Skákárið 2008

Skákárið 2008 var sérstakt skákár.  Taflfélag Reykjavíkur varð Íslandsmeistari eftir spennandi baráttu við Helli.  Fyrri hluti Íslandsmóts skákfélaga 2008-09 fór fram í skugga fjármálakreppu sem segja má að hafi hafist þá helgi með ríkisvæðingu Glitnis.  Dagur Arngrímsson og Björn Þorfinnsson stimpluðu sig inn sem framtíðar landsliðsmenn.  Íslensku stórmeistararnir voru flestir í kreppu.  Ýmist tefldu þeir lítið sem ekkert eða stóðu undir þeim væntingum sem gerðar eru til þeirra.  

Áfangar komu í hús.  Þar stóðu Dagur Arngrímsson, Guðmundur Kjartansson, Guðmundur Gíslason og Björn Þorfinnsson vaktina.  Dagur er orðinn alþjóðlegur meistari og búinn að ná sínum fyrsta stórmeistaraáfanga þótt einhver vafi sé á að hann sé fullgildur.  Björn kláraði alþjóðlega meistarann, reyndar á upphafsdögum ársins 2009, en þessir tveir skákmenn virðast vera ferskastir og eru líklegastir til að velta núverandi landsliðsmönnum úr þeirra sætum ásamt  Jóni Viktori Gunnarssyni sem hefur bætt sig töluvert á árinu og sigraði á alþjóðlegu skákmóti í Belgrad í Serbíu.  Guðmundur Kjartansson tók AM-áfanga í Harkany í Ungverjalandi og Gíslason á EM taflfélaga í Halkidiki í Grikklandi.

Og kannski það gerist á árinu 2009 þar sem landsliðið stóð sig afar illa á ólympíuskákmótinu og margir fara fram á endurnýjun.  Er kominn tími á allsherjar endurnýjun??  Tja, því verður stjórn SÍ að svara en árangur á síðasta ólympíuskákmóti var alls óviðundandi.  Sjálfur er ég hrifnastur af hugmyndinni um einvald sem velji liðið og þurfi þá ekki að horfa á stigin heldur geti valið besta LIÐIÐ.  Mér þykir það t.d. umhugsunarverð hugmynd að taka „áhættu" með liðsvali á EM strax í haust og gefa ungu skákmönnum sénsinn.

Hannes Hlífar varð Íslandsmeistari eins og venjulega og tefldi mun betur en í fyrra.  Hannes átti auk þess gott Reykjavíkurskákmót þar sem hann sigraði ásamt hinum Wang-gefnu Kínverjum.  Að öðru leyti ekki gott skákár hjá Hannesi og spurning hvort hann ætti ekki bara að flytja heim aftur.  Teflir best á Íslandi!  Henrik Danielsen tefldi mikið og á miklar þakkir skyldar fyrir það  Frábært fyrir íslenskan skákheim að fá tækifæri á að tefla við stórmeistara á hefðbundnum innlendum mótum. 

Í skákpólitíkinni gekk ýmislegt á.  Björn Þorfinnsson kosinn forseti SÍ eftir sigur á Pops-stjörnunni Óttari Felix Haukssyni.  Sumir töluðu um átök Hellis og TR en ég held varla og sem fyrr talað um mafíur.  Björn er vinsæll fýr, sem allir kunna vel við, þótt sigurinn hafi verið stærri en flestir áttu von á.

Eins og venjulega hefur ritstjóri valið hina og þessa viðburði ársins.  Sjálfsagt gleymist eitthvað í upptalningunni og biðst ég afsökunar á því!

Óvæntasta frétt ársins

Held að uppgangur Bolanna hafi verið hvað óvæntastur á árinu 2008.  Reyndar var þetta búið að „leka út" lengi en fáir tóku þetta alvarlega.  Sjálfur heyrði ritstjórinn Halldór Grétar Einarsson tala fjálglega um framtíðaráætlanir Bolanna fyrir 2-3 árum en tók tal hans aldrei alvarlega!

Skák ársins 

Ekki spurning.  Eina tapskák Taflfélags Bolungarvíkur á árinu.  Sá sem stjórnaði hvítu mönnunum sannaði að þar er á ferðinni virkilega góður skákmaður.  Sjá nánar:  http://hornid.com/cgi-bin/mwf/topic_show.pl?pid=51640;hl=

Deila ársins

Kosningabaráttan á milli Björns Þorfinnssonar og Óttar Felix Haukssonar hlýtur að teljast deila ársins.  Samt aldrei alvarlega deila enda skyggja deilur um notkun bandstriks frá árinu 2006 og hvort mætti kalla Íslandsmeistara Íslandsmeistara á árinu 2007 gjörsamlega á smá kosningaátök.  Menn hafa svo slíðrað sverðin og fær ritstjóri ekki betur séð en að öll dýrin í skákskóginum séu vinir!

Klúður ársins

TR fyrir að vera ekki tilbúnir með „We Are The Champions" eftir sigur á Íslandsmóti skákfélaga.  Eg meina „Winners takes it all?" Hvað hefði spænska landsliðið á EM með alla Liverpool-leikmennina sagt hefði það lag verið spilað?

Formaður Hellis var reyndar beðinn um að redda diski með Queen-laginu en.................því var hafnað snarlega!

Lið ársins:

TR-ingar stóðu sig vel og náðu að klára Hellismennina en lið ársins hljóta að teljast Bolar sem stálu allri athygli með sitt ofurlið sem þeir mættu með í upphafi kreppunnar og spöruðu víst lítíð.  Kláruðu þeir kannski gjaldeyrisforðann?  Davíð?  Hvað finnst þér um gjaldeyrisbruðl  Bolvíkinga?  Halló, ertu þarna ennþá?  Já, auðvitað, hvernig dettur mér annað í hug! 

Félagaskipti ársins

Margir skákmenn gengu til liðs við Bolvíkinga og má þar nefna félagaskipti Jóns L. Árnasonar og Braga Þorfinnssonar úr Helli og Jóns Viktors Gunnarssonar og Dags Arngrímssonar út Taflfélagi Reykjavíkur.

Efnilegasti skákmaður ársins

Sá skákmaður sem hækkaði mest allra frá áramótunum 2007/08 var Bjarni Jens Kristinsson en hann hækkaði um 137 stig.  Næst á eftir voru Salaskólakrakkarnir Patrekur Maron Magnússon með 117 stig og og Jóhann Björg Jóhannsdóttir með 107 stig.  Aðrir ná ekki 100 stigum en næst þar á eftir eru Daði Ómarsson, Atli Freyr Kristjánsson og Hallgerður Helga Þorsteinsdóttir.  

Hjörvar Steinn Grétarsson. unglingameistari Íslands og einfaldlega okkur besta von eins og er.  Ef til vill tími til að gefa ungum skákmönnum eins og Hjörvari tækifæri á að tefla í landsliði Íslands á árinu 2009?  Spyr sá sem ekki veit  Hjörvar er efnilegasti skákmaður ársins að mati ritstjóra þótt skákárið 2008 hafi ekki verið hans besta. 

 Skákkona ársins

Hallgerður Helga Þorsteinsdóttir Íslandsmeistarinn í skák hlýtur að teljast skákona ársins.  Frábær árangur hjá henni.  

Skákmaður ársins

Óvenju erfið spurning fyrir árið 2008.  Hannes Íslandsmeistari og sigraði á Reykjavíkurskákmótinu en átti að öðru leyti ekki gott ár og lækkar um eitt stig á árinu.

Héðinn, sem var skákmaður ársins 2007 tefldi aðeins á einu kappskákmóti, EM einstaklinga á árinu, fyrir utan liðakeppnir, sem verður að teljast lítið fyrir atvinnumann og lækkar um 7 stig. 

Hinir atvinnumennirnir tefldu lítið nema Henrik sem tefldi mikið en var nokkuð brokkgengur á árinu. 

Það er athyglisvert að af sjö stigahæstu skákmönnum landsins töpuðu sex skákstigum.  Aðeins Jóhann Hjartarson hækkaði á stigum en hann hækkaði um eitt stig!

Jón Viktor átti gott ár og sigraði á móti í Belgrad.  Björn Þorfinnsson átti gott ár, sem og Dagur Arngrímsson og Guðmundur Kjartansson .  Dagur og Gummi voru nokkuð brokkgengir á árinu en luku því með miklum stæl þegar Dagur tók stórmeistaraáfanga í Harkany en Gummi náði AM-áfanga í sama móti. 

Flestir okkar alþjóðlegu meistarar eru virkir og hafa verið að sýna góðan árangur  Frábært að sjá hvað alþjóðlegu meistararnir okkar hafa verið duglegir við fara erlendis til að tefla og blásið á allt krepputal.  Árið 2008 var eiginlega ár alþjóðlegu meistaranna og sterkustu FIDE-meistaranna!

Skákmaður ársins er Jón Viktor Gunnarsson. Sigurinn í Belgrad ræður þar mestu enda ekki á hverjum degi sem íslenskir skákmenn sigra á opnu sterku alþjóðlegu móti!  Að öðru leyti jafn og góður árangur yfir árið sem styrkir stöðu Jóns sem eins besta skákmanns landsins. 

Endurkoma ársins

Það hlýtur að vera Guðmundur Gíslason, sem hefur lítið teflt síðustu ár, en kom mjög sprækur inn á EM taflfélaga þar sem hann náði AM-áfanga.

Viðburður ársins

Skáksamband Íslands hélt Reykjavíkurskákmót í upphafi ársins.  Hellir stóð fyrir tveimur alþjóðlegum mótum, Fiskmarkaðsmótinu og alþjóðlegu unglingamóti.  TR hélt alþjóðlegt Boðsmót félagsins. 

Reykjavíkurskákmótið, sem var óvenju vel heppnað nú, hlýtur að teljast viðburður ársins.  Frábært konsept að mínu mati að velja færri „fræga" skákmenn og bjóða fremur þessum ofurefnum sem settu svo mjög skemmtilegan svip á mótið.

