Déjà vu? - Eyjamenn efstir eftir fyrri hlutann

 

Eyjamenn eru í kunnuglegri stöðu, efstir, eftir fyrri hluta Íslandsmóts skákfélaga.  Þeir voru það einnig í fyrra en máttu þá lúta í gras fyrir Bolvíkingum sem eru í öðru sæti rétt eins og þá.  Hellismenn eru í þriðja sæti.  Staðan er áhugaverð og getur boðið upp á marga möguleika.  Flest stefnir í að Mátar og b-sveit Bolvíkinga vinni sig upp í 1. deild.  Baráttan er hörð í 3. og 4. deild.  Annars virðist ritstjóri vera óvenju getspakur að þessu sinni nema í fjórðu deild.

Byrjum á fyrstu deildinni.  Fyrirfram áttu flestir von á baráttu strandbæjanna Vestmannaeyja og Bolungarvíkur.  Hellismenn ákváðu að þessu sinni að taka slaginn, nýjar áherslur með nýjum formanni auk þess sem klúbburinn á 20 ára afmæli á næsta ári, og kölluðu til þrjá erlenda stórmeistara og voru án efa með sterkustu efri borðin.  Á fyrsta borði fyrir Helli, tefldi Tékkinn David Navara, sem hefur 2722 skákstig og er einn allra stigahæsti skákmaður sem hér hefur tefld hérlendis.

Eyjamenn hafa 1½ vinnings forskot á Bolvíkinga Það er hins vegar ekki svo að sveitin standi best að vígi því Eyjamenn eiga bæði eftir að mæta Bolvíkingum og Hellismönnum.  Eyjamenn stilltu upp fjórum erlendum stórmeisturum auk Helga Ólafssonar. 

Bolvíkingar máttu teljast heppnir að tapa aðeins með 1 vinningi gegn Helli og lukkudísirnar voru einnig með þeim þegar Stefán Kristjánsson vann Gylfa Þórhallsson þegar sá síðarnefndi lék af sér manni í steindauðri jafnteflisstöðu.  Bolvíkingar stilltu upp tveimur erlendum úkraínskum stórmeisturum.  Bolvíkingar búa svo vel að þeir geta stillt upp stórmeistara (Þröstur Þórhallsson) á áttunda borði eitthvað sem ekkert annað taflfélag getur gert og geta kallað til tvo erlenda stórmeistara í síðari hlutanum og þá munu þeir hafa á að skipa langsterkustu sveitinni, a.m.k. á pappírnum. 

Hellismenn eru í þriðja sæti 1½ vinningi á eftir Bolvíkingum og þurfa að meta stöðu sína.  Eiga þeir að taka slaginn í seinni hlutanum?  Líkurnar á sigri eru ekki nema 15-20% þótt þeir kalli til 3-4 erlenda stórmeistara, sérstaklega ef Bolvíkingar koma með ofursveit. Erlendu skákmennirnir stóðu fyrir sínu (fengu allir 3½ vinning) en eins og ég sagði pistli fyrir mót var ljóst að skammur tími á milli Ól og ÍS myndi lenda á félaginu og því gekk mun verr að manna sína sveit en oft áður vegna þessa.  Hannes Hlífar náði sér ekki strik en Hjörvar fór mikinn og vann allar fjórar skákir sínar, sá eini í fyrstu deild sem fékk fullt hús í fjórum skákum.   

Hellismenn þurfa að meta stöðu sína.  Er það réttlætanlegt fyrir klúbbinn að leggja í þann kostnað upp á von og óvon.  Og hvað gerist ef Hellismenn taka ekki slaginn?  Þá er leiðin greiðari fyrir Eyjamenn þar sem þeir eiga eftir að tefla við Hellismenn en ekki Bolvíkingar.   Staðan í þessari skák er flókin og mjög óljós!

Taflfélag Reykajvíkur er í fjórða sæti.  Vert er þar að nefna frammistöðu Daða Ómarssonar sem hefur fullt hús, reyndar í þremur skákum og árangur hans í Haustmóti TR virðist ekki vera tilviljun.  Í 2. umferð tapaði sveit Taflfélags Reykjavíkur á öðru borði í ótefldri skák gegn Haukum.  Eitthvað sem mér finnst að ekki eigi að sjást í Íslandsmóti skákfélaga og allra síst á toppborðunum í efstu deild. 

Fjölnismenn eru í fimmta sæti en hafa mætt þremur efstu liðunum og geta vel náð ofar.  Akureyringar eru í sjötta sæti, Haukar í því sjöunda og KR-ingar reka lestina.  Mér sýnist flest benda til þess að Haukar og KR falli en hugsanlega geta þessi félög bjargað sér á kostnað Akureyringa.  

