Þegar ég lenti á Litla Hrauni

Í dag fór á Litla Hraun ásamt Birni Þorfinnssyni, Arnari Valgeirssyni, Emblu Sól, matarstjóra Grænlandsmótsins, Guðfríði Lilju, Hrafni Jökuls og sjálfum viðskiptaráðherranum Björgvin G. Sigurðarsyni og tók þar þátt í skákmóti.   Hrókurinn hefur unnið geysigott starf á Hrauninu og hefur mætt þar annan hvern föstudag frá árinu 2004 og slegið upp skákmóti.  Skákfélagið á Hrauninu heitir því skemmtilega nafni, Frelsinginn.

Smá beygur var í manni þegar maður gekk inn um hliðið en það var ekki lengi því vel lá á keppendum sem skemmtu sér hið besta og léttur og skemmtilegur andi sveif þarna yfir.  Til að koma í veg fyrir að gestirnir hefðum áhrif á úrslitin gilti sú regla að við gestirnir töpuðum alltaf fyrir heimamönnum, burtséð frá úrslitum skákanna.  Ég fékk því 2 vinninga í 5 skákum ásamt Birni Þorfinnssyni og Arnari Valgeirssyni hinum Vinalega!  Mér tókst að vinna ráðherrann og svo sjálfan Hróksforsetann.   

Ljóst er að Hrókurinn hefur gert þarna góða hluti og að skákin er orðinn mikið áhugamál sumra vistmanna.   Eðli málsins má ekki geta sigurvegara mótsins og sá sem sigraði tók það sérstaklega fram að það mætti alls ekki fréttast að hann hafi unnið!  "Ég vil alls ekki að menn telji mig skáknörd!"

 

Athugasemdir

[arnar valgeirsson, 21.7.2007 kl. 02:07]

jebbs, aldrei of mikið af lífsreynslu... vonandi áttu eftir að "lenda" þarna aftur, en vonandi einnig aðeins í stuttan tíma, svona eins og tvær stundir eða svo. alþjóðleg skákmót eru alltaf skemmtileg.