Skemmtilegir viðburðir voru haldnir á árinu út á landi.  Eyjamenn stóðu að miklum myndarskap af Íslandsmóti 15 ára og yngri og náðu metþátttöku en Karl Gauti og félagar hafa unnið þrekvirki í unglingastarfi síðustu misseri.  Bolar héldu flott Íslandsmót í hraðskák í Víkinni og Snæfellingar héldu vel heppnað mót í Ólafsvík.  Flott framtök og vonandi að það verði a.m.k. jafn mörg mót út á landi í ár!

Svo var Skákakademían stofnuð sem hlýtur að vera góður fyrirboði um öflugt skáklíf í borginni. 

Taflfélag ársins

Það hljóta að vera Bolarnir.  Þau tækifæri sem þeir eru að gefa stórmeistaraefnunum eru frábær og virðast strax vera að skila sér. 

Flott innkoma í haust og menn bíða spenntir eftir seinni hlutanum.  Í fyrra var „Winner Takes It All" sem var spilað að loknu móti.  Ætli það verði „We are the Champions" nú eða kannski „Big Spender"!

Félagsmálamaður ársins

Eyjamenn voru sterkir á árinu og Karl Gauti á skilið hól fyrir kröftugt unglingastarf.  Bolvíkingar hljóta hins vegar að eiga þessa nafnbót enda var árið þeirra..  Formaður þeirra Guðmundur Daðaon er félagsmálamaður ársins!

Skáksíða ársisins

Skák.is

Líffæri ársins

Ristillinn.

Ummæli ársins:

Ólafur H. Ólafsson á aðalfundi SÍ þegar hann hafði uppgötvað hverjar væru fulltúrar Skákfélags Selfoss og nágrennnis (Þorfinnur Björnsson og Bragi Þorfinnsson):   „Þeir hafa greinilega staðið sig betur í smöluninni".og Jón L. Árnason eftir einu tapskák Bolanna á Íslandsmóti skákfélaga, við andstæðing sinn, „þú tefldir svo illa að ég fipaðist" og skellihló svo!

Að lokum

Það er óhætt að segja að ritstjóri hefur oft verið bjartsýnni um áramót en nú enda allt í helvítis fokking fokki á landinu!

Nú er þörf á að skákáhugamenn standi saman og ekki síst að bakhjarlar íslenskrar skákhreyfingar standi þétt á bak við íslenska skákmenn og íslenskt skáklíf  Ekki veitir af.

Árið byrjar þó mjög vel með góðri frammistöðu Bjössa, Jóns og Gumma.  Vonandi fyrirboði um skákárið 2009. 

Áfram íslensk skák!  Áfram Ísland!

Gunnar Björnsson 

Engin kreppa hjá Bolvíkingum

Taflfélag Bolungarvíkur er með mjög vænlega stöðu að loknum fyrri helmingi Íslandsmóts skákfélaga.  Í hálfleik hafa Bolarnir þriggja vinninga forskot á Helli og Fjölni og hafa mætt öllum sterkustu sveitunum nema Helli.   Eina sem virðist geta komið í veg fyrir sigur Bolvíkinga er langvinnandi kreppa sem myndi skrúfa fyrir allt fjárstreymi til Vestfjarða!   Eyjamenn eru í góðri stöðu í 2. deild en óljóst er hvaða lið fylgir þeim upp.  B-sveit Bolanna er í vænlegri stöðu í 3. deild en þar er einnig óljóst hver fylgir þeim upp.  Í fjórðu deild eru Mátar efstir fyrir seinni hlutann sem fram fer á þeirra heimavelli....eða þannig.  Þar eru líka mikil spenna.  

Byrjum á fyrstu deildinni.  Bolar hafa verið í miklu stuði og voru taplausir þar til þeir mættu Helli-b í fjórðu umferð en þar hitti Jón L. Árnason fyrir ofjarl sinn þegar hann mætti þeim sem þetta ritar!  Minn fyrsti sigur á stórmeistara en skákin hefur verið birt á Horninu af hinum hógværa ritstjóra.  Lið Bolvíkinga er ægisterkt og hvergi veikan blett að vinna.  Fjölnis- og Hellismenn eru í 2.-3. sæti en ólíkt hafast þessi lið að.  Fjölnismenn stilltu upp fjórum erlendum stórmeisturum rétt og Bolar en Hellismenn ákváðu nú að stilla eingöngu upp heimavarnarliðinu og það gerðist á fjórðu umferð gegn TR að enginn stórmeistari eða alþjóðlegur meistari tefldi með liðinu en slíkt hefur væntanlega ekki gerst hjá Helli frá sokkabandsárum félagsins fyrir svona 15 árum síðan!

Íslandsmeistararnir í Taflfélagi Reykjavíkur eru aðeins í fjórða sæti og virkuðu ekki sannfærandi fyrr en fjórðu umferð er þeir lögðu Hellismenn 4,5-3,5.  Slæm úrslit gegn eigin b-sveit þar sem sigur vannst aðeins 5-3 var ekki gott veganesti og sveitin nær ekki  50% vinningshlutfalli eftir fyrri hlutann sem telst ekki gott á þeim bæ.    

B-sveit Hellis er í fimmta sæti en eru engan veginn sloppnir úr fallbaráttunni því þeir eiga eftir að mæta Bolum, TR og Fjölni!  Akureyringar eru í sjötta sæti með jafn marga vinninga og Hellir og  berjast fyrir lífi sínu í deildinni.  Haukar eru einnig með jafn marga vinninga og Hellir og SA en þeir fengu svakalegt prógramm um helgina því þeir mættu öllum fjórum sterkustu sveitunum.  Staðan þeirra er því í raun veru bara ágæt.   Haukar voru með fjóra erlenda skákmenn en aðeins einn stórmeistara.  

B-sveit TR rekur lestina.  Það vakti athygli að gegn Akureyringum voru tvö auð borð.  Mér finnst afar slæmt þegar slíkt gerist og þetta á hreinlega ekki að gerast í efstu deild.   Flytja á slík vandamál í neðri deildir en sjálfsagt hafa vandamálin átt sér stað á síðustu metrunum og því verið erfitt fyrir þá að bregðast við í tæka tíð.   Þessi tvö töp geta hæglega kostað b-sveitina sæti í fyrstu deild.  B-sveitin er að berjast við Helli-b og SA og stendur óneitanlega heldur lakar að vígi.

Staðan eftir fyrri hlutann (spá ritstjóra í sviga)

• 1. (1) Taflfélag Bolungarvíkur 24½ v. af 32
• 2.-3. (3) Skákdeild Fjölnis  21½ v. (6 stig)
• 2.-3. (4) Taflfélagið Hellir a-sveit 21½ v. (6 stig)
• 4. (2) Taflfélag Reykjavíkur a-sveit 15½ v.
• 5. (6) Taflfélagið Hellir b-sveit 11½ v. (3 stig)
• 6. (7) Skákfélag Akureyrar 11½ v. (2 stig)
• 7. (5)Skákdeild Hauka 11½ v. (1 stig)
• 8. (8) Taflfélag Reykjavíkur 10½ v.

Ritstjóri virðist vera nokkuð getspár.   Bolar vinna, en Fjölnir og Hellir berjast væntanlega um silfur og brons.  TR-ingar virðast vera úr leik en gætu náð bronsi verði úrslitin þeim hagstæð.   Þrjú lið munu berjast í bullandi fallbaráttu og sjálfsagt ráðast þau mál ekki fyrr en á lokametrunum.

2. deild

Í 2. deild standa Eyjamenn vel að vígi.   Luis Galego tefldi á fyrsta borði og sænskur alþjóðlegur meistari Jan Johannsson var á öðru borði.  Jan lenti illa í íslenskum skákmeisturum en í fyrstu umferð tapaði hann fyrir Vigfúsi Ó. Vigfússyni og gerði síðar jafntefli við Sigurð Arnarsson.   Það fyndna við sigur Vigfúsar var að hann hafði ekki hugmynd hversu sterkur andstæðingurinn var og var mjög hissa þegar ég sagði honum það!  Örugglega hjálpað honum í skákinni!

B-sveit Hauka og KR-ingar eru í 2. og 3. sæti og virðast berjast um það hvort liðið fylgi Eyjamönnum upp. 

Fallbaráttan er hörð í 2. deild og sé ég ekki betur en að fimm lið séu í fallbaráttunni.  Vandi er um að spá hvernig það endar.

Staðan (spá ritstjóra í sviga):

• 1. (1) Taflfélag Vestmannaeyja 19 v.
• 2. (4) Skákdeild Hauka b-sveit 16 v.
• 3. (2) Skákdeild KR 14 v.
• 4. (7) Skákfélag Selfoss 10½ v. (4 stig)
• 5. (3) Taflfélag Garðabæjar 10½ v. (3 stig)
• 6. (5) Skákfélag Reykjanesbæjar 9 v.
• 7.-8. (6)Skákfélag Akureyrar b-sveit 8½ v. (1 stig)
• 7.-8. (8) Taflfélagið Hellir c-sveit 8½ v. (1 stig)

Satt segja var spáin sem ég setti fram mun nærri lagi en mér óraði fyrir og skekkjan aldrei meira en 3 sæti.  Þarna verður virkilega hörð barátta á Akureyri næsta vor.

3. deild

Mjög svipað ástand er í 3. deild og í 2. deild.  Eitt lið langbest, tvö lið þar á eftir og fimm lið í botnbaráttu!

B-sveit Taflfélags Bolvíkinga er að rúlla upp deildinni.  Um annað sæti virðast tvö lið berjast um, þ.e. Skagamenn og c-sveit TR.  Fimm lið geta fallið en staða d-sveitar Hellis er þó verst.