Staðan (spá ritstjóra í sviga):

• 1. (1) TV 25 v.
• 2. (2) TB 23½ v.
• 3. (3) Hellir 22 v.
• 4. (4) TR  17½ v.
• 5. (5)Fjölnir 14½ v.
• 6. (7) SA 12 v.
• 7. (8) Haukar 8 v.
• 8. (6) KR 5½ v.

2. deild

Mátar eru efstir eftir fyrri hlutann í 2. deild.   Mátar eiga reyndar eftir að mæta liðunum í 2.-4. sæti og eru því ekki öryggir um fyrstu deildar sæti.  Bolvíkingar eru í öðru sæti en ég tel þá sigurstranglegasta sérstaklega ef þeir styrkja a-liðið fyrir síðari hlutann en þá gætu Jón Viktor, Þröstur, Guðmundur og Dagur teflt með b-sveitinni.   B-sveitir TR og Hellis fylgja þarna á eftir og halda í veika von.  Sem fyrr er spá ritstjórans býsna nálægt stöðunni eftir fyrri hlutann.   Selfyssingar og Haukar eru í fallsætunum en eiga báðar eftir að tefla við Skagamenn svo þarna gæti ýmislegt gerst. 

• 1. (2) Mátar 20 v.
• 2. (1) TB-b 18½ v.
• 3. (4) TR-b 15 v.
• 4. (3) Hellir-b 14 v.
• 5. (5) SR 12 v.
• 6. (6) TA 8½ v.
• 7. (8) SSON 5 v.
• 8. (7) Haukar-b 3 v.

3. deild

Töluverðar breytingar urðu í 3. deild.  Liðunum var fjölgað í 16 úr 8 og teflt eftir svissneska kerfinu.  Auk þess er stuðst við stig (match point) í 3. og 4. deild í stað vinninga sem mun bara auka spennuna.    Sem fyrr er ritstjórinn býsna getspár en hann spáði aðeins fyrir átta efstu liðin og eru þau öll meðal níu efstu liða.   Þarna getur allt gerst en ég tel að Víkingaklúbburinn muni fara upp en mun óljósara hvaða lið fylgir þeim upp.  

 

Röð	Spá	Lið	Stig	V.
1	1	Vikingaklubburinn A	7	17,5
2	3	TG A	7	15
3	7	TV B	6	15,5
4	4	SA B	6	15,5
5	2	Godinn A	6	15
6		TR C	4	13,5
7	6	Hellir C	4	12
8	5	TB C	4	12
9	8	KR B	4	11,5
10		TG B	3	13
11		SA C	3	11
12		Hellir D	3	10,5
13		TV C	3	8,5
14		Sf. Vinjar A	2	9,5
15		SR B	2	8
16		Haukar C	0	4

 

4. deild

22 lið taka þátt í fjórðu deild sem er töluverð fækkun sem skýrist að öllu leyti með fjölgun liða í 3. deild.   Tvö lið hafa fullt hús stiga, Skagfirðingar og b-sveit Fjölnis.   Skagfirðingar hafa svo fleiri vinninga.   Borgnesingar koma í þriðja sæti en fyrir þeim fyrir ólympíufarinn Tinna Kristín Finnbogadóttir.

Ný skemmtileg félög setja svip sinn á mótið.  Kórdrengirnir mættu til leiks en þar eru ferðinni drengir sem tefldu áður fyrr en hafa lítið sést síðustu ár við skákborðið.   Skákfélagið Æsir tekur þátt en þar eru á ferðinni eldri borgarar.  Svo verður að nefna Ósk, en þá sveit skipa eingöngu stelpur og þótt mér vænt um að sjá gamlan skáknemenda minn tefla með þeim!

Ritstjórinn er alveg út úr korti varðandi spá í fjórðu deildinni.   Þrjú efstu liðin vinna sér rétt til að tefla í 3. deild að ári og þarna munu úrslitin ekki ráðast fyrr en á lokametrunum.

