Rólegheit, veikindi og rok!

Í dag var alltaf planið að gera lítið.  Við Björn fórum hinn daglega göngutúr í morgun og keyptum brauð o.þ.h. í Consum, sem er stórmarkaður hér í grenndinni, mjög skemmtilegur með t.d. flottu kjötborði.  Á móti henni er svo Lidl, sem gengur undir nafninu Lido.   Ekki jafn skemmtileg verslun en er ódýrari.  Svona nokkurs konar Bónus á meðan Consum er einhvers konar Hagkaup.  Ekkert kjötborð er í Lido.  

Í dag ákvæðum við að fara í minigolf.  Björn var eitthvað hálfslappur en vildi endilega fara.  Þegar við komum á vettvang gaf hins vegar maginn sinn og brunað aftur heim og upp í rúm með veikan strákinn!  Lán í óláni að þetta skyldi ekki gerast á verri tíma t.d. í einhverjum skemmtigarðinum hérna.  Hann er allur að braggast, virðist hafa verið smá magaóruleiki en best að maður sleppi því að fara of ítarlega í veikindalýsingar.  Aðrir eru betri í því en ég!

Það var því ljóst að ekki yrði borðað út í kvöld.  Ég dreif mig þá í Consum til að versla meira enda átti það ekkert mál að vera, auglýst skýrum stöfum að opið sé alla daga frá 9-21:30 en...............þá var lokað.  Við nánari eftirgrennslan kom í ljós að það er ekki opið nema til 14:30 á sunnudögum!  Spánverjarnir sko með smáa letrið sko.  Annars er nokkuð spaugilegt að reyna að spyrja Spánverjana af einhverjum.  Alltaf er manni með svarað með spænsku en eina setningin sem ég kann í því tungumáli er: "uno cerveza grande"!

Ég hafði fyrr keypt nokkra hamborgara sem ég skellti á grillið en fjölskyldan uppgötvaði að spænskir hamborgarar eru ekki jafngóðir og þeir íslenskir.  Minntu frekar á kjötbollur í hamborgarabrauði!  Þetta er eitthvað sem við ætlum ekki að endurtaka.

Í dag lá maður því að mestu í sólinni en maður hljóp inn öðru hverju til að horfa á enska boltann.  Hér er Sky-afruglari og fylgir því sérstök vellíðan að horfa á enska boltann án þess að  365 hagnist á því!  Ætli Pétur Pétursson og Ari Edwald viti af þessu?  Ætli þeir geti kannski bannað Íslendingum að horfa á enska boltann í útlöndum?   Kannski þeir séu núna uppteknir að læra markaðsfræði og hvernig eigi ekki að koma fram við viðskiptavini sína. 

Seinni partinn skall svo á hávaðarok, með smá skúrum en þó er vel hlýtt.   Smá skruggur í kaupbæti.   Þegar þetta er ritað (um 21:00 á spænskum tíma) ætlum við strákarnir að rétt að skreppa í laugina.  

Á morgun er planið að fara á ströndina í Torreveja. 

Biðjum að heilsa heim!

Athugasemd: Skrifað í gærkveldi en netið virkaði þá ekki sem skyldi.  

Athugasemdir

[Stefán Jóhann Björnsson (IP-tala skráð) 14.8.2007 kl. 20:19]

Sælir bróðir sólamegin í lífinu.

Sá í gær í Fréttablaðinu að búið væri að fá kostun á á enska boltanum, sem tryggir gott verð á enska boltanum. Við eigum því væntanlega von á kostatilboði í stað þessa landlæga okurs.

Hafið það sem best í sólinni

Kveðja Stefán