmenn eru afar þakklátir fyrir þessa góðu þjónustu.

Þeim félögum sem lánuðu SÍ töfl og klukkur fá  einnig sérstakar þakkir. Þar er Huginn fremstur í flokki en félagið lánaði t.d. öll settin í 1. deild. 

Höfuðmeiðsl - þó ekki alvarleg

Skákmenn eru mistapsárir eins og gengur. Einn keppandi tók tapi heldur illa og setti skorblaðið saman í vöndul og grýtti honum. Skipti þar engum togum að skorblaðið lenti á hausnum á Vigfúsi Ó. Vigfússyni, varaformanni Hugins, sem slasaðist að sögn kunnugra þó ekki alvarlega.

Skemmtilegt (ættar)mót

Stemningin á Íslandsmóti skákfélaga er einstök. Oft hefur verið talað um keppnina sem ættarmót/árshátíð. Skipta þar úrslitin e.t.v. ekki öllu máli - heldur félagsskapurinn og stemningin!

Seinni hluti Íslandsmóts skákfélaga fer fram 19.-21. mars 2015. Væntanlega einnig í Rimaskóla.

Gens Una Sumus - Við erum öll af sama sauðahúsi.

Gunnar Björnsson,
liðsmaður í b-sveit Hugins

Síðari hluti Íslandsmóts skákfélaga hefst í kvöld og lýkur 1. mars. Reyndar er það bara fyrsta deildin sem hefst í kvöld. Aðrar deildir hefjast á morgun. Spennan er mikil. Þrjú lið berjast um Íslandsmeistaratitilinn. Auk þess er topp- og fallbaráttan hörð og spennandi í öllum deildum.

Alltaf fer sérstakt andrúmsloft í gang fyrir keppni. Það hefur ekki farið framhjá undirrituðum. Símtölum fjölgar og umræðan á spjallþráðum skákmanna fer á flug.

Sú breyting að hafa tíu lið í efstu deild tókst afar vel og ekki er loku fyrir það skotið að áfangar komi í hús. En kíkjum á sjálfa keppnina.

Fyrsta deildin

Eyjamenn eru á toppnum með 28,5 vinning og virðast vera sigurvissir ef marka má ummæli Þorsteins Þorsteinssonar, liðsstjóra þeirra á Facebook en þar segir hann:

Gargamel Grandelius mættur til landsins til að vinna Íslandsmót skákfélaga fyrirTaflfélag Vestmannaeyja!

Skákfélagið GM Hellir er öðru sæti með 28 vinninga, aðeins hálfum vinningi á eftir. Víkingaklúbburinn er í þriðja sæti með 27 vinninga. Þessi þrjú lið berjast um sigurinn.

Ritstjóri telur Víkinga líklegasta til sigurs. Það byggi ég fyrst og fremst á því að Eyjamenn og GM Hellir eiga eftir að mætast á meðan Víkingar eiga fyrst og fremst eftir að mæta sveitum í neðri helmingi mótsins. Allt getur gerst og líkur eru á að úrslitin ráðist ekki fyrr en í lokaumferðinni. GM Hellir og Víkingaklúbburinn mætast í áttundu og næstíðustu umferð. Viðureign sem gæti ráðið úrslitum.

TR, Bolvíkingar og SA sigla lygnan sjó í 4.-7. sæti.

Þrjú lið eru í fallbaráttunni. Það eru b-sveitir GM Hellis og TR og hið fórnfúsa Vinaskákfélag. Þar standa GM Hellismenn best að vígi. Ég spái TR og Vinaskákfélaginu falli.

Í neðangreindum töflum er spáin frá því í haust í öðrum dálki en uppfærð spá í þriðja dálki.

Staðan

2. deild

Mig langar helst til að þess að sleppa spánni í 2. deild. Svo erfið er hún! Taflfélag Garðabæjar leiðir mjög óvænt en Skákfélag Reykjanesbæjar og b-sveit Víkingaklúbbsins eru skammt undan. TG á reyndar eftir að mæta báðum þessum sveitum.

Botnbaráttan er einnig hörð. Þar er c-sveit GM Hellis á botninum og á eftir að mæta efstu sveitunum tveimur.

Ég spái b-sveit Víkingaklúbbsins efsta sæti og að TG fylgi þeim upp í efstu deild. Reyknesingar eru þó til alls líklegir.

 B-sveit Eyjamanna og c-sveit GM Hellis eru líklegastar til að falla en stutt er þó í Skákfélag Íslands.

3. deild

KR-ingar eru efstir í þriðju deild með 7 stig. Í næstu sætum með 6 stig eru b-sveit Skákfélags Akureyrar, Skákfélag Selfoss og nágrennis og b-sveit Skákfélags Íslands. Ég hef trú á því að Briddsfjelagið blandi sér í toppbaráttuna og fari upp um deild séu félagsmenn þess ekki að einbeita sér að öðrum áhugamálum!