Staðan:

Staðan (spá ritstjóra í sviga):

• 1. (1) Taflfélag Bolungarvíkur 21½ v.
• 2. (3) Taflfélag Reykjavíkur c-sveit 15½ v.
• 3. (2) Taflfélag Akraness 14½ v.
• 4. (6) Taflfélag Reykjavíkur d-sveit 10 v.
• 5. (7) Skákfélag Reykjanesbæjar b-sveit 9½ v.
• 6. (4) Taflfélag Garðabæjar b-sveit 9 v. (4 stig)
• 7. (5) Skákdeild Hauka c-sveit 9 v. (3 stig)
• 8. (8) Taflfélagið Hellir d-sveit 7 v.

Ritstjóri er bara nokkuð sannspá og skekkjan mest tvö sæti.   Þetta verður stríð fram á síðustu stundu.

4. deild:

Taflfélagið Mátar leiðir í fyrstu deild.  Í öðru sæti er c-sveit Bolanna en um er að ræða  að mestu leyti b-sveitina frá síðustu keppni.  Víkingaklúbburinn er í þriðja sæti.   Alltaf gaman að fjórðu deildinni.  Þrjú lið keppa í fyrsta sinn en það eru Mátar og Vinjarmenn og Skákfélag Siglufjarðar.  Er reyndar ekki viss um það síðastnefnda en hafi þeir tekið þátt áður eru þá væntanlega a.m.k. 20 ár síðan!

Staða efstu liða (spá ritstjóra í sviga):

•   1 (1) Taflfélagið Mátar 19.5 v.
•   2   Tf. Bolungarvíkur c-sveit  18 v.
•   3  (3) Víkingaklúbburinn a-sveit  17.5 v.
•   4   SA c-sveit  16 v.
•  5-6  KR - b sveit  15.5 v.
•  5-6 Sf. Goðinn a-sveit  15.5 v.
•   7   Skákfélag Vinjar 15 v.
•  8-9 (2) Taflfélag Vestmannaeyja b  14.5 v.
•  8-9 Tf. Bolungarvíkur d-sveit  14.5 v.
• 10-12 KR - c sveit  13.5 v.
• 10-12 Skákfélag Sauðárkróks  13.5 v.
• 10-12 Sf. Siglufjarðar  13.5 v.

Spáin í fjórðu deild er að einhverju leyti út í hött.  Ég einfaldlega áttaði mig ekki á því hversu sterk c-sveit Bolanna væri.   Þarna getur líka allt gerst!

Að lokum

Enn einni skemmtilegri Deildakeppnishelgi lokið!  Að þessu sinni var teflt í skugga fjármálakreppu og fannst mér ákaflega gaman að henda frá mér þeim áhyggjum og getað hugsað um skák um helgina!  Þó voru málin rædd um helgina og m.a. sagði einn gárunginn að sennilega væri þessi kreppa góð fyrir íslenska skákheiminn því það væri fullt til að vel teflandi bankamönnum sem gætu nú snúið sér að skákinni!

Seinni hlutinn fer fram 21. og 22. mars á Akureyri.  Þar verður fjör og spenna og vonandi að flestir sjái sér fært um að skella sér norður þá helgina!

Gunnar Björnsson

Verður gott gengi á Bolvíkingum?

Fyrri hluti Íslandsmóts skákfélaga fer fram um helgina í Rimaskóla.  Ekki minni spenna þar en í efnahagslífinu.   Munu sum félög rísa hraðar en krónuvísitalan og munu önnur félög falla hraðar en hlutabréfagengið?   Í fyrstu deild eru Bolvíkingar sigurstranglegastir en Íslandsmeistararnir í Taflfélagi Reykjavíkur líklegastir til að veita þeim keppni. 

Bolvíkingar munu mæta til leiks með fjóra erlenda stórmeistara.  Með þeim teflir, samkvæmt heimildum ritstjóra, hollenski stórmeistarinn Loek van Wely, gríski stórmeistarinn Halkios auk tveggja úkraínska stórmeistara.  Með TR teflir franski stórmeistarinn Maze og með Fjölnismönnum teflir sjálfur Carlsson, Emanuel Berg (Rúnar er í Helli), Oral og Bojkov.  Kveynis teflir með Haukum.  Ritstjóri hefur ekki upplýsingar um erlenda skákmenn í öðrum félögum.   Án efa kosta erlendu skákmennirnir félögin mun meira en ætlað verði í upphæði enda eru þóknanirnar væntanlega greiddar í dýrum og eftirsóttum gjaldeyri.  

Það er mín spá að sterkt lið Bolvíkinga muni sigra, og sennilega nokkuð örugglega.  TR hafi annað sæti á sínum fasta kjarna og að Fjölnismenn verði í þriðja sæti.  Breidd Fjölnismanna er ekki nógu góð að mínu mati til blanda sér í alvöru í toppbaráttuna .  Ekki má svo vanmeta Hellisbúanna. 

Í fallbaráttunni berjast væntanlega þrjú lið um sjötta sætið.  Það eru b-sveitir TR og Hellis og a-sveit Skákfélag Akureyra, sem hefur orðið fyrir miklum búsifjum þar sem margir sterkir skákmenn úr félaginu hafa stofnað nýtt félag, Taflfélagið Máta,.  Ég ætla mér að spá í að hið seiga b-lið Hellis haldi sér uppi en Skákfélag Akureyrar og b-sveit TR falli. 

Spá ritstjóra:

• 1. Bolungarvík
• 2. TR
• 3. Fjölnir
• 4. Hellir
• 5. Haukar
• 6. Hellir-b
• 7. SA
• 8. TR-b

 

2. deild

Spennan í 2. deild verður ekki síðri.   Mínir heimildir herma að með Eyjamönnum teflir tveir erlendir meistarar og þar af Luis Galego sem er farinn „heim" til Eyja svo maður noti útjaskaðan frasa.   Ég ætla að spá Eyjamönnum sigri.   Það er hins vegar nánast ómögulegt að spá í hvaða lið fylgi Eyjamönnum upp.  Ég hef satt að segja ekki hugmynd um það!  Ég ætla að vera djarfur og spá að KR-ingar sem unnu þriðju deildina fylgi þeim.  B-sveit Hauka, TG eða jafnvel Reyknesingar gætu þó tekið sætið.  Ég ætla að spái að fallið verði c-sveitar Hellis og Selfyssinga eða jafnvel b-sveit SA sem hefur auðvitað veikst mikið eftir stofnun Máta.  Á móti kemur að sterkir skákmenn úr Taflfélagi Dalvíkur styrkja liðið og ég átta mig ekki almennilega á styrkleika b-sveitar Norðlendinga. Að mínu mati getur nánast allt gerst í þessari deild og hugsanlega verði lítill sem enginn munur á liðinu í 2.-7. sæti.      Sennilega meiri lýkur á ríkisstjórnin grípi til einhverja aðgerða út af efnahagsmálum en að þessi spá rætist! 

Spá ritstjóra:

• 1. TV
• 2. KR
• 3. TG
• 4. Haukar-b
• 5. Reykjanes
• 6. SA-b
• 7. Selfoss
• 8. Hellir-c

 

3. deild

Tvö lið sem áttu sæti í þriðju deild hafa dregið sig úr keppni.  Það eru annars vegar Dalvíkingar og hins vegar Kátu biskuparnir.   Missir af báðum þessum sveitum.  Ég man t.d. eftir Dalvíkingum í fyrstu deild en þá tefldu þeir undir merkjum UMSE.  Sæti þessara félaga  taka Hellir-d, sem endaði í þriðja sæti í fjórðu deild í fyrra og b-sveit Skákfélags Reykjanesbæjar sem endaði í sjöunda sæti í þriðju deild.

Öruggt verður að teljast að b-sveit Bolvíkinga sigri.   Rétt eins og í 2. deild er erfitt að spá í spilin með önnur sæti.  Ég ætla að spá að Skagamenn endurheimti sæti sitt  í næstbestu deildinni og komist á sama stall og fótboltastrákarnir.  Hugsanlega gætu TR-c og TG-b blandað sér í þá baráttu.  Liðin sem komu bakdyramegin í deildina falli hins vegar þ.e. Hellir-d og SR-b.    Set alla fyrirvara á spána í þriðju deild og minni á að greiningardeildir spáðu að hlutabréf myndu hækka umtalsvert á árinu. 

Spá ritstjóra:

• 1. Bolar-b
• 2. TA
• 3. TR-c
• 4. TG-b
• 5. Haukar-c
• 6. TR-d
• 7. SR-b
• 8. Hellir-d

 

4. deild

 

Mér skilst að það sé metþátttaka verði í deildinni eða alls 30 lið!  Í fyrra voru þau 27.  Reyndar minni hlutfallslega hækkun en verðbólgan á sama tíma.  Ég ætla að spá að upp fari Mátar og TV-b.   Það er samt ákaflega erfitt að átta sig á styrkleika sveitanna.  Víkingasveitin og  b-sveit Fjölnis gætu blandað sér í þessu báráttu og örugglega einhver önnur lið sem ritstjóri áttar sig ekki á.  

Spá ritstjóra:

• 1. Mátar
• 2. TV-b
• 3. Víkingasveitin
• 4. Fjölnir-b
• 5. SSA

Að lokum

Þegar líða fer að deildó fer alltaf um mann mikil tilhlökkun.  Þetta er einfaldlega langskemmtilegastan keppnin.  Þarna hittir maður alltaf gamla kunningja og hvað er skemmtilegra en að ræða um gengi gengi krónunnar, Seðlabankann, skáklífið, veðrið og spá ritstjóra, en á henni hafa margir skoðun á.   Ekki taka hana of alvarlega!  Þetta er ekki unnið á sama vísindalegan háttinn og spár greiningardeildanna.  

Köstum af okkur öllum fjármálapælingum um helgina og þjónum skákgyðjunni!  Og munið svo að slökkva á GSM-símanum, líka þú Stefán Freyr.  

