Mathiesen, krónan og Johnsen

Það vakti athygli mína um daginn er fjármálaráðherra sagði tal formanns Samfylkingar hafa áhrif á gengi krónunnar.  Ég fæ hins ekki betur séð en með þessu sé ráðherrann eiginilega að viðurkenna að Ingibjörg hafi rétt fyrir sér, þ.e. að krónan sé það slakur gjaldmiðill að segi einhver eitthvað um krónuna þá verði miklar sveiflur á genginu!

Alls konar kenningar hafa verið um fjarveru Johnsens á fundi Sjálfstæðisflokksins í Vestmannaeyjum og samsæriskenningasmiðir hafa lesið ýmislegt út úr því.   Ég tel skýringarnar hins vegar vera miklu einfaldari en menn hafi haldið. 

Þetta snýst auðvitað allt um krónuna!  Hefði Mathiesen látið sjá sig með Johnsen hefði krónan hríðfallið!

Já það er margt skrýtið í kýrhausnum

 

 

 

Athugasemdir

[Hjörtur J. Guðmundsson, 12.1.2007 kl. 15:23]

Ég er persónulega ekki sammála því að neikvætt tal Ingibjargar Sólrúnar um krónuna sé eitt og sér nóg til að hafa áhrif á gengi hennar. Það væri furðulegt ef svo væri. Þetta er a.m.k. ekki í fyrsta skiptið sem t.d. Ingibjörg eða Halldór Ásgrímsson hafa fjallað með neikvæðum hætti um krónuna og mér vitanlega hefur ekki orðið vart við að það hefði leitt til sérstakra sveiflna í gengi hennar.

Ég held annars að Árni hafi meira verið að skírskota til þess að tal Ingibjargar væri ábyrgðarlaust og sæmdi ekki stjórnmálamanni sem vildi væntanlega láta taka sig alvarlega.

[Gunnar Björnsson, 12.1.2007 kl. 15:48]

Ef þú skoðar fréttatímann í RÚV í fyrradag, http://dagskra.ruv.is/streaming/sjonvarpid/?file=4337969/0, segir fjármálaráðherra meðal annars:

"Yfirlýsingarnar eru stórhættulegar og einar sér til þess fallnar að grafa undir krónunni" og "ef þeir ætla ekki sjálfir með sínum yfirlýsingum að valda óróleika á gengismarkaðii"

Ég get ekki túlkað ummæli fjármálaráðherra á annan hátt en að telji að ummæli Ingibjargar geti haft áhrif á gengi hennar.  Að því má draga þær ályktarnir að fjármálaráðherra hafi nú ekki sjálfur of mikla trú á krónunni.