Fallbaráttan er einnig hörð en þrjú lið fara niður um deild.

4. deild

Sextán lið tóku þátt í fjórðu deild.

B-sveit Reyknesinga leiðir en í næstum sætum eru d- og c-sveitir SA sem og a-unglingasveit TR.

Stefnir í spennandi baráttu í síðari hlutanum og ætla ég ekki spá fyrir úrslitum þar.

Að lokum

Rétt er að minna á að þessi spá er fyrst og fremst til gamans gerð. Að loknu móti verður lokahóf mótsins í Billiardbarnum í Faxafeni 12 og eru menn hvattir til að fjölmenna þangað.

Gens Una Sumus!

Gunnar Björnsson,
liðsmaður b- og c-sveita GM Hellis

Þá rennur upp enn eitt Íslandsmót skákfélaga. Íslandsmótið er heldur betur með óvenjulegu sniði að þessu sinni. Búið er að fjölga sveitum í efstu deild upp í tíu og reglur um erlenda skákmenn hafa verið þrengdar. Sameiningar félaga setja sinn svip á keppnina.. Vinaskákfélagið á áhugavert stökk en félagið fer alla leiðina úr 3. deild á síðustu leiktíð upp í 1. deild!

Ítrekað er enn eitt árið að á bakvið spá undirritaðs eru engin geimvísindi heldur er spáin fyrst og fremst sett fram til gamans og fróðleiks fyrir áhugamenn um keppnina.

1. deild

Þar hafa heldur betur tíðindi gerst. Fjölgað var í 10 lið í keppninni á síðasta aðalfundi. Aukasætin tvö fengu Skákfélag Akureyrar, sem annars hefði fallið um deild, og Skákdeild Fjölnis, sem að óbreyttu hefði verið áfram í 2. deild.

Í aðdraganda keppninnar nú voru félögin Goðinn-Mátar og Taflfélagið  Hellir sameinuð undir nafninu GM-Hellir. Goðinn-Mátar átti fyrir tvö lið í efstu deild og Hellir eitt lið. Samkvæmt reglum keppninnar má hins vegar hvert lið hafa aðeins tvö lið. Niðurstaðan varð því eðlilega sú að hið nýja félag gaf eftir sæti í efstu deild.

Alls sáu sjö lið sér ekki fært að taka sæti c-sveitar GM Hellis, flest vegna lítils fyrirvara. Vinaskákfélagið, sem endaði í 2. sæti í fyrra í 3. deild, lét hins vegar ekki slíka „smámuni" á sig fá og tók sætið.

En spáum nú í spilin. Nokkur lið eru áberandi best á Íslandsmótinu. Skal þar nefna sérstaklega Íslandsmeistara Víkingaklúbbsins sem virðast hafa langbesta liðið. Sér í lagi ef það reynist rétt sem heyrst hefur að fjórfaldir Íslandsmeistarar Bolvíkinga stilli að þessu sinni aðeins upp innlendum skákmönnum.

Bolvíkingar hafa ásamt Víkingum væntanlega sterkasta íslenska liðið á 6 borðum með Jóhann Hjartarson og Jón L. Árnason fremsta í flokki margra sterkra skákmanna.

Hin liðin sem berjast um verðlaunasæti eru Taflfélag Vestmannaeyja, Taflfélag Reykjavíkur og GM-Hellir.

TV hefur stórmeistarana Helga Ól og Henrik í sínu liði. Helgi verður hins vegar nýlentur eftir langt og strangt ferðlag frá Svartfjallalandi. 

TR hefur marga sterka innlenda skákmenn í sínum röðum en flestir þeirra allra sterkustu menn að Gumma Kjartans undanskyldum (sem teflir reyndar mest Íslendinga!) eru fátíðir gestir á lengri mótum. Þess er óskandi að Friðrik og Margeir tefli með þeim eins og í fyrra. Þátttaka þeirra gæðir mót sem þetta sérstöku lífi. .

A-sveit GM-Hellis byggist að langmestu leyti á sveit Goðans-Máta. Fremstir í flokki eru stórmeistararnir Helgi Áss Grétarsson, sem hefur þó lítið teflt síðustu ár, og Þröstur Þórhallsson.

Ég vel lítinn vafa á því að Víkingaklúbburinn vinni keppnina. Þeir hafa sterkustu Íslendingana og sterkustu erlendu skákmennina.

Erfiðara er að spá í hin verðlaunasætin og fer að miklu leyti eftir því hversu vel hinum félögunum gengur að fá sína sterkustu skákmenn til að tefla í keppninni.