Röð	Spá	Lið	Stig	V.
1		Sf. Sauðarkroks	8	17
2	5	Fjolnir B	8	15,5
3		UMSB	6	18
4	1	SFÍ	6	16,5
5		TR D	6	16
6	4	S.Austurlands	6	14
7	3	Godinn B	4	14,5
8		UMFL	4	14,5
9		SSON B	4	14,5
10		TV D	4	13,5
11	2	Vikingaklubburinn B	4	13
12		Aesir feb	4	13
13		Godinn C	4	12,5
14		Fjolnir C	4	10
15		TG C	4	9,5
16		Kordrengirnir	3	11
17		TR E	3	8,5
18		Sf. Vinjar B	2	10,5
19		Hellir E	2	8
20		SA D	2	7,5
21		Fjolnir D	1	6,5
22		Osk	1	4

Ólafur S. Ásgrímsson og Bragi Kristjánsson fá sérstakar þakkir fyrir skákstjórn.  Helgi Árnason og Einar S. Einarsson eiga langflestar myndirnar í myndaalbúmi mótsins og eiga þakkir skyldar.  

Ég vil einnig benda á að Halldór Grétar Einarsson hefur tekið saman skákstigabreytingar eftir fyrri hlutann og fyrri mót á skákstigaútreikningstímabilinu.  Þar kemur t.d. í ljós að Jóhann Hjartarson hefur endurheimt stöðu sína sem stigahæsti skákmaður landsins.  Rétt er að sérstaklega að benda á miklar stigahækkanir Hjörvars og Lenku sem rjúka upp stigalistann.     

Og þá byrjar niðurtalninginn fyrir síðari hlutann sem fram fer 4. og 5. mars nk.............142 dagar.

Gunnar Björnsson

Höfundur er ritstjóri Skák.is og tefldi með b-sveit Hellis um helgina.

Athugasemdir

[Elvar Guðmundsson (IP-tala skráð) 12.10.2010 kl. 01:53]

Fyndinn pistill hjá þér Gunni og ég er ekki að tala um málfræði- og stafsetningarvillur.   Ég held að Hellir þurfi að fá sér allavega einn 2800+ stiga skákmann og kannski 3 2700+ skunka til þess að eiga séns.  En það kostar sko!

<>"Bolvíkingar eru í öðru sæti en ég tel þá sigurstranglegasta sérstaklega ef þeir styrkja a-liðið fyrir síðari hlutann en þá gætu Jón Viktor, Þröstur, Guðmundur og Dagur teflt með b-sveitinni."  Þarna er ég að greina ákveðna biturð og svekkelsi.  Kannski mæti ég í vor til þess að styrkja þessa aumu b-sveit
<>

[Þórir Ben (IP-tala skráð) 12.10.2010 kl. 08:38]

Það er rétt að Daði virðist hreinlega vera óstöðvandi þessi dægrin!  Þó má einnig benda á að Hjörvar var með 4 af 4 og þrír aðrir náðu þessu einnig um helgina; Rúnar Sigurpálsson, Þórir Ben :-) og Sigurður Daði.

[Gunnar Björnsson, 12.10.2010 kl. 09:28]

Kemstu í liðið, Elvar?

Gummi Gísla var einnig með 4/4.  3/3 í 1. deild og 1/1 í 2. deild.    

[Elvar Guðmundsson (IP-tala skráð) 12.10.2010 kl. 10:51]

Það er spurning.  Kæmist kannski á 5 eða 6 borð í b-liðinu en líklega yrði ég settur í c-liðið.   En þetta er allt opið í fyrstu deildinni ef liðin verða svipuð í vor.

[Taflfélag Vestmannaeyja, 12.10.2010 kl. 11:49]

Gunni, Vestmannaeyjar hafa aldrei kallast strandbær !  Svona átt þú að vita, maður sem hefur þrátt fyrir allt hætt þér hingað út í Eyjar.

[Halldór Grétar Einarsson, 12.10.2010 kl. 12:09]

Það eru náttúrulega tveir mestu útgerðabæir landsins sem berjast um Íslandsmeistaratitilinn í ár ásamt stórveldinu og afmælisbarninu í Helli. Við Bolvíkingar eigum bæði Elvar og Gumma Halldórs inni, þannig að í okkar villtustu draumum þá gætum við unnið þrefalt aftur !

Annars held ég að þetta verði mjög spennandi í vor og úrslitin muni ráðast af dagsformi liðanna á ögurstundinni.  Hellir er með sterkasta liðið á pappírunum og léttasta programmið eftir. 

[Gunnar Björnsson, 12.10.2010 kl. 13:18]

Rétt, Gauti.  Ég hefði átt frekar að tala um útgerðarbæi.   Vona að ég verði ekki gerður útlægur frá Eyjum um aldur og ævi, eftir þessi mistök!

[Elvar Guðmundsson (IP-tala skráð) 12.10.2010 kl. 16:02]

Það væri nú skondið ef að Suður-Evrópu þjóð eins og Vestmannaeyjar tækju upp á því að vinna deildarkeppnina í skák