Gunnar Björnsson

TR Íslandsmeistari skákfélaga eftir spennandi keppni

Ritstjóri virðist hafa verið býsna nákvæmur í spá sinni um gang mála á Íslandsmóti skákfélaga.  TR-ingar höfðu sigur eftir æsispennandi viðureign við Helli þar sem úrslitin réðust á síðustu sekúndunum.  Haukar mörðu þriðja sætið á stigum eftir mikla baráttu við Fjölni.   Hellir-b var öruggur sigurvegari b-liða keppninnar og fór sveitin á kostum í síðari hlutanum .  Sveitin hækkar um 120 stig sem þýðir að sveitarmeðlimir fengu um 8 vinningum meira en gera hefði mátt ráð fyrir!  Bolvíkingar settu mikinn svip á keppnina, bæði með góðri frammistöðu í 2. deild og ekki síður með frestunum í þeirri fjórðu en það mál er enn ekki til lykta leitt  þegar þetta er skrifað. 

Fyrir síðari hlutann höfðu TR-ingar gott 3,5 vinnings forskot á Íslandsmeistarana.  Íslandsmeistararnir ákváðu hins vegar að kalla til liðsauka og það engan smá liðsauka, heldur skákmenn alla leið frá Egyptalandi.  Þar fór fremstur í flokki, heimsmeistarinn, Ahmed Adly, sem er heimsmeistari 20 ára og yngri.   Plan Hellis var að minnka forystuna og treysta svo að leggja TR-inga í lokaumferðinni.  Fyrir lokaumferðina var munurinn 2 vinningar.   

Lengi leit út fyrir að það gæti gerst.  Grjótharðir TR-ingar héldu þó sínu, sem kölluðu til liðsauka, sjálfan Helga Áss Grétarsson, sem að þessu sinni mætti myndavélalaus og tefldi enda hættur að skrifa skákdálka í Moggann.   TR-ingar höfðu sigur í viðureigninni.  Helgi Áss missti af skemmtilegri hróksfórn sem ég vonast til að sjá í fléttudálki hans sjálfs næstu daga!  Helgi er annars hættur að skrifa stóru dálkana í Mogganum.  Við þeim tekur Helgi Ólafsson sem mun framvegis því skrifa tvisvar á viku. 

Sigur TR var sanngjarn.  Sterkasta liðið stigalega séð en það hefur oft verið vandamál hjá þeim að fá sína sterkustu menn að skákborðinu en þeir létu sig ekki vanta nú.   Hellismenn börðust til síðasta blóðdropa en tókst ekki að halda dollunni í Breiðholtinu.  Ég held að Hellismenn líti á þetta sem mjög tímabundið ástand!

Haukar sýndu einnig mikinn baráttuvilja með því að ná þriðja sætinu af Fjölni en sætið vannst á stigum.  Haukar hafa rétt til að tefla á EM talfélaga en ég veit að þangað stefna þeir.   

Hellir-b kom skemmtilega á óvart.  Árangurinn í seinni hlutanum var 5-3 gegn Fjölni, 6,5-1,5 gegn SA og 7,5-0,5 gegn TV!  Samtals hækka sveitarmeðlimir sveitarinnar um heil 117 stig sem verður að teljast ótrúlegt!  B-sveitin er ótvíræður Íslandsmeistari b-sveita með 18,5 vinnings forskot á næstu sveit!  Og ekki nóg með það heldur er sveitin aðeins þremur vinningum frá verðlaunasæti. 

SA-a hafnaði í 6. sæti og SA-b og TV féllu eins og reyndar var nokkuð fyrirséð fyrir mót.

Lokaúrslit (spá í sviga):

1. (1) TR 43 v.
2. (2) Hellir-a 40 v.
3. (4) Haukar 34,5 v. (9 stig)
4. (3) Fjölnir 34,5 (7 stig)
5. (6) Hellir-b 31,5 v.
6. (6) SA-a 20,5 v.
7. (7) SA-b 13 v.
8. (8) TV 7 v.

 

Stjarna mótsins hlýtur að vera Stefán Bergsson sem vann bæði egypska stórmeistarann Bassain hjá Helli og gerði jafntefli við Glitnisstórmeistarann Héðin Steingrímsson.  

Eftirtektarvert er að skoða uppskeru liðanna.   B-lið Hellis hækkar um 107 stig og Haukar um 42 stig.  Bæði a-lið Hellis og TR hækka lítilsháttar.

Akureyringar áttu ekki góðan dag í deildinni. A-sveit norðanmanna lækkar samtals um 71 stig, b-sveitin um 57 stig, Fjölnismenn um 40 stig og Eyjamenn um 36 stig. 

Ritstjóri vill óska TR-ingum til hamingju með verðskuldaðan sigur.   Njótið á meðan þið getið!

2. deild

Bolvíkingar unnu öruggan sigur í 2. deild eins og fyrirséð var.  B-sveit TR fylgir þeim upp í 1. deild.  B-sveitin var sterk en með henni tefldu t.d. Dagur Arngrímsson, sem kláraði AM-titilinn með jafntefli gegn skagamanninum Gunnari Magnússyni.  Gaman að var að sjá Lárus Jóhannesson koma að tefla eftir langt hlé.

Annars var spádómur ritstjóra góður.  Aðeins skeikaði á liðunum í fjórða og fimmta sæti en þar gerði ritstjóri þau mistök að spá Garðbæingum ekki fjórða sæti!

Reyknesingar og Kátir biskupar féllu en þessi lið fóru upp í fyrra. 

Lokaúrslit (spá í sviga):

1. (1) Bolungarvík 33 v.
2. (2) TR-b 27,5 v.
3. (3) Haukar-b 24 v.
4. (5) TG-a 22,5 v.
5. (4) SR-a 22 v.
6. (6) Selfoss 20 v.
7. (7) TA 14 v.
8. (8) Kátu biskuparnir 4,5 v.

3. deild

Enn var ritstjóri sannspár er hann spáði KR sigri og Helli-c öðru sæti.  Og hafði rétt fyrir sér með TG-b, þ.e fjórða sætið.  Og reyndar spáði ég fullkomlega um úrslit!  Mikil spenna var í toppbaráttunni og í síðustu umferð háðu c-sveitir Hellis og TR úrslitaviðureign um 2. deildar sæti að ári.  Þar höfðu Hellismenn betur í hörkuviðureign og eru c-liða meistarar annað árið í röð.  Sætt fyrir Hellismenn en bætir auðvitað ekki upp gengið í 1. deild!.  B-sveitir Reyknesinga og Eyjamanna féllu.

Lokaúrslit:

1. (1) KR 29 v.
2. (2) Hellir-c 28 v.
3. (3) TR-c 26 v.
4. (4) TG-b 23 v.
5. (5) Dalvík 18,5 v.
6. (6) TR-d 16,5 v.
7. (7) SR-b 15,5 v.
8. (8) TV-b 11,5 v.

4. deild:

Lokastaðan (eða næstum því):

1. Haukar-c 27,5 v (10 stig)
2. Hellir-d 27,5 v. (9 stig)
3. Austurland 26,5 v. (10 stig)
4. Selfoss 26,5 v. (10 stig)
5. KR-b 25 v. + 2 fr.
6. Bolungarvík 24,5 v. + 6 fr. 
7. Fjölnir-b 24,5 v + 2 fr.
8. Víkingasveitin 24,5 v.
9. Haukar-d 23 v. (7 stig)
10. Goðinn 23 v. (6 stig)

Fjórða deild er enn ekki búinn og þar hefur margt gengið á.  Að minnsta kosti þrír Bolvíkingar voru veðurtepptir á Vestfjörðum.  Hvorki var flugfært né akstursfært frá Bolungarvík.  Skákstjórar gripu til þess ráðs að fresta viðureignum b-sveitarmanna eða tveimur skákum í hverri umferð.  Í 2. deild „samdi" Guðmundur Gíslason ávallt jafntefli án þess að vera á staðnum.   Það að semja jafntefli á ótefldar skákir gengur auðvitað í berhögg við reglur FIDE en um þetta virtist sátt í 2. deild, enginn kærði og því er ekkert hægt um að málið að segja.

Erfiðara reyndist þó að eiga við málið í fjórðu deild.  Þar var tveimur skákum frestað í hverri umferð gegn Fjölni-b, KR-b og Skákfélagi Sauðárkróks.   C-sveit Hauka er komin í upp í 3. deild en Bolvíkingar fylgja þeim væntanlega upp en þeir þurfa 3 vinninga í þeim 6 skákum sem efstir eru.

Skákstjórar hafa verið gagnrýndir fyrir að fresta þessum skákum en samkvæmt reglunum er skýrt tekið fram að það megi fresta vegna samgönguerfiðleika þannig að erfitt er að gagnrýna ákvörðun þeirra.  Væntanlega hefði ég tekið sömu ákvörðun í þeirra sporum.  

Yfir þetta mál þarf að fara betur í framtíðinni og undirbúa betur ráðstafanir við slíkum óhöppum.  Væri t.d. mögulegt að tefla skákirnar í gegnum vefinn á sama tíma og aðrar skákir eru tefldar?

Staðan er að mörgu leyti óþægileg.  Það er ekki sanngjarnt gagnvart d-liði Hellis að Bolvíkingar viti hversu marga vinninga þeir þurfi í þessum frestuðum skákum og forskot Bolvíkinga því í alla staði mjög óeðlilegt.

Það hefur svo komið upp úr dúrnum að Sauðkræklingar eru alls ekki sáttir.  Skiljanlegt mjög að þeir vilji ekki koma til Reykjavíkur að tefla tvær skákir sem skipta þá engu máli.  Hins vegar hlýtur að vera vilji til að leysa málin á annan hátt hvort sem teflt er í gegnum netið eða einhvers staðar nær Sauðárkróki en í Reykjavík.  Einnig virðist mér sem Fjölnismenn væru sáttir við jafntefli í þessum skákum og jafnvel yrði samið jafntefli á ótefldar skákir sem gengur bersýnilega gegn lögum FIDE.Fjölnismenn hvet ég til að tefla þessar skákir og horfa víðar á heildardæmið.  Væru þeir í sporum keppinauta væru þeir án efa ekki sáttir við slík jafntefli.  

Að lokum 

Ritstjóri hefur ákveðið hér eftir í fréttaskrifum sínum á Skák.is að taka tillit til þeirra gagnrýni sem hann hefur fengið um notkun á viðurnefni á  sigurvegurum Íslandsmóts skákfélaga. Hefur hann oft á tíðum kallað þá  "Íslandsmeistara" sem hefur verið gagnrýnt harðlega. Til að lægja öldurnar verður þetta viðurefni ekki notað, en hugsanlega tekið upp aftur þegar  næsta Íslandsmóti skákfélaga er lokið.

Að lokum þakka ég fyrir skemmtilega og fjörlega keppn.  Rétt er að benda á skemmtilegan pistil frá mótinu á Chessbase eftir Fjölnismanninn Dejan Bojkov.  

Gunnar Björnsson

Höfundur er ritstjóri Skák.is og formaður Taflfélagsins Hellis.

 

TR í sterkri stöðu fyrir síðari hlutann

Síðari hluti Íslandsmóts skákfélaga fer fram um helgina á heimavelli Fjölnis í Rimaskóla.  TR er í mjög vænlegri stöðu hefur 3,5 vinnings forskot á Íslandsmeistara Hellis og Hauka sem eru í 2.-3. sæti.  Sveitir  TR og Hellis mætast í lokaumferðinni og það er líklegt að TR verður með forystu fyrir þá umferð. Það eykur svo enn sigurlíkur TR-inga að þeir hafa án efa sterkasta og stigahæsta liðið, með t.d. tvo næsta titilhafa landsins innan sinna raða, og því ólíklegt að liðið liggi fyrir Helli. 

Haukmenn eru jafnir Helli að vinningum en eiga eftir að tefla við bæði TR og Fjölni.  Fjölnir er í fjórða sæti og eiga heldur auðveldari dagskrá en hin toppliðin og gætu því náð þriðja eða jafnvel öðru sæti verði úrslit hagstæð.     

Staðan (í sviga er spáin eins og ritstjóri birti hana sl. haust)

• 1.      (1) TR 25 v.
• 2.      (2) Hellir-a 21½ v. (8 stig)
• 3.      (4) Haukar 21½ v. (6 stig)
• 4.      (3) Fjölnir 20 v.
• 5.      (6) Hellir-b 12½ v.
• 6.      (7) SA-b 11½ v.
• 7.      (5) SA-a 10 v.
• 8.      (8) TV 6 v.

Dagskrá toppliðanna fjögurra:

Umferð	TR	Hellir	Haukar	Fjölnir
5. umferð	Haukar	SA-b	TR	Hellir-b
6. umferð	SA-b	TV	Fjölnir	Haukar
7. umferð	Hellir-a	TR	SA	SA-b

 

Sveitir Hauka og Fjölnis mun væntanlega stilla upp fjórum erlendum skákmönnum en TR og Hellir styðjast sem fyrr við styrkt heimavarnalið.  Með TR tefla Nataf og Galego.  Samkvæmt heimildum ónefnds TR-ings verður Simon Williams, sem lengi hefur staðið til að tefldi með Helli, upptekinn um helgina í brúðkaupi vinar síns.

Ég tel að mestu að fallbaráttan sé ráðin.  SA-b og TV falli.  Fyrrnefnda liðið á eftir að mæta TR, Hellir og Fjölni og mun a-sveit félagsins væntanlega skríða upp fyrir!

SA-a og Hellir-b mun sigla lygnan sjó og enda í 5. og 6. sæti.  

Spáin og hún var birt fyrir fyrri hlutann er því óbreytt.

• 1.      TR
• 2.      Hellir
• 3.      Fjölnir
• 4.      Haukar
• 5.      SA-a
• 6.      Hellir-b
• 7.      SA-b
• 8.      TV

2. deild:

Staðan:

1. (1) Bolungarvík 20 v.
2. (7) Haukar-b 13 v. (4 stig)
3. (4) Reykjanesbær 13 v. (4 stig)
4. (2) TR-b 13 v. (3 stig)
5. (8) Selfoss 12½ v.
6. (3) TG 11 v.
7. (5) Akranes 10½ v.
8. (6) Kátu biskuparnir 3 v.

Eins og svo oft áður er mikil spenna er í 2. deild.  Bolvíkingar eru öryggir um sigur og Kátu biskuparnir öryggir niður.  Annað er algjörlega óráðið og ljóst að sex lið geta fylgt Bolvíkingum upp og sömu lið geta fylgt biskupunum, sem án efa hafa oft verið kátari, niður.   Ég hef trú að það verði TR-ingar sem fylgi Bolvíkingunum upp.  Haukamenn gætu líka verið til alls líklegir og jafnvel Reyknesingar.  Ég spái að Skagamenn eða Selfyssingar fylgi þeim Kátu niður en þar sem yfirmaður minn er lykilmaður í liði Selfyssinga set ég Skagamenn í fallsætið!

Spá ritstjóra:

• 1.      Bolvíkingar
• 2.      TR-b
• 3.      Haukar-b
• 4.      Reykjanesbær
• 5.      TG
• 6.      Selfoss
• 7.      Akranes
• 8.      Kátu biskuparnir

3. deild:

Staðan: 

1. (1) KR 17½ v.
2. (3) Hellir-c 16 v.
3. (2) TR-c 16 v.
4. (5) TG-b 12 v.
5. (4) Dalvík 12 v.
6. (6) TR-d 8 v.
7. (8) TV-b 7 v.
8. (7) Reykjanesbær-b 6½ v.

Í 3. deild berjast þrjú lið um tvö sæti.  KR-ingar og Hellismenn hafa mæst en TR-ingar eiga eftir að tefla við báðar sveitirnar  Líklegt er að TR-ingar mæti hins vegar með töluvert sterkara lið nú en í fyrri hlutanum.  Erfitt er í spilin að spá en ég ætla að giska á óbreytta stöðu á toppnum, þ.e. að KR og Hellir fari upp.  B-liðum Eyjamanna og Reyknesinga spái ég falli.

Spá ritstjóra:

• 1.      KR
• 2.      Hellir-c
• 3.      TR-c
• 4.      TG-b
• 5.      Dalvík
• 6.      TR-d
• 7.      Reykjanesbær
• 8.      TV-b

4. deild

Staða efstu liða:

• 1. (1) Bolungarvík-b 17½ v.
• 2. (2) Fjölnir-b 16½ v.
• 3. (6) Víkingasveitin 16 v.
• 4. SA-c 15½ v.
• 5.-8. Haukar-c, KR-b, Snæfellsbær og Austurland 15 v.

Bolvíkingar fara væntanlega upp og ætla ég að spá að Fjölnir fylgi þeim upp. Víkingarnir vösku, Gunnar Freyr og fleiri gætu þá hæglega sett strik í reikninginn en ég hef minni trú á öðrum liðum.  

Úrslitin í fjórðu deild geta þó verið býsna tilviljunarkennd, t.d. stórsigur í lokaumferðinni gæti tryggt óvænt sæti í 3. deildinni að ári þegar deildin er svo jöfn.  

Að lokum

Rétt er að árétta enn og aftur að þessi spár og pistill er fyrst og fremst settur fram til gamans!  Ekki er pistilinn byggður á ítarlegum geimvísindum!

Rétt er svo að minna á nokkra praktíska hluti. 

• Tímamörkin er 1½ klst. á skákina auk 30 sekúnda á leik. Enginn viðbótartími bætist við eftir fjörtíu leiki.
• Slökkva þarf á GSM-síma. Hringi hann þýðir það umsvifalaust tap.  Stefán Frey vil ég svo sérstaklega minna á að slökkva einnig á vekjaranum í símanum. 
  
• Teflt er í Rimaskóla í Grafarvogi

Síðari hluti Íslandsmóts skákfélaga er einn skemmtilegasti skákviðburður hvers árs. Gera má ráð fyrir spennu í öllum deildum bæði á toppi sem botni og líklegt að úrslit ráðist ekki fyrr en á lokamínútum.  Lokahóf og verðlaunaafhending fer svo fram í Feninu og hefst kl. 22.  

Reynt verður að uppfæra Skák.is eins fljótt og auðið er eftir hverja umferð.  Einnig skilst mér að helsti Chess-Results-sérfræðingur landsins, Páll Sigurðsson, ætli að freista þess að skrá inn úrslitin að einhverju leyti jafnóðum.  Að öðrum kosti mun ég not ég nota mitt hefðbundna trausta excel-skjal!

Spennan er mikil.  Margar spurningar vakna.  Mun ritstjórinn nota orðlagið „Íslandsmeistarar" í sama mæli að keppni lokinni?  Mun Fischer snúa sér við í gröfinni frægu?  Munu óvæntir erlendir skákmenn láta sjá sig í Rimaskóla?  Verður Skákhornið ritskoðað eða óritskoðað, aðfaranótt sunnudagsins?    Hverjir fagna?  Hverjir blóta?   Verður klakkað?

Allt þetta og meira til kemur í ljós um helgina!  Megi besta liðið vinna!

• Heimasíða mótsins
• Chess-Results
• Excel-skjal GB

Gunnar Björnsson

Höfunudur er ritstjóri Skák.is og jafnframt formaður Taflfélagsins Hellis 

Skákárið 2007 gert upp

Skákárið 2007 var bara ágætis skákár.  Að nokkru leyti skákár Héðins Steingrímssonar sem kom sá og sigraði og varð okkar fyrsti „innfæddi" stórmeistari í um 10 ár.  Góður árangur náðist á EM landsliða þar sem íslenska landsliðið náði sínum besta árangri í býsna langan tíma.  Nokkuð var um alþjóðlegt skákmótahald hérlendis.  Kaupþing gerði býsna merkilegan samning við Hjörvar Stein Grétarsson og Taflfélagið Helli sem er ætlað að efla og styrkja þennan efnilegasta skákmann landsins.  Salaskóli varð heimsmeistari barnaskólasveita.  

Nokkrir áfangar komu í hús.  Héðinn Steingrímsson tók þrjá áfanga í jafn mörgum mótum og var þar með stórmeistari.  Jón Viktor Gunnarsson náði sínum fyrsta stórmeistaraáfanga á Reykjavík International, sem var jafnframt minningarmót um Þráin Guðmundsson sem lést á árinu. Dagur Arngrímsson tók tvo áfanga að alþjóðlegum meistaratitli og er nú kominn með áfanganna sem hann þarf en vantar bara stigin til að verða tilnefndur.   Ingvar Þór Jóhannesson, náði áfanga á Kaupþingsmóti Hellis og TR, og Davíð Kjartansson tók áfanga í Ungverjalandi.  

Hellismenn urðu Íslandsmeistarar skákfélaga eftir baráttu við TV.   Aðeins ein skák tapaðist hjá Helli af 64.   

Hannes Hlífar varð Íslandsmeistari eins og venjulega þótt það hafi verið tæpara nú en oft áður.  Athygli vakti að Íslandsmeistarinn tapaði tveimur skákum sem er býsna sjaldgæft.  Guðlaug Þorsteinsdóttir varð Íslandsmeistari kvenna eftir harða baráttu við Hallgerði Helgu Þorsteinsdóttur.  Lenka Ptácníková varð Norðurlandameistari í skák í annað sinn.

Skákpólítíkin var róleg og friðir ríkir í skáklandinu Íslandi.   Annað en í Rei-kjavík sem á að verða skákhöfuðborg heimsins og við bíðum spenntir eftir næsta leik í því tafli.  

Eins og venjulega hefur ritstjóri valið hina og þessa viðburði ársins og eru þeir í léttum dúr

Óvæntasta frétt ársins

Sigur ofurbloggarans og skákþjálfarans Snorra G. Bergssonar, sem m.a. hefur komið að þjálfun Hjörvars, á Hannesi Hlífari Stefánssyni á Íslandsmótinu í skák komst m.a. á útsíður Moggans.   Snorri virðist hafa tak á Íslandsmeistaranum því hann lagði hann einnig að velli í einvígi á Íslandsmótinu í atskák.   Þar var einnig óvænt frétt því bræðurnir Bragi og Björn Þorfinnssynir eiga að mætast í úrslitum.  Nú er reyndar komið árið 2008 og ekkert bólar á einvíginu um Íslandsmeistaratitilinn á árinu 2007.  

Skák ársins 

Áðurnefndur sigur Snorra á Hannesi í mjög vel tefldri skák.  Frægasta skák ársins er án efa þó sigur Hildar Berglindar á forsætisráðherranum og ummæli hennar eftir skákina eru fleyg.  „Hann féll í gildruna mína"!

Deila ársins

Árið 2006 var deilt um notkun á bandstriki.  Nú var deilt um það hvort mætti kalla Íslandsmeistara Hellis, Íslandsmeistara Hellis.   Einnig var deilt um hvort það ætti að vera tengill á Skákhornið af Skák.is.  Formaður TV deildi svo við nokkra „aðkeypta" félagsmenn sem hættu í félaginu eftir það var ákveðið að taka ekki þátt í Íslandsmóti skákfélaga.  Sú ákvörðun var svo reyndar síðar tekinn til baka.  

Klúður ársins

Sú ákvörðun stjórnar SÍ að hafa ekki tengil af Skák.is á Skákhornið.

Lið ársins:
 

Þrjú lið stóðu sig áberandi vel á árinu.  Góður árangur Íslands á EM sem var betri en björtustu menn spáðu fyrir.  Meira að segja Torfi Stefánsson, sagði árangurinn hafa verið framar sínum vonum á Skákhorninu. 

Árangur Hellis á Íslandsmótinu skákfélaga en sveitin fékk 47 vinninga af 56 mögulegum og aðeins ein skák tapaðist.  Enginn úr Helli var samt í EM-liðinu en eitt áttu liðin sameiginlegt.  Treysti lesendum til að finna út úr því.   Svo varð sveit Salaskóli heimsmeistari barnaskólasveita og Valsmenn urðu Íslandsmeistarar í fótbolta við mikinn fögnuð formanna TR og Hellis!

Félagaskipti ársins

Nokkuð var um djúsí félagaskipti á árinu.   Jóhann Hjartarson gekk í Helli úr SA, Hannes Hlífar úr ÍslandsmeisturunumHelli í TR, Héðinn úr TR í Fjölni og Henrik úr TV í Hauka.   Síðan gekk Lárus Knútsson að venju í nýtt félag á árinu, að þessu sinni í Hauka. 

Efnilegasti skákmaður ársins

Hjörvar Steinn Grétarsson.  Enginn spurning.  Gott skákár þótt ekki hafi gengið vel á HM ungmenna.  

Skákkona ársins

Skákkonur ársins eru tvær.  Lenka Ptácníková sem varð Norðurlandameistari í skák í annað sinn og Hallgerður Helga Þorsteinsdóttir sem er á mikilli siglingu og var mjög nærri því að verða Íslandsmeistari kvenna.  

Skákmaður ársins

Björn Þorfinnsson stóð sig frábærlega á síðari hluta ársins, komst í úrslit Íslandsmótsins í atskák, vann Skákþing Hafnarfjarðar ásamt Henriki, skákmeistari Hellis, og vann Haustmót TR með fáheyrðum yfirburðum.  Enginn skákmaður, hvorki Björn né annar, kemur þó með tærnar sem Héðinn er með hælana.  Frábær frammistaða á EM og þrír stórmeistaraáfangar á þremur mótum í röð, er einstakt afrek og Héðinn klykkti svo út með góðum sigri á Friðriksmóti Landsbankans.  

Viðburður ársins

Fjögur alþjóðleg mót var haldin á árinu.  Kaupþingsmót Hellis og TR, Reykjavík International,Fiskmarkaðsmót Hellis og Boðsmót TR.   Allt skemmtileg mót og vonandi halda félögin áfram á þeirri braut að halda alþjóðleg mót.  Viðburður ársins að mati ritstjóra er hins vegar sú ákvörðun Kaupþings að verða styrktaraðili Hjörvars Steins.  Frábært framtak.  

Taflfélag ársins

Hellir.........auðvitað.  Félagið stóð  fyrir tveimur alþjóðlegum mótum og vann Íslandsmeistaratitilinn og svo Íslandsmót unglingasveita með fáheyrðum yfirburðum (35 v. af 36 mögulegum). 

Félagsmálamaður ársins

Öflugt starf var unnið í mörgum félögum í fyrra.   Björn Þorfinnsson var nafnbótina hjá mér að þessu sinni en hann var aðalsprautan í þremur alþjóðlegum skákmótum sem fram fóru árið 2007.

Skáksíða ársins

Bæði TR og SA settu upp nýjar og flottar heimasíður.   Heimsíða Fiskmarkaðsmóts Hellis var nýstárleg og höfðu skákáhugamenn gaman að því að fá ferskar fréttir af skákstað.  Skák.is hagar sér eins og versta mella og flutti sig enn um set og er ný vistuð á Bloggsvæði mbl.is.   Skákhornið var öflugt og er valin skáksíða ársins aðallega þó fyrir það að vera í „felum".

Endurkoma ársins 

Hrafn Loftsson kom aftur eftir langt hlé og varð skákmeistari TR!  Friðrik Ólafsson átti einnigskemmtilega endurkomu á alþjóðlegu móti í Arnhem í Hollandi. 

Stafsetningarvilla ársins

Ritstjórinn var sem fyrr iðinn við stafsetningarvillur eins og fyrri daginn.   Villa ársins hlýtur að vera Húns-æði í staðinn fyrir hús-næði en þá fór Húnninn (Björn Þorfinnsson) mikinn á Skákþingi Hafnarfjarðar.

Bakari ársins:

Áðurnefndur Björn Þorfinnsson fyrir vöfflubakstur á Fiskmarkaðsmótinu!

Ummæli ársins:

Karl Gauti formaður TV í Eyjafréttum þegar nokkrir félagsmenn höfðu hætt í félaginu:  "Enginn upplausn þótt að nokkrir karlar fari í fýlu." 

Hvatningarverðlaun ársins

Helgi Ólafsson fær hvatningarverðlaun ársins fyrir eftirfarandi texta í Morgunblaðinu 23. júní 2007:

Þó helmingur keppenda sé af erlendu bergi brotinn, þar af tveir frá landi faróanna, þurfti Björn ekki að leita langt yfir skammt, því sumir keppendur eru starfsmenn KB banka, þ.ám. þeir sem reka nú lestina eftir fyrstu tvær umferðirnar. Miðað við taflmennskuna ættu þeir að snúa sér alfarið að bankastörfum. Mikið kostnaðaraðhald er greinilega haft að leiðarljósi við framkvæmd þessa móts.

Mafía ársins

Þarf að spyrja? 

 

Að lokum

Læt þetta duga að sinni en vil ítreka að sjálfsögðu er þetta fyrst og fremst til gamans gert og enginn má taka of alvarlega enda skrifað í sjálfhverfum stíl og með fjölda stafsetningarvilla.  Snorra G. Bergssyni þakka ég yfirlesturinn og nokkrar mjög góðar ábendingar og eru allar villurnar á hans ábyrgð.  

Hafi ég gleymt einhverju(m) voni ég að menn fyrirgefi mér!

Gunnar Björnsson 

TR með forystu eftir fyrri hlutann - fjögur lið eiga möguleika á sigri!

Það fór eins og flestir spáðu að TR myndi hafa forystu eftir fyrri hluta Íslandsmóts skákfélaga.   TR-ingar hafa 3½ vinnings forskot á Íslandsmeistarana í Helli og Haukamenn.  Fjölnismenn koma svo  skammt undan eða 1½ vinningi þar á eftir.  TR á hins vegar erfitt prógramm eftir en þeir eiga bæði eftir Helli, sem þeir mæta í lokaumferðinni, og Hauka.  Það er því allt galopið fyrir lokaátökin sem fram fara 28. febrúar og 1. mars og ljóst að fjögur lið eiga raunhæfa möguleika á sigri þótt staða TR sé auðvitað vænlegust.   Bolvíkingar eru nánast öruggir með sigur í 2. deild en allt er galopið í 3. og 4. deild.

1.  deild

Staðan (spá ritstjóra í sviga)

1. (1) TR 25 v.
2. (2) Hellir-a 21½ v. (8 stig)
3. (4) Haukar 21½ v. (6 stig)
4. (3) Fjölnir 20 v.
5. (6) Hellir-b 12½ v.
6. (7) SA-b 11½ v.
7. (5) SA-a 10 v.
8. (8) TV 6 v
   

Á ýmsu hefur gengið í fyrstu deild.  Til að byrja með var hátt flug á Haukum sem voru í forystu eftir fyrstu tvær umferðirnar en máttu sætta sig við naumt tap fyrir Helli í 3. umferð og þá notuðu TR-ingar tækifærið og náðu fyrsta sæti sem þeir halda enn.

TR-ingar geta ágætlega vel við unað.  Nokkur óstöðugleiki einkenndi þó TR-sveitina, sem þó stillti upp 3-5 stórmeisturum í hverri umferð. Í einni umferðinni var hálft b-liðið farið að tefla með a-liðinu og nánast allt c-liðið úr fyrri umferðum komið í b-liðið.  Það setti skemmtilegan svip á keppnina að Friðrik Ólafsson skildi sjá sér fært að mæta til leiks!  Í fjórðu umferð urðu forföll á síðustu stundu hjá a-liðinu og mátti sá sem þetta ritar taka í hendur á tveimur skákmönnum en sá sem upphaflega átti að tefla við mig færðist við þetta upp um borð og slapp þar með við að lenda í Sláturhúsi GB.  

Íslandsmeistararnir eru í öðru sæti með 21½ vinning.   Fyrsta borðs maður Hellis, Jóhann Hjartarson, forfallaðist með skömmum fyrirvara.  Tékkinn Radek Kalod tók þá vaktina á fyrsta borði en hann var eini stórmeistari Hellis nú.  Karl Þorsteins tefldi með Helli og er það í fyrsta skipti í ein fjögur ár sem hann teflir opinberlega.   Sigurmöguleikar Hellis felast í því að minnka muninn gagnvart TR og ná góðum úrslitum gegn þeim í lokaumferðinni.   Styrkleik Hellis var sem endranær góð liðsheild og hversu menn eru tilbúnir að leggja sig ávallt 100% fram fyrir klúbbinn.  Radek smellpassar svo í hópinn og hvetur menn óspart áfram.

Haukamenn hafa ekki sagt sitt síðasta orð og komi þeir með sterkt lið í seinni hlutanum gætu þeir hæglega hafnað í einum af þremur efstu sætunum.  Mikil og sterk liðsheild einkennir liðið og þar leggja sig allir 100% fram.  Á fyrsti borði teflir Litháinn Kveynis með sitt stóra bros en hann var eini stórmeistari Hauka. 

Fjölnismenn tóku þátt í fyrsta skipti fyrstu deild Íslandsmóts skákfélaga.  Rétt eins og Haukar stilltu þeir upp þremur erlendum leikmönnum í fyrstu umferð en í þeirri annarri var sá fjórði mættur, stórmeistarinn (Likavesky). Ástæðan var sú að hann missti af flugi deginum áður og var því of seinn í fyrstu umferð þegar félagið mætti TR.  Með Fjölni tefldu því 4 stórmeistarar.  Á fyrsta borði tefldi hinn geðþekki Tékki Oral og vann hann m.a. Hannes Hlífar í fyrstu borði en það er fátítt að Hannes tapi skákum í keppninni. Á öðru borði tefldi okkar nýjasti stórmeistari Héðinn Steingrímsson.   Fjölnismenn eru búnir bæði með TR og Helli og geta með góðum úrslitum blandað sér í baráttuna um Íslandsmeistaratitilinn.  

B-sveit Hellis er í fimmta sæti.  Þar stóð uppúr góð frammistaða Gunnars Björnssonar sem vann allar sínar skákir fjórar að tölu og er samkvæmt lauslegum rannsóknum ritstjóra sá eini í fyrstu deild sem afrekaði það.   Oft hefur verið ýjað að því að b-sveitarmenn beiti sér ekki gegn eigin a-sveit en ljóst er það á ekki við Hellismenn því formaður félagsins, sem tefldi með b-sveitinni, og er einnig liðsstjóri liðsins, vann sína skák!   Hann reyndar bætti það upp með því sigra einnig andstæðinga sína hjá TR og Haukum.

B-sveit SA er í sjötta sæti og er athyglivert að þeir eru fyrir ofan a-sveitina.  Rétt eins og venjulega markaði b-sveitin verulega á a-sveitina en þar urðu úrslitin 5-3 a-sveitinni í vil.   Margt  bendir þó til þess að sveitin falli því andstæðingarnir í seinni hlutanum verða m.a. TR og Hellir a-sveit. 

A-sveit SA er í sjöunda sæti.  Sveitin mun færast ofar enda fékk hún geysierfitt prógramm í fyrri hlutanum.  Mikil forföll voru hjá Akureyringum að þessu sinni.  Ýmist voru menn uppteknir erlendis, innanlands eða vildu jafnvel ekki tefla í mótmælaskyni! 

Eyjamenn eru í áttunda og síðasta sæti.  Lið þeirra var veikt eins og vitað var fyrirfram.  Helgi Ólafsson tefldi þrjár skákir, allar skákirnar nema gegn TR þar sem hann átti að hafa svart gegn Hannesi Hlífari.  Í þeirri viðureign vantaði einnig annað borðs manninn, Pál Agnar.  Stefán Þór Sigurjónsson tefldi þá á fyrsta borði en ég held að ég fari rétt með að hann hafi ekki komist í a-liðið í fyrra.   Það breytti því ekki að Eyjamenn náðum hálfum vinningi á TR en Sigurjón Þorkelsson gerði stutt jafntefli við Galego.   Skyldi þessi hálfi vinningur skipta svo máli í lokin?

Nokkur skemmtileg atvik áttu sér stað eins og venjulega.  Í viðureign SA og Hellis lék norðanmaður  ólöglegum leik.  Hellisbúinn drap kónginn, sem má ekki, og stað þess að kalla á skákstjóra raðaði sá norðlenski upp mönnunum og gaf þar með skákina.  Rétt hefði hins vegar að halda skákinni áfram og láta Hellisbúann fá aukatíma!  Menn gleyma sér stundum í hita leiksins.  

2. deild

Staðan:

1. (1) Bolungarvík 20 v.
2. (7) Haukar-b 13 v. (4 stig)
3. (4) Reykjanesbær 13 v. (4 stig)
4. (2) TR-b 13 v. (3 stig)
5. (8)  Selfoss 12½ v.
6. (3) TG 11 v.
7. (5) Akranes 10½ v.
8. (6) Kátu biskuparnir 3 v.

Það heyrir til undantekninga ef ritstjóri spáir að einhverju viti fyrir 2. deild og margt bendir til að svo sé einnig nú.   Bolvíkingar eru langefstur og Kátu biskuparnir, sem varla eru kátir með stöðuna núna, eru langneðstir.  Öll hin liðin er einum hnapp og aðeins munar 2½ vinning á milli 2. og 7. sæti.  Ég hef reyndar trú á því að TR-ingar fylgi Bolvíkingum upp enda styrkist b-lið þeirra til muna í síðari hlutanum.  

Lið Kátra er einfaldlega ekki nógu sterkt fyrir 2. deild en þeir fengu engan liðsauka nú að utan eins og þeir gerðu í fyrra sem hefði verið lífspursmál fyrir þá hefðu þeir vilja haldi sínu sæti í deild þeirra næstbestu.  Ómögulegt er að segja hverjir munu fylgja þeim niður. 

3. deild.

1. (1) KR 17½ v.
2. (3) Hellir-c 16 v.
3. (2) TR-c 16 v.
4. (5) TG-b 12 v.
5. (4) Dalvík 12 v.
6. (6) TR-d 8 v.
7. (8) TV-b 7 v.
8. (7) Reykjanesbær-b 6½ v.

Ritstjóri virðist hafa verið óvenju glöggur í spánni fyrir þriðju deild.  Þar eru KR-ingar efstir en eru engan vegin öruggir um að vinna sér sæti í 2. deild að ári því líklegt er að bæði sveitir Hellis og TR muni koma sterkari til leiks að ári.  TR-ingar eiga bæði eftir að tefla við KR og Helli og staða Hellis því nokkuð vænleg.   Botnbaráttan er ekki síður spennandi.   Líklegt er að úrslitin ráðist ekki fyrr en á lokasekúndunum.

4. deild

Staðan:

1. (1) Bolungarvík-b 17½ v.
2. (2) Fjölnir-b 16½ v.
3. (6) Víkingasveitin 16 v.
4. SA-c 15½ v.
5.-8. Haukar-c, KR-b, Snæfellsbær og Austurland 15 v.
9. Hellir-f 14½ v.
10. Selfoss-b 14 v.
11.-15. Reykjanesbær-c, Haukar-d, TV-c, UMFL og TG-c 13 v.
16.-17. Sauðárkrókur og Hellir-d 12½ v.
18.-19. Goðinn og Hellir-g 12 v.
20. TR-e 11 v.
21. UMSB 9½ v.
22, SA-d 8½ v.
23.-24. Haukar-e og Hellir-e 7 v.
25.-26. Fjölnir-c og Skákdeild Ballar 6 v.
27. TR-f 5 v.

Í fjórðu deild getur einnig allt gerst.  Líklegast er þó að Bolvíkingar, Fjölnismenn og jafnvel Víkingasveitin berjist um sætin tvö.  Gaman er að sjá klúbba eins og Snæfellinga og Austlendinga blanda sér í baráttuna.  Hrafn Jökulsson tefldi fyrir Snæfellinga og var óvenjulegt að sjá þann mikla skákfrömuð láta sér duga að tefla „bara".    Hann stóð sig víst vel og vann m.a. Erling Þorsteinsson.

Að lokum

Eins og venjulega fór keppnin vel fram.  Aðstæður í Rimaskóla eru til mikillar fyrirmyndar og enn skemmtilegra þegar allir tefla í einum sal.    Haraldur Baldursson var röggsamur yfirdómari sem sá til þess að allt gengi vel fyrir sig.   Eina sem mér finnst vanta er að fá ekki einstaklingsúrslit en við það er erfitt að eiga því allir sem vettlingi geta valdið tefla í keppninni, og þeir sem ekki tefla eru gerðir að skákstjórum! 

Ef til vill ætti SÍ að íhuga að borga fyrir það og fá einhvern utanaðkomandi til að slá þessu jafnóðum inn.  Reyndar mikil vinna fyrir viðkomandi.  Einnig verður SÍ að beita sér fyrir að skákir mótsins verði slegnar inn.

Jæja, þá er skemmtilegum fyrri hluta lokið og ljóst að menn geta farið að hlakka til fyrir þann seinni sem fram fer 28. febrúar og 1. mars og vonandi einnig í Rimaskóla.

Megi besta liðið vinna!

Gunnar Björnsson

Höfundur er ritstjóri Skák.is og formaður Taflfélagsins Hellis

Fyrri hluti Íslandsmóts skákfélaga

Fyrri hluti Íslandsmóts skákfélaga fer fram næstu helgi í Rimaskóla.  Venju samkvæmt ætlar ritstjóri Skák.is að spái í spilin.  Í fyrstu deild virðast TR-ingar hafa sterkasta liðið en þeir fengið til liðs við sig tvo sterka skákmenn úr Taflfélagi Vestmannaeyja þá Nataf og Galego auk þess sem sjálfur Íslandsmeistarinn Hannes Hlífar Stefánsson er genginn til liðs við klúbbinn.  

Aldrei má vanmeta Íslandsmeistarana, fyrirgefið orðalagið sem sýndu það í fyrra að þeir eru sýnd veiði en ekki gefin þegar þú unnu óvæntan sigur á Íslandsmótinu.   Svo gæti þriðja Reykjavíkurliðið, Fjölnismenn einnig blandað sér í baráttuna en þeir mæta væntanlega með fjóra stórmeistara til leiks og þar á meðal með okkar nýjasta stórmeistara Héðinn Steingrímsson væntanlega á fyrsta borði.  

Sagan gæti verið með Helli.  Rétt eins og í fyrra töpuðu þeir örugglega fyrir TR í Hraðskákkeppni taflfélaga og voru langt fyrir neðan sama félag í EM taflfélaga.  En þegar kom að Íslandsmóti skákfélaga sýndu Hellisbúar hver sé pabbinn og unnu góðan sigur.  Mun sagan endurtaka sig?

Stigahæsti skákmaður landsins, Jóhann Hjartarson er genginn til liðs við Íslandsmeistarana og er ætlað að fylla skarð Hannesar.

Önnur félög eru ekki líkleg til að blanda sér í toppbaráttuna.  Haukamenn eru líklegastir til að hreppa fjórða sætið en Akureyringar gætu þó blandað sér í þá baráttu.

Í fallbaráttunni berjast væntanlega b-sveitir Hellis og SA og svo silfurlið Eyjamanna sem hafa misst flesta sína best menn nema þá Helga Ólafsson og Sævar Bjarnason.  

Ég spái TR-ingum öruggum sigri.  Lið þeirra er einfaldlega mun sterkara en önnur lið.  Hellismenn og Fjölnismenn berjast svo væntanlega um annað sætið. 

Spá ritstjóra:

• 1. TR
• 2. Hellir-a
• 3. Fjölnir
• 4. Haukar
• 5. SA
• 6. Hellir-b
• 7. TV
• 8. SA-b

2. deild

Í 2. deild hljóta Bolvíkingar að teljast líklegastir til afreka.  Einnig sýnist mér TR-b ætti að fylgja þeim nokkuð örugglega upp.  Helst gætu Garðbæingar og Reyknesingar blandað sér í þá baráttu.  Erfitt er spá um fallbaráttuna en ég spái Selfyssingum og b-sveit Hauka falli.  Samt ég vil setja mikla fyrirvara við við það enda mjög erfitt ávallt að spá í spilin í 2. deild þar sem liðin þar eru afar jöfn.  

Spá ritstjóra

• 1.       Bolungarvík
• 2.       TR-b
• 3.       TG
• 4.       SR
• 5.       TA
• 6.       Kátu biskuparnir
• 7.       Haukar-b
• 8.       Selfoss

3. deild.

Ég spái því KR-ingar endurheimti sæti sitt í 2. deild.  Þeir hafa styrkt sig og voru í raun og veru með of sterkt lið í fyrra til að falla.  Ómögulegt er að spá hverjir fylgi þeim upp.  Í þá baráttu gætu c-sveitir TR og Hellis blandað sér og jafnvel Dalvíkingar.  Styrkleiki c-sveitanna fer þó mikið eftir því hvernig þeim gengur að manna sveitirnar í 1. og 2. deild.  Ég ætla að spá c-sveit TR öðru sætinu.  Ég spái TV-b og SR-b falli en rétt eins og í 2. deild er erfitt að spá í spilin.  Einnig gætu TG-b og Dalvíkingar blandað sér í fallbaráttuna.     

Spá ritstjóra

• 1.       KR
• 2.       TR-c
• 3.       Hellir-c
• 4.       Dalvík
• 5.       TG-b
• 6.       TR-d
• 7.       SR-b
• 8.       TV-b

4. deild.

Í fjórðu deild er 31 lið skráð til leiks sem er er met.  Við eitt félagið kannast ég ekki, þ.e. Skákdeild Ballar.   Víkingasveitin er annað nýtt  félag en þar eru ferðinni ýmsir sterkir skákmenn og gæti sú sveit blandað sér í toppbaráttuna.

Mér finnst líklegast að B-sveit Bolungarvíkur hafi sigur í deildinni en við styrkingu a-sveitarinnar er ljóst að margir sterkir skákmenn munu tefla með b-sveitinni.   Ég spái að annað sætið falli b-sveit Fjölnis í skaut.  Aðrar sveitir sem kunna að blanda sér í baráttuna gætu verið b-sveit KR, d-sveit Hellis , Austlendingar, Víkingasveitin og örugglega fleiri sveitr.   

Spá ritstjóra:

• 1.       Bolungarvík-b
• 2.       Fjölnir-b
• 3.       KR-b
• 4.       Hellir-d
• 5.       Austurland
• 6.   Víkingasveitin
  

6.

Að lokum

Eins og venjulega vil ég benda mönnum á að taka þessa spá með öllum mögulegum fyrirvörum.  Hún er sett fram til gamans og það má öllum vera ljóst að ritstjórinn veit ekki allt um liðsskipan allra liða!

Ég hlakka til helginnar og óska skákmönnum gleðilegrar hátíðar!

Gunnar Björnsson

Höfundur er Ritstjóri Skák.is og formaður Taflfélagsins Hellis

Mogginn fyrstur með fréttirnar...................not!

Þessi frétt birtist á Skák.is þann 5. júlí sl. eða fyrir rúmum þremur vikum.  Það var í raun og veru Sævar Bjarnason sem benti á þetta manna fyrstur eða þann 4. júlí á Skákhorninu. 

Kannski þeir Moggamenn ættu að fylgjast betur með Skák.is?

Friðrik teflir í Hollandi

Þegar ég lenti á Litla Hrauni

Í dag fór á Litla Hraun ásamt Birni Þorfinnssyni, Arnari Valgeirssyni, Emblu Sól, matarstjóra Grænlandsmótsins, Guðfríði Lilju, Hrafni Jökuls og sjálfum viðskiptaráðherranum Björgvin G. Sigurðarsyni og tók þar þátt í skákmóti.   Hrókurinn hefur unnið geysigott starf á Hrauninu og hefur mætt þar annan hvern föstudag frá árinu 2004 og slegið upp skákmóti.  Skákfélagið á Hrauninu heitir því skemmtilega nafni, Frelsinginn.

Smá beygur var í manni þegar maður gekk inn um hliðið en það var ekki lengi því vel lá á keppendum sem skemmtu sér hið besta og léttur og skemmtilegur andi sveif þarna yfir.  Til að koma í veg fyrir að gestirnir hefðum áhrif á úrslitin gilti sú regla að við gestirnir töpuðum alltaf fyrir heimamönnum, burtséð frá úrslitum skákanna.  Ég fékk því 2 vinninga í 5 skákum ásamt Birni Þorfinnssyni og Arnari Valgeirssyni hinum Vinalega!  Mér tókst að vinna ráðherrann og svo sjálfan Hróksforsetann.   

Ljóst er að Hrókurinn hefur gert þarna góða hluti og að skákin er orðinn mikið áhugamál sumra vistmanna.   Eðli málsins má ekki geta sigurvegara mótsins og sá sem sigraði tók það sérstaklega fram að það mætti alls ekki fréttast að hann hafi unnið!  "Ég vil alls ekki að menn telji mig skáknörd!"