Ég spái Bolvíkingum öðru sæti og geri þá ráð fyrir að þeir mæti a.m.k. með erlenda meistara í síðari hlutanum. TV spái ég þriðja sæti, GM-Helli því fjórða og TR því fimmta. Set fram með öllum mögulegum fyrirvörum og ljóst að bæði TR og GM-Hellir hafa góðan möguleika á verðlaunasæti.

Í fallbaráttunni eru svo hin liðin. Allt bendir til þess að Vinaskákfélagið falli enda voru þeir sennilega ekki tilbúnir að fara upp að sinni - en fórnuðu sér fyrir málstaðinn.

B-sveitir GM Hellis og TR, Fjölnir og SA berjast svo um hitt um að halda sér. Ég spái því að Fjölnir fari niður með Vinaskákfélaginu en þó eru ungu ljónin í félaginu til alls líkleg eins og þau sýndu á síðasta Íslandsmóti skákfélaga og í Gagnaveitumótinu. „Ljónin" geta mjög vel bjargað sér þá helst á kostnað b-sveita TR og GM-Hellis eða Skákfélags Akureyrar. Styrkleiki b-sveitanna  fer að sjálfsögðu mikið eftir því hvernig gengur að ná sterkri a-sveit saman.

Spáin:

• 1. Víkingaklúbburinn
• 2. TB
• 3. TV
• 4.  GM-Hellir-a
• 5.  TR-a
• 6.  SA
• 7.  GM-Hellir-b
• 8. TR-b
• 9. Fjölnir
• 10. Vinaskákfélagið

2. deild

Mjög erfitt er að spá í spilin í 2. deild vegna breytinganna í fyrstu deild sem samþykktar voru á síðasta aðalfundi. Nú er það skyndilega þannig að töluvert fleiri tefla í fyrstu deild en hingað til. Bæði vegna fjölgunar liða og fjölgunar í hverju liði. Auk þess virðast mér liðin vera afskaplega áþekk að styrkleika.

Sú breyting hefur einnig átt sér stað að Skákfélag Íslands og Taflfélag Akraness hafa sameinast undir nafni hins fyrrnefnda. Þriðja sætið getur dugað til að komast upp í efstu deild verði c-sveit GM-Hellis í 1. eða 2. sæti.

Ég tel líkur á að nánast öll liðin geti verið í toppbaráttunni. Ég tel þó líklegastar til árangurs b-sveit Víkinga, c-sveit GM-Hellis, SFÍ og SR.

Ómögulegt er að spá til hverjir falla. Satt að segja vil ég helst ekki spá hverjir falla- en ég hef víst ekkert val . B-sveit Bolvíkinga er óljós sérstaklega ef þeir verða útlendingalausir í a-sveitinni. Haukar hafa reynst seigir í gegnum tíðina. Spái því að TG og b-sveit TV falli með með miklum fyrirvörum.

• 1. Víkingaklúbburinn-b
• 2. GM-Hellir-c
• 3. SFÍ
• 4. SR
• 5. TB-b
• 6. Haukar
• 7. TG
• 8. TV-b

3. deild

Einnig hafa orðið breytingar á þriðju deildinni. Fjölgunin í 1. deild varð til þess að fækkað varð í þriðju deild niður í 14 lið úr 16.

Þar hlýtur Briddsfjelagið að teljast mjög líklegt til afreka - tja ekki nema golfferðir sterkra liðsmanna trufli þær fyrirætlanir. KR-ingar eru til alls líklegir sem og c-sveit Víkinga og d-sveit GM-Hellis.

Ekki treysti ég mér að spá fyrir botnbaráttuna.

Spá um efstu sæti

• 1. Briddsfjelagið
• 2. Víkingaklúbburinn c-sveit
• 3. Skákdeild KR a-sveit
• 4. GM-Hellir d-sveit
• 5. TR-c
• 6. Selfoss
• 7. SAUST

4. deild

Þegar þetta er ritað eru 17 lið skráð til leiks í 4. deild. Til samanburðar voru þau 18 í fyrra. Verður að teljast gott í ljósi í fjölgunar sveita í fyrstu deild og fækkun útlendinga.

• SA-c verður að teljast líklegt til árangurs. Unglingasveitir TR og GM-Hellis geta verið sterkar en það fer þó að einhverju leyti eftir því hvort sterkustu unglingarnir verði notaðir í „hefðbundnum" eða í unglingasveitum. B-sveit Fjölnis ætti að vera sterk.

Enginn spútnik-klúbbur er til staðar eins og svo oft áður.

Engin opinber spá fyrir fjórðu deild verður gefin út nú.

Að lokum

Í Ásatrú segir frá Einherjum sem börðust dag hvern á Iðavelli en risu upp ósárir eftir hverja orrustu og skemmtu sér saman.

Gens Una Sumus

Gunnar Björnsson,
liðsmaður c-sveitar GM